ಬೆಂಗಳೂರು: ಹಾಲಷ್ಟೇ ಅಲ್ಲ, ತರಕಾರಿ ಬೆಲೆಯೂ ಏರಿದೆ. ಅಲ್ಲದೇ ಮೂರು ತಿಂಗಳಿಂದ ತರಕಾರಿ ಬೆಲೆ ಹೆಚ್ಚುತ್ತಲೇ ಇದೆ. ಪರಿಣಾಮ ಇನ್ನು ಕೆಲವೇ ದಿನಗಳಲ್ಲಿ ಊಟ ತಿಂಡಿ ಬೆಲೆಯೂ ಹೆಚ್ಚಳವಾಗುವ ಸಾಧ್ಯತೆಯಿದೆ. ಸಗಟು ವ್ಯಾಪಾರದಲ್ಲಿ ರು. 25 ಇದ್ದ ಟಮೊಟೋ ಬೆಲೆ ರು.60 ತಲುಪಿದೆ. ಕೆ.ಆರ್ ಮಾರುಕಟ್ಟೆಗೆ ಬರುತ್ತಿರುವ ಟಮೊಟೊ ಪ್ರಮಾಣ ಕಡಿಮೆಯಾಗಿದ್ದು ದಿಢೀರ್ ಬೆಲೆ ಏರಿಕೆಗೆ ಕಾರಣವಾಗಿದೆ. ಚಿಲ್ಲರೆ ಮಾರಾಟಗಾರರು ರು. 70 ವರಗೊ ಮಾರಾಟ ಮಾಡುತ್ತಿದ್ದಾರೆ, ತಮಿಳುನಾಡಿನಲ್ಲಿ ಇತ್ತೀಚೆಗೆ ನೆರೆ ಬಂದ್ದಿದ ಕಾರಣ ಅಲ್ಲಿನ ಬೆಳೆ ಸಂಪೂರ್ಣವಾಗಿ ನಾಶವಾಗಿದೆ.
ಹಾಗೆಯೇ ಕರ್ನಾಟಕದಲ್ಲಿ ಒಂದು ತಿಂಗಳ ಹಿಂದೆ ಬಂದಿದ್ದ ಮಳೆಯಿಂದಾಗಿ ರೈತರು ಅಂದುಕೊಂಡಷ್ಟು ತರಕಾರಿ ಬೆಳೆಯನ್ನು ಪಡೆಯಲು ಸಾಧ್ಯವಾಗಿಲ್ಲ. ಕರ್ನಾಟಕದಲ್ಲಿ ಬೆಳೆದ ಅರ್ಧಭಾಗಕ್ಕಿಂತ ಹೆಚ್ಚಿನದನ್ನು ತಮಿಳುನಾಡಿಗೆ ಕಳುಹಿಸಲಾಗಿದೆ.ಅಲ್ಲಿಯೂ ಬೆಳೆ ಸಂಪೂರ್ಣ ನಾಶವಾಗಿದೆ.
ಜೊತೆಗೆ ನಿರೀಕ್ಷಿತ ಮಟ್ಟದಲ್ಲಿ ತರಕಾರಿ ಬೆಂಗಳೂರಿಗೆ ಬಾರದಿರುವುದು ಕೂಡ ಬೆಲೆ ಏರಿಕೆಗೆ ಕಾರಣವಾಗಿದೆ. ಈಗಾಗಲೇ ನಾಸಿಕ್‍ನಿಂದ ಟೊಮೆಟೋ ಕ್ಯಾರೆಟ್ ನಮ್ಮ ರಾಜ್ಯಕ್ಕೆ ಬರುತ್ತಿದೆ ಹಾಗೆಯೇ ಬೀನ್ಸ್, ಸೌತೆಕಾಯಿ, ಬೆಂಡೆಕಾಯಿ, ಕ್ಯಾರೆಟ್ ದರದಲ್ಲಿ ಸಾಕಷ್ಟು ಏರಿಕೆ ಕಂಡಿದೆ.
