ರಾಷ್ಟ್ರೀಯ ಹೆದ್ದಾರಿ-4ರಲ್ಲಿ ಭಾರಿ ವಾಹನಗಳ ಸಂಚಾರ ಶುರು

ಬೆಳಗಾವಿ:  ಸಂಕೇಶ್ವರ ಮತ್ತು ನಿಪಾಣ್ಣಿಯಲ್ಲಿ ಕಳೆದ 12 ದಿನಗಳಿಂದ ಉಂಟಾಗಿದ್ದ ಭಾರೀ ಪ್ರವಾಹದ ಹಿನ್ನೆಲೆಯಲ್ಲಿ ಸ್ಥಗಿತಗೊಂಡಿದ್ದ ಬೆಳಗಾವಿ- ಮಹಾರಾಷ್ಟ್ರದ ಕೊಲ್ಹಾಪುರ ಸಂಪರ್ಕ ಕಲ್ಪಿಸುವ ರಾಷ್ಟ್ರೀಯ ಹೆದ್ದಾರಿ 4ರಲ್ಲಿ ಭಾರಿ ವಾಹನಗಳ ಸಂಚಾರ ಆರಂಭವಾಗಿದೆ.

ಪ್ರವಾಹದ ನೀರು ಈಗಲೂ ಕೂಡಾ ಈ ಹೆದ್ದಾರಿಯಲ್ಲಿ ಹರಿಯುತ್ತಿದೆ. ಆದಾಗ್ಯೂ, ಪ್ರಾಯೋಗಿಕವಾಗಿ ಮಿಲಿಟರಿ ಟ್ರಕ್  ಈ ಮಾರ್ಗದಲ್ಲಿ ಸಂಚರಿಸಿತು. ನಂತರ ಬಸ್ಸು, ಲಾರಿಯಂತಹ ಭಾರೀ ವಾಹನಗಳು ಈ ಮಾರ್ಗದಲ್ಲಿ ಸಂಚರಿಸಬಹುದು ಎಂಬುದನ್ನು ಮನಗೊಂಡು ಭಾರಿ ವಾಹನಗಳು ಸಂಚರಿಸಲು ಅವಕಾಶ ಮಾಡಿಕೊಡಲಾಗಿದೆ. 

ಈ ಹೆದ್ದಾರಿಯಲ್ಲಿ ಎರಡು ಅಡಿವರೆಗೂ ಈಗಲೂ ನೀರು ಹರಿಯುತ್ತಿರುವುದರಿಂದ ಕಾರು ಮತ್ತಿತರ  ಲಘು ವಾಹನಗಳ ಸಂಚಾರವನ್ನು ನಿರ್ಬಂಧಿಸಲಾಗಿದೆ. 

ಪ್ರವಾಹ ಕ್ಷೀಣಿಸಿದ ನಂತರ ಈ ಮಾರ್ಗದಲ್ಲಿ ಕಾರು ಮತ್ತಿತರ ಲಘು ವಾಹನಗಳನ್ನು ಸಂಚರಿಸಲು ಅವಕಾಶ ಮಾಡಿಕೊಡಲಾಗುವುದು ಎಂದು ಪೊಲೀಸರು ಹೇಳಿದ್ದಾರೆ.