ಮಹಾರಾಷ್ಟ್ರದ ಸೋಲಾಪುರದಲ್ಲಿ ಹಳಿ ತಪ್ಪಿದ ಗೂಡ್ಸ್ ರೈಲು, ರೈಲುಗಳ ಮಾರ್ಗ ಬದಲಾವಣೆ!

ಸೋಲಾಪುರ: ಅತ್ತ ಬಿಹಾರದಲ್ಲಿ ಗೂಡ್ಸ್ ರೈಲು ಗುದ್ದಿ 8 ಮಂದಿ ಸಾವನ್ನಪ್ಪಿರುವ ವಿಚಾರ ಸುದ್ದಿಯಾಗುತ್ತಿದ್ದಂತೆಯೇ ಇತ್ತ ಮಹಾರಾಷ್ಟ್ರದಲ್ಲಿ ಗೂಡ್ಸ್ ರೈಲು ಹಳಿ ತಪ್ಪಿರುವ ವಿಚಾರ ಬೆಳಕಿಗೆ ಬಂದಿದೆ.

ಮಹಾರಾಷ್ಟ್ರದ ಸೋಲಾಪುರದ ವಾಡಿ ಡಿವಿಷನ್ ನ ದುಧಾನಿ ರೈಲ್ವೇ ನಿಲ್ದಾಣದಲ್ಲಿ ಗೂಡ್ಸ್ ರೈಲು ಹಳಿ ತಪ್ಪಿದ್ದು, ರೈಲಿನ 5 ಬೋಗಿಗಳು ಹಳಿ ತಪ್ಪಿ ನೆಲಕ್ಕುರಳಿವೆ. ಶನಿವಾರ ತಡರಾತ್ರಿ 12.30ರ ಸಂದರ್ಭದಲ್ಲಿ ಈ ಘಟನೆ  ಸಂಭವಿಸಿದ್ದು, ಅದೃಷ್ಟಲವಶಾತ್ ಯಾವುದೇ ರೀತಿಯ ಸಾವುನೋವುಗಳು ಸಂಭವಿಸಿಲ್ಲ ಎಂದು ತಿಳಿದುಬಂದಿದೆ.

ರೈಲು ಹಳಿ ತಪ್ಪಿದ ಪರಿಣಾಮ ಅದನ್ನು ತೆರವುಗೊಳಿಸಲು ಈ ಮಾರ್ಗದ ರೈಲುಗಳ ಮಾರ್ಗ ಬದಲಾವಣೆ ಮಾಡಲಾಗಿದೆ. ಹೊಟಗಿ-ಗುಂಟ್ಕಲ್, ವಾಡಿ-ಲಾತುರ್ ಸೇರಿದಂತೆ ಒಟ್ಟು 12 ರೈಲುಗಳ ಮಾರ್ಗ ಬದಲಾವಣೆ  ಮಾಡಲಾಗಿದೆ. ಸ್ಥಳಕ್ಕೆ ದೌಡಾಯಿಸಿರುವ ಅಧಿಕಾರಿಗಳು ರೈಲು ಬೋಗಿಗಳ ತೆರವು ಕಾರ್ಯಾಚರಣೆ ನಡೆಸುತ್ತಿದ್ದಾರೆ.