ಕೈಗಾ- 1 ಅಣು ವಿದ್ಯುತ್ ಘಟಕದಿಂದ ವಿಶ್ವ ದಾಖಲೆ, ಸಿಬ್ಬಂದಿಗೆ ಪ್ರಧಾನಿ ಮೋದಿ ಅಭಿನಂದನೆ

ಬೆಂಗಳೂರು: ಕೈಗಾ-1 ಅಣು ವಿದ್ಯುತ್ ಘಟಕ ನಿರಂತರವಾಗಿ 941 ದಿನಗಳಿಗಿಂತಲೂ ಹೆಚ್ಚಿನ ದಿನ  ಅಣು ವಿದ್ಯುತ್ ಉತ್ಪಾದಿಸುವ ಮೂಲಕ ವಿಶ್ವ ದಾಖಲೆ ಸೃಷ್ಟಿಸಿದೆ.

ಕಾರವಾರದಿಂದ 56 ಕಿಮೀ ದೂರದಲ್ಲಿರುವ ಕೈಗಾ- 1 ಅಣು ವಿದ್ಯುತ್ ಘಟಕ ಸತತವಾಗಿ 941 ದಿನ ಕಾರ್ಯನಿರ್ವಹಿಸುವ ಮೂಲಕ ವಿಶ್ವಮಟ್ಟದಲ್ಲಿ ಸಾಧನೆ ಮಾಡಿದೆ. ಇದಕ್ಕೂ ಮುಂದೆ ಇಂಗ್ಲೆಂಡಿನ ಹೈಸಾಮ್ ಘಟಕ ನಿರಂತರವಾಗಿ 940 ದಿನ ವಿದ್ಯುತ್ ಉತ್ಪಾದಿಸುವ ಮೂಲಕ ದಾಖಲೆ  ಸೃಷ್ಟಿಸಿತ್ತು.

ಕೈಗಾ ಅಣು ವಿದ್ಯುತ್ ಸ್ಥಾವರದ ಈ ಸಾಧನೆ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ ಅತೀವ ಸಂತಸ ವ್ಯಕ್ತಪಡಿಸಿದ್ದಾರೆ. ಕೈಗಾ ಅಣು  ವಿದ್ಯುತ್ ಸ್ಥಾವರದ ವಿಜ್ಞಾನಿಗಳು, ಹಾಗೂ ತಂತ್ರಜ್ಞರನ್ನು ಪ್ರಧಾನಿ ನರೇಂದ್ರ ಮೋದಿ ಅಭಿನಂದಿಸಿದ್ದಾರೆ.

ಭಾರತದ ತಂತ್ರಜ್ಞರು ಹಾಗೂ ವಿಜ್ಞಾನಿಗಳಿಂದ ಮತ್ತೊಂದು ವಿಶ್ವ  ದಾಖಲೆ ನಿರ್ಮಾಣವಾಗಿದೆ. ದೇಶಿ  ವಿನ್ಯಾಸದ ಕೈಗಾ-1 ಅಣು ವಿದ್ಯುತ್ ಘಟಕ ನಿರಂತರವಾಗಿ 940  ದಿನಗಳು ಕಾರ್ಯನಿರ್ವಹಿಸಿದೆ. ಇದು ದೊಡ್ಡ ಸಾಧನೆಯಾಗಿದ್ದು, ಎಲ್ಲಾ ಸಿಬ್ಬಂದಿಯನ್ನೂ ಅಭಿನಂದಿಸುವುದಾಗಿ ನರೇಂದ್ರ ಮೋದಿ ಟ್ವೀಟರ್ ಸಂದೇಶದಲ್ಲಿ ತಿಳಿಸಿದ್ದಾರೆ.

ಕೈಗಾ-1 ಅಣು ವಿದ್ಯುತ್ ಘಟಕ 941 ದಿನವೂ ಸತತವಾಗಿ ವಿದ್ಯುತ್ ಉತ್ಪಾದಿಸುವ ಮೂಲಕ ದೇಶಕ್ಕೆ ಹೆಮ್ಮೆ ತಂದಿದೆ. ಈ ಘಟಕ   5 ಬಿಲಿಯನ್  ಯೂನಿಟ್ ವಿದ್ಯುತ್ ನ್ನು ಉತ್ಪಾದಿಸುತ್ತಿದೆ  ಎಂದು ಭಾರತೀಯ ಅಣು ವಿದ್ಯುತ್ ನಿಗಮ ನಿಯಮಿತ- ಎನ್ ಪಿಸಿಐಎಲ್ ಹೇಳಿದೆ.