ಬೆಂಗಳೂರು: ತಂಬಾಕು ಚಟ ಬಿಡು ಎಂದಿದ್ದಕ್ಕೆ ಯುವಕ ಆತ್ಮಹತ್ಯೆಗೆ ಶರಣು

ಬೆಂಗಳೂರು; ತಂಬಾಕು ಜಗಿಯುವ ಚಟ ಬಿಡುವಂತೆ ಪೋಷಕರು ಬುದ್ಧಿ ಮಾತು ಹೇಳಿದ್ದಕ್ಕೆ ಯುವಕನೊಬ್ಬ ಆತ್ಮಹತ್ಯೆಗೆ ಶರಣಾಗಿರುವ ಘಟನೆ ನಗರದ ಕೆ.ಜಿ.ಹಳ್ಳಿ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಶನಿವಾರ ರಾತ್ರಿ ನಡೆದಿದೆ. 

ಆಸೀಫ್ ವುಲ್ಲಾ (19) ಮೃತ ಯುವಕನಾಗಿದ್ದಾನೆ. ಯುವಕ ಅರ್ಧಕ್ಕೆ ಕಾಲೇಜು ವಿದ್ಯಾಭ್ಯಾಸ ಮೊಟಕುಗೊಳಿಸಿದ್ದು, ಫ್ಯಾಬ್ರಿಕ್ ಕಾರ್ಖಾನೆಯಲ್ಲಿ ಕೆಲಸ ಮಾಡುತ್ತಿದ್ದ. 

ಆಸೀಫ್ ವುಲ್ಲಾ ತಂಬಾಕು ಸೇವನೆ ಚಟಕ್ಕೆ ಒಳಗಾಗಿದ್ದ. ತಂಬಾಕು ಚಟ ಒಳ್ಳೆಯದಲ್ಲ ಎಂದು ಆಸೀಫ್ ತಂದೆ ಎಸ್.ಎಂ. ಅಬ್ದುಲ್ ಅವರು ಪುತ್ರನಿಗೆ ಬುದ್ಧಿ ಮಾದು ಹೇಳಿದ್ದಾರೆ. ಕೆಟ್ಟ ಚಟ ಬಿಡದ ಯುವಕ ಪೋಷಕರೊಂದಿಗೆ ವಾದ ಮಾಡುತ್ತಿದ್ದ. 

ಪೋಷಕರು ಶನಿವಾರ ರಂಜಾನ್ ಹಿನ್ನಲೆಯಲ್ಲಿ ಸಂಬಂಧಿಕರೊಬ್ಬ ಮನೆಗೆ ತೆರಳಿದ್ದರು. ಮನೆಯಲ್ಲಿ ಯಾರೂ ಇಲ್ಲದ ಸಮಯದಲ್ಲಿ ಯುವಕ ಡೆತ್ ನೋಟ್ ಬರೆದಿಟ್ಟು ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ. ಪೋಷಕರು ಶನಿವಾರ ರಾತ್ರಿ 8.30ರ ಸುಮಾರಿಗೆ ಮನೆಗೆ ವಾಪಸ್ ಆದಾಗ ಪ್ರಕರಣ ಬೆಳಗಿಗೆ ಬಂದಿದೆ ಎಂದು ಪೊಲೀಸರು ಹೇಳಿದ್ದಾರೆ. ಈ ಸಂಬಂಧ ಕೆ.ಜಿ.ಹಳ್ಳಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ.