ಬೆಂಗಳೂರು: ಕುಡಿದ ಮತ್ತಿನಲ್ಲಿ ಗಗನ ಸಖಿಯರೊಂದಿಗೆ ಅಸಭ್ಯ ವರ್ತನೆ ತೋರಿದ ಆರೋಪದ ಮೇರೆಗೆ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಪೊಲೀಸರು ಇಬ್ಬರು ಯುವಕರನ್ನು ಬಂಧಿಸಿದ್ದಾರೆ.
ಕಳೆದ ಭಾನುವಾರ ಪ್ರಕರಣ ನಡೆದಿದ್ದಾದರೂ, ಮಂಗಳವಾರ ಪ್ರಕರಣ ಬಯಲಾಗಿದೆ. ಮೂಲಗಳ ಪ್ರಕಾರ ನಾಗಾಲ್ಯಾಂಡ್ ಮೂಲಕ ಅಜಯ್ ಕುಮಾರ್ ಮತ್ತು ಕಲಾ ಪಂಕಜ್ ಎಂಬ ಯುವಕರು ಕಂಠಪೂರ್ತಿ ಕುಡಿದು ವಿಮಾನ ಹತ್ತಿದ್ದಾರೆ. ಬಳಿಕ ವಿಮಾನ ಟೇಕ್ ಆಫ್ ಆಗುತ್ತಿದ್ದಂತೆಯೇ ಗಗನ ಸಖಿಯರೊಂದಿಗೆ ಅಸಭ್ಯವಾಗಿ ವರ್ತಿಸಿದ್ದಾರೆ. ವಿಮಾನ ಚಲಿಸುತ್ತಿರುವಾಗಲೇ ಮೆನುಕಾರ್ಡ್ ತರುವಂತೆ ಹೇಳಿ ಗಗನ ಸಖಿಯರನ್ನು ಛೇಡಿಸಿದ್ದಾರೆ. ಅಲ್ಲದೆ ಜೋರಾಗಿ ಕೂಗಾಡುತ್ತಾ ವಿಮಾನದಲ್ಲಿದ್ದ ಪೈಲಟ್ ಗಳ ಏಕಾಗ್ರತೆಗೆ ಭಂಗ ತಂದಿದ್ದಾರೆ ಎಂದು ಆರೋಪಿಸಲಾಗಿದೆ.
ಅಜಯ್ ಕುಮಾರ್ ಮತ್ತು ಕಲಾ ಪಂಕಜ್ ಮದುವೆ ನಿಮಿತ್ತ ಹಾಸನಕ್ಕೆ ತೆರಳಬೇಕಿತ್ತು. ಹೀಗಾಗಿ ಅವರು ಗುವಾಹತಿಯಿಂದ ಬೆಂಗಳೂರಿಗೆ ಏರ್ ಎಷ್ಯಾ ವಿಮಾನ ಸಂಖ್ಯೆ ಐ5 1983 ವಿಮಾನದಲ್ಲಿ ಆಗಮಿಸುತ್ತಿದ್ದರು. ಈ ವೇಳೆ ಯುವಕರು ಅಸಭ್ಯವಾಗಿ ವರ್ತಿಸಿದ್ದಾರೆ. ಕೂಡಲೇ ವಿಮಾನದ ಸಿಬ್ಬಂದಿ ವಾಯುಗೋಪುರಕ್ಕೆ ಮಾಹಿತಿ ರವಾನಿಸಿದ್ದು, ವಿಮಾನ ಕೆಂಪೇಗೌಡ ನಿಲ್ದಾಣಕ್ಕೆ ಆಗಮಿಸುತ್ತಿದ್ದಂತೆಯೇ ಯುವಕರನ್ನು ಪೊಲೀಸರು ಬಂಧಿಸಿದ್ದಾರೆ. ಅಲ್ಲದೆ ಕರ್ನಾಟಕ ಪೊಲೀಸ್ ಕಾಯ್ದೆಯಡಿಯಲ್ಲಿ ಪ್ರಕರಣ ದಾಖಲಿಸಿ ಮ್ಯಾಜಿಸ್ಟ್ರೇಟ್ ನ್ಯಾಯಾಧೀಶರ ಎದುರು ಹಾಜರುಪಡಿಸಿದ್ದಾರೆ. ಯುವಕರ ವಿರುದ್ಧ ಏರ್ ಏಷ್ಯಾ ದೂರು ಕೂಡ ದಾಖಲಿಸಿದೆ.
