ತಿಮ್ಮ: ಬೆಳ್ಳಗಿರೋದೆಲ್ಲಾ ಹಾಲಲ್ಲ. ಬಿಳಿ ಕೂದಲಿರುವವರೆಲ್ಲಾ ಮುದುಕರಲ್ಲವೋ ತಮ್ಮಾ.
ತಮ್ಮ: ಹಾಗೆಂಗೆ ಹೇಳ್ತೀಯೋ ತಿಮ್ಮಾ?
ತಿಮ್ಮ: ಅಸರಾಂ ಭಾಪು ಮತ್ತು ತರುಣ್ ತೇಜ್‌ಪಾಲ್‌ರನ್ನು ನೋಡಿದರೇ ಗೊತ್ತಾಗಲ್ವೇನೋ ತಮ್ಮಾ?
ತಮ್ಮ: ಹೌದು ತಿಮ್ಮಾ ಹೌದು. ಅದು ಅವರ ಹಳೇ ಚಾಳಿ ಇರಬೇಕಲ್ವಾ? ಮಾತಿನ್ಯಾಗ ಒಂದು ಹೊರಗಿನ್ನೊಂದು. ಹೀಗೆ ಬ್ಯಾರೆ ಬ್ಯಾರೇನು ಇರ್ತಾರಲ್ಲೋ ಇವರು.
ತಿಮ್ಮ: ಹೌದಲೇ ಮ್ಯಾಲೆ ನೋಡಕ್ಕೆ ಇವರು ಇಬ್ಬರೂ ಸಾಚಾಗಳು. ಇವರ ಕೆಳಗಿನ ಹಕೀಕತ್ತೇ ಬ್ಯಾರೆ ಇರತೈತಿ...
ತಮ್ಮ: ಅದು ಹ್ಯಾಂಗ ಹೇಳ್ತೀಯಾ?
ತಿಮ್ಮ: ಮ್ಯಾಲ ನೋಡಾಕ ಇವರು ಎದುರು ಇದ್ದವರ ಡ್ರೆಸ್ ವರ್ಣನಾ ಮಾಡಿದರೂ ಕೆಳಗಿನ ಇವರ ವಿಚಾರತನ ಬ್ಯಾರೆ ಇರತೈತಿ.
ತಮ್ಮ: ಹ್ಯಾಂಗಂತಿ?
ತಿಮ್ಮ: ಮ್ಯಾಲೆ ಇವರು ತಮ್ಮ 'ಶಿಕಾರ'ಕ್ಕೂ ಎಷ್ಟ್ ಸಹಾಯ ಮಾಡಿದರೂ ಕೆಳಗೆ 'ಶಿಕಾರಿ' ತಮ್ಮಾ. ಮಂಚಕ್ಕೆ ಯಾವಾಗ ಬಂದು ಬೀಳತಾರ ಅಂತ ಲೆಕ್ಕಾ ಹಾಕತಿರತಾರ.
ತಮ್ಮ: ಅಂದರಾ ಇವರದು ಕೆಳಗೆ ಬ್ಯಾರೆ, ಮ್ಯಾಲೆ ಬೇರೆ ಅಂತ ಆತಲಾ?
ತಿಮ್ಮ: ಮತ್ತಿದು ಇಂದು ನೆನ್ನೆ ವಿಷಯ ಅಲ್ಲಲೇ? ಬಾಳ ವರ್ಷದಾಗ ನಡಕೊಂಡು ಬಂದೈತಿ. ಎಂಥವರನ್ನೂ ಬಿಟ್ಟಿಲ್ಲಾ!
ತಮ್ಮ: ಹೌದಾ?
ತಿಮ್ಮ: ಹೌದಲೇ ಬಿಲ್ ಕ್ಲಿಂಟನ್ ಸಾಯೇಬರು ಎಂಥ ಮ್ಯಾಲಿನ ಹುದ್ದೆನಾಗ ಇದ್ದರೂ ಈ ಕೆಳಗಿನ ವಿಷಯದಾಗ ಎಡವಿದರು. ಟೈಗರ್ ವುಡ್‌ನ 'ಹೋಲ್‌' ಸ್ಟೋರಿ 'ಅನ್ ಹೋಲಿ'ಯಾಗಿದ್ದು ಈ ಕೆಳಗಿನ ಪ್ರಕರಣದಿಂದ.
ತಮ್ಮ: ಭಾಳ ಡೇಂಜರ್ ಬಿಡು ಈ ಕೆಳಗಿನ ವಿಚಾರ!
ತಿಮ್ಮ: ಹೌದಲೇ, ಅದಕ್ಕೆ ಈ ವಿಷಯದಾಗ ಕೇರ್‌ಫುಲ್ ಆಗಿರಬೇಕು. ಕೆಳಗಿಂದು ಎಲ್ಲಾ ಬರೋಬ್ಬರಿ ಇಟಕೋಬೇಕು. ಮತ್ತಾ ಸಣ್ಣವರಿದ್ದಾಗ ನಮ್ಮ ಶಾಲ್ಯಾಗ ಹೇಳಿಕೊಟ್ಟಾರ ನಮಗ.
ತಮ್ಮ: ಸಣ್ಣವರಿದ್ದಾಗ ಕೆಳಗಿನ ವಿಚಾರ ಹೇಳ್ಯಾರ ನಿಮಗಾ?
ತಿಮ್ಮ: ಹೌದು ನೀ ಸಾಲೆ ಕಾಲ್ಯಾಜ್ಯಾಗ ವಾರ್ಷಿಕ ಪರೀಕ್ಷಾ ಬರೆದೀಯೋ ಇಲ್ಲೋ?
ತಮ್ಮ: ಬರೆದೀನಿ. ನಾ ಒಬ್ಬನೆ ಯಾಕೆ ಎಲ್ಲಾರು ಬರೆದೀವಿ.
ತಿಮ್ಮ: ಹ್ಯಾಂಗಿರುತ್ತಿತ್ತು ಪ್ರಶ್ನೆ?
ತಮ್ಮ: ಹ್ಯಾಂಗಿರತೈತಿ?
ತಿಮ್ಮ: ಈ ಕೆಳಗಿನ ಸಮಸ್ಯೆಗಳನ್ನು ಬಿಡಿಸಿರಿ, ಈ ಕೆಳಗಿನ ಬಿಟ್ಟ ಸ್ಥಳ ತುಂಬಿರಿ, ಈ ಕೆಳಗಿನವುಗಳನ್ನು ಹೊಂದಿಸಿರಿ!
ತಮ್ಮ: ಅರೆ, ಹೌದಲ್ಲೋ!
ತಿಮ್ಮ: ಅದಕ್ಕಲೇ ತಮ್ಮಾ, ಕೆಳಗಿನ ವಿಚಾರ ಬರೋಬ್ಬರಿ ಇರಬೇಕಾಗೇತಿ. ಕೆಳಗಿನ ಸಮಸ್ಯೆಗಳ್ನ ಪಬ್ಲಿಕ್‌ನ್ಯಾಗೆ ಬಿಡಿಸಬಾರದು. ಪಬ್ಲಿಕ್‌ನ್ಯಾಗ ತುಂಬಬಾರದು, ಪಬ್ಲಿಕ್‌ನ್ಯಾಗ ಹೊಂದಿಸಬಾರದು.
- ಯಶವಂತ ಸರದೇಶಪಾಂಡೆ
allthebest01@gmail.com
