ಬೆಂಗಳೂರು: ಗೆಳತಿಯ ಖಾಸಗಿ ಫೋಟೋ ಶೇರ್ ಮಾಡಿ ಬ್ಲಾಕ್‍ಮೇಲ್ ಮಾಡಿದ್ದ ಆರೋಪಿ ಅಂದರ್​

ಬೆಂಗಳೂರು: ತನ್ನ ಗೆಳತಿಯ ಖಾಸಗಿ ಫೋಟೊಗಳನ್ನು ಅನ್ಯರೊಡನೆ ಶೇರ್ ಮಾಡಿ ಬ್ಲಾಕ್‍ಮೇಲ್ ಮಾಡುತ್ತಿದ್ದ ಆರೋಪಿಯನ್ನು ಬೆಂಗಳೂರು ಸೈಬರ್ ಕ್ರೈಂ ಬ್ರ್ಯಾಂಚ್ ಪೋಲೀಸರು ಬಂಧಿಸಿದ್ದಾರೆ.

ಬಂಧಿತನನ್ನು ಚಿಕ್ಕಬಾಣಸವಾಡಿಯ ಈರಪ್ಪ ಲೇಔಟ್ ನಿವಾಸಿ ಕಿರಣ್(23) ಎಂದು ಗುರುತಿಸಲಾಗಿದ್ದು ಈತ ಕಳೆದೆರಡು ವರ್ಷಗಳಿಂದಬಾಣಸವಾಡಿಯ ಹೇರ್‍ಸೆಲ್ಯೂನ್‍ನಲ್ಲಿ ಕೆಲಸದಲ್ಲಿದ್ದ. ಈ ಸಮಯದಲ್ಲಿ ಯುವತಿಯೊಡನೆ ಪರಿಚಯ ಮಾಡಿಕೊಂಡಿದ್ದ ಈತ ಆಕೆಯೊಡನೆ ಸ್ನೇಹ ಬೆಳೆಸಿದ್ದ.

ಈ ಮಧ್ಯೆ ಯುವತಿಯ ಮೊಬೈಲ್ ನಲ್ಲಿ ತೆಗೆದ ಆಕೆಯ ಚಿತ್ರವನ್ನು ತನ್ನ ಮೊಬೈಲ್ ಗೆ ಶೇರ್ ಮಾಡಿಕೊಂಡಿದ್ದ , ಆದರೆ ಇತ್ತೀಚೆಗೆ ಆರೋಪಿ ಕಿರಣ್ ಜತೆ ಯುವತಿಗೆ ಮನಸ್ತಾಪ ಉಂಟಾಗಿದ್ದು ಆಕೆ ಅವನೊಂದಿಗಿಒನ ಸ್ನೇಹಕ್ಕೆ ಮಂಗಳ ಹಾಡಿದ್ದಳು. ಆದರೆ ಕಿರಣ್ ಮಾತ್ರ ಯುವತಿಯ ಖಾಸಗಿ ಫೋಟೋಗಳನ್ನು ಅನ್ಯರಿಗೆ ಶೇರ್ ಮಾಡಿದ್ದಾನೆ. ಅಲ್ಲದೆ ಆಕೆಯ ವ್ಯಕ್ತಿತ್ವಕ್ಕೆ ಮಸಿ ಬಳಿಯುವ ಬೆದರಿಕೆ ಹಾಕಿದ್ದಾನೆ.

ಈ ಬಗ್ಗೆ ಯುವತಿ ಸೈಬರ್ ಪೋಲೀಸರಲ್ಲಿ ದೂರು ಸಲ್ಲಿಸಿದ್ದು ತನಿಖೆ ನಡೆಸಿದ ಪೋಲೀಸರು ಆರೋಪಿಯನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.