ಎಬೋಲಾ: ವ್ಯಕ್ತಿ ಸತ್ತರೂ ವೈರಸ್ ಜೀವಂತ

ನವದೆಹಲಿ: ವಿಶ್ವವನ್ನೇ ಭಯಭೀತರನ್ನಾಗಿಸಿರುವ ಮಾರಕ ರೋಗದ ಕುರಿತು ಮತ್ತೊಂದು ಭಯಾನಕ ಸಂದೇಶವೊಂದನ್ನು ವಿಶ್ವ ಆರೋಗ್ಯ ಸಂಸ್ಥೆ ರವಾನಿಸಿದೆ.

ವಿಶ್ವದೆಲ್ಲೆಡೆ ಮರಣ ಮೃದಂಗ ಮುಂದುವರಿಸಿರುವ ಎಬೋಲಾ ಕುರಿತಂತೆ ಸಂಶೋಧಕರು ಎಚ್ಚರಿಕೆ ಸಂದೇಶವನ್ನು ನೀಡಿದ್ದು, ಎಬೋಲಾ ರೋಗದಿಂದ ಸತ್ತ ವ್ಯಕ್ತಿಯ ದೇಹದಲ್ಲಿ ವೈರಸ್ 7 ದಿನಗಳವರೆಗೂ ಜೀವಂತವಾಗಿರುತ್ತವೆ ಎಂದು ಹೇಳಿದ್ದಾರೆ.

ಎಬೋಲಾ ರೋಗಕ್ಕೆ ತುತ್ತಾಗಿ ಸತ್ತ ವ್ಯಕ್ತಿಯ ದೇಹದಲ್ಲಿದ್ದ ವೈರಸ್‌ಗಳು ಸಾವನ್ನಪ್ಪಿರುತ್ತವೆ ಎಂದು ಎಲ್ಲರೂ ನಂಬಿದ್ದರು. ಆದರೆ, ಈ ಕುರಿತಂತೆ ಸಂಶೋಧನೆ ನಡೆಸಿದ ವಿಶ್ವ ಆರೋಗ್ಯ ಸಂಸ್ಥೆಯುಗೆ ಭಯಾನಕ ಮಾಹಿತಿ ದೊರಕಿದ್ದು, ಎಬೋಲಾಗೆ ತುತ್ತಾದ ವ್ಯಕ್ತಿಯ ದೇಹದಲ್ಲಿ ಕನಿಷ್ಟ 7 ದಿನಗಳು ವೈರಸ್ ಜೀವಂತವಾಗಿರುತ್ತದೆ ಎಂದು ಹೇಳಿದೆ.

ಸತ್ತ ವ್ಯಕ್ತಿಯ ದೇಹವನ್ನು ಮುಟ್ಟಿದ ವ್ಯಕ್ತಿಗೂ ಇದರ ಸೋಂಕು ಹರಡಲಿದ್ದು, ಎಬೋಲಾದಿಂದ ಸಾವನ್ನಪ್ಪಿದ ವ್ಯಕ್ತಿಯ ದೇಹ ಅತ್ಯಂತ ಅಪಾಯಕಾರಿಯಾಗಿದೆ. ವ್ಯಕ್ತಿಯ ದೇಹವನ್ನು ಸುಡುವಾಗ ಬೆಂಕಿಯ ಸಣ್ಣ ಕಿಡಿಯಿಂದಲೂ ಎಬೋಲಾ ವೈರಸ್ ಇನ್ನಿತರರಿಗೆ ಹರಡುತ್ತವೆ ಎಂದು ತಿಳಿಸಿದೆ. ಎಬೋಲಾ ರೋಗದಿಂದ ಬಳಲುತ್ತಿರುವವರ ದೇಹಲ್ಲಿರುವ ವೈರಸ್‌ಗಳು ಎಲ್ಲಿಯವರೆಗೆ ಜೀವಂತವಾಗಿರುತ್ತವೆಂಬುದರ ಕುರಿತು ಈವರೆಗೂ ಯಾರೊಬ್ಬರೂ ಸಂಶೋಧನೆ ನಡೆಸಿಲ್ಲ. ಎಬೋಲಾ ರೋಗದಿಂದಾಗಿ ಸಾವನ್ನಪ್ಪಿರುವವರಿಂದ ಸಾರ್ವಜನಿಕರು ಸಾಕಷ್ಟು ಎಚ್ಚರಿಕೆ ವಹಿಸಬೇಕಿದ್ದು, ರೋಗಪೀಡತ ವ್ಯಕ್ತಿಯಿಂದ ದೂರವಿರುವುದು ಒಳ್ಳೆಯದು ಎಂದು ತಿಳಿಸಿದೆ.