ಹುಬ್ಬಳ್ಳಿ: ಹುಬ್ಬಳ್ಳಿಯಲ್ಲಿರುವ ಕರ್ನಾಟಕ ವೈದ್ಯಕೀಯ ವಿಜ್ಞಾನ ಸಂಸ್ಥೆ(ಕಿಮ್ಸ್) ಮತ್ತೆ ಸುದ್ದಿಯಾಗಿದ್ದು, ಆಸ್ಪತ್ರೆಯಲ್ಲಿ ಚಿಕಿತ್ಸೆಗೆ ಆಗಮಿಸಿದ್ದ ಐದು ವರ್ಷದ ಬಾಲಕನನ್ನು ಕಳೆದ ಬುಧವಾರ ಅಪಹರಿಸಲಾಗಿದ್ದು, ಇದುವರೆಗೂ ಪತ್ತೆಯಾಗಿಲ್ಲ.
ಚರ್ಮ ಸೋಂಕುನಿಂದ ಬಳಲುತ್ತಿದ್ದ ಗದಲ ಜಿಲ್ಲೆಯ ಲಕ್ಷ್ಮೇಶ್ವರದ ಮೆಬುಸಾಬ್ ಸೋಹೈಲ್ ಕನಕೆ ಎಂಬ ಬಾಲಕನನ್ನು ಕಿಮ್ಸ್ ಆಸ್ಪತ್ರೆಯ ಹೊರ ರೋಗಿಗಳ ವಾರ್ಡ್ ನಿಂದ ಅಪರಿಚಿತ ವ್ಯಕ್ತಿಗಳು ಅಪಹರಣ ಮಾಡಿದ್ದಾರೆ ಎಂದು ಆರೋಪಿಸಲಾಗಿದೆ.
ಪೋಷಕರು ಪ್ರವೇಶ ಕಾರ್ಡ್ ತುಂಬುವದರಲ್ಲಿ ಬ್ಯುಸಿಯಾಗಿದ್ದ ವೇಳೆ ಒಪಿಡಿಯಿಂದ ಬಾಲಕ ನಾಪತ್ತೆಯಾಗಿದ್ದಾನೆ ಎಂದು ಕಿಮ್ಸ್ ವೈದ್ಯಕೀಯ ಅಧೀಕ್ಷಕ ಡಾ. ಶಿವಪ್ಪ ಅನಿರುಶೆಟ್ರು ಅವರು ಹೇಳಿದ್ದಾರೆ.
ಬಾಲಕ ಮತ್ತೊಬ್ಬ ಬಾಲಕನೊಂದಿಗೆ ಆಟವಾಡುತ್ತ ಹೊರ ಹೋಗಿರುವುದು ಸಿಸಿಟಿವಿ ದೃಶ್ಯದಲ್ಯಿ ಸೇರೆಯಾಗಿದೆ. ಆದರೆ ಹೊರಗಿನವರು ಯಾರೋ ಬಾಲಕನನ್ನು ಅಪಹರಿಸಿರುವ ಶಂಕೆ ವ್ಯಕ್ತವಾಗಿದ್ದು, ಇದರಲ್ಲಿ ಯಾರ ಕೈವಾಡವಿದೆ ಎಂಬುದನ್ನು ಪತ್ತೆ ಹಚ್ಚಲಾಗುವುದು ಎಂದು ಅನಿರುಶೆಟ್ರು ತಿಳಿಸಿದ್ದಾರೆ.
ಬಾಲಕ ನಾಪತ್ತೆಯಾಗಿರುವ ಬಗ್ಗೆ ಪೋಷಕರು ತಕ್ಷಣ ನಮ್ಮ ಗಮನಕ್ಕೆ ತಂದಿಲ್ಲ. ಅವರು ಲಕ್ಷ್ಮೇಶ್ವರದಲ್ಲಿ ಹಾಗೂ ಇತರೆ ಕಡೆ ಶೋಧಿಸಿ ಬಳಿಕ ಗುರುವಾರ ವಿದ್ಯಾನಗರ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ ಎಂದು ಅವರು ಹೇಳಿದ್ದಾರೆ.
ತುರ್ತು ವಿಭಾಗ, ಪರೀಕ್ಷಾ ಕೇಂದ್ರ, ಒಪಿಡಿ ಹಾಗೂ ಉಪನ್ಯಾಸ ಕೊಠಡಿ ಸೇರಿದಂತೆ ಕಿಮ್ಸ್ ಆಸ್ಪತ್ರೆಯಲ್ಲಿ ಒಟ್ಟು 72 ಸಿಸಿಟಿವಿಗಳನ್ನು ಅಳವಡಿಸಲಾಗಿದೆ. ಆದರೆ ಕೇವಲ ಒಂದೆ ಸಿಸಿಟಿವಿಯಲ್ಲಿ ಮಾತ್ರ ಬಾಲಕ ಸೇರೆಯಾಗಿರುವುದು ಹಲವು ಅನುಮಾನಗಳಿಗೆ ಕಾರಣವಾಗಿದೆ.
ಈ ಸಂಬಂಧ ಪ್ರಕರಣ ದಾಖಲಿಸಿಕೊಂಡಿರುವ ವಿದ್ಯಾನಗರ ಪೊಲೀಸರು, ಬಾಲಕನಿಗಾಗಿ ಶೋಧ ನಡೆಸುತ್ತಿದ್ದಾರೆ. ಆದರೆ ಇದುವರೆಗೂ ಯಾವುದೇ ಸುಳಿವು ಸಿಕ್ಕಿಲ್ಲ ಎಂದು ಶನಿವಾರ ಪೊಲೀಸರು ತಿಳಿಸಿದ್ದಾರೆ.
