ಪ್ರಧಾನಿ ನರೇಂದ್ರ ಮೋದಿ ಅವರ ನೋಟು ನಿಷೇಧ ನಿರ್ಧಾರವನ್ನು ದೊಡ್ಡ ವೈಫಲ್ಯ ಎಂದು ಬಣ್ಣಿಸಿರುವ ಕಾಂಗ್ರೆಸ್ ಮುಖಂಡ ಮನಮೋಹನ್ ಸಿಂಗ್, ನೋಟು ನಿಷೇಧದಿಂದಾಗಿ ದೇಶದ ಆರ್ಥಿಕತೆ ಕೆಳಮುಖವಾಗಿ ಚಲಿಸುವಂತಾಗಿದೆ. ದೇಶದ ಅಭಿವೃದ್ಧಿ ಕುಂಠಿತಗೊಂಡಿದ್ದು, ತಾಂತ್ರಿಕವಾಗಿ ಮತ್ತು ಆರ್ಥಿಕವಾಗಿ ನೋಟು ನಿಷೇಧಂತಹ ಸಾಹಸ ಬೇಕಿರಲಿಲ್ಲ ಎಂದು ಹೇಳಿದ್ದಾರೆ.
ಪಂಜಾಬ್ ನ ಮೊಹಾಲಿಯಲ್ಲಿ ಇಂಡಿಯನ್ ಸ್ಕೂಲ್ ಆಫ್ ಬ್ಯುಸಿನೆಸ್ (ಐಎಸ್ಬಿ) ಲೀಡರ್ಶಿಪ್ ಶೃಂಗಸಭೆ ಪಾಲ್ಗೊಂಡು ಮಾತನಾಡಿದ 90ರ ದಶಕದ ದೇಶದ ಆರ್ಥಿಕ ಸುಧಾರಣೆಯ ಶಿಲ್ಪಿ ಕೂಡ ಆಗಿರುವ ಮನಮೋಹನ್ ಸಿಂಗ್ ಅವರು, ಲ್ಯಾಟಿನ್ ಅಮೆರಿಕ ದೇಶಗಳ ಹೊರತಾಗಿ ವಿಶ್ವದ ಯಾವುದೇ ನಾಗರಿಕ ದೇಶಗಳಲ್ಲೂ ನೋಟು ನಿಷೇಧ ಯಶಕಂಡಿಲ್ಲ ಎಂದು ಹೇಳಿದ್ದಾರೆ.
"ನನ್ನ ಪ್ರಕಾರ ಹೇಳುವುದಾದರೆ, ಪ್ರಧಾನಿ ನರೇಂದ್ರ ಮೋದಿ ಅವರ ನೋಟು ನಿಷೇಧ ತೀರಾ ಕೆಟ್ಟ ನಿರ್ಧಾರವಾಗಿತ್ತು. ದೇಶಕ್ಕೆ ಯಾವುದೇ ಪರಿಸ್ಥಿತಿಯಲ್ಲೂ ನೋಟು ನಿಷೇಧದಂತಹ ದುಸ್ಸಾಹಸ ಬೇಕಿರಲಿಲ್ಲ. ತಾಂತ್ರಿಕವಾಗಿ ಮತ್ತು ಆರ್ಥಿಕವಾಗಿ ಇದು ನಿಜಕ್ಕೂ ದೇಶಕ್ಕೆ ದೊಡ್ಡ ಹೊಡೆತವಾಗಿದೆ. ನೋಟು ನಿಷೇಧದಿಂದಾಗಿ ದೇಶದ ಆರ್ಥಿಕ ಅಭಿವೃದ್ಧಿ ಶೇ.30ರಷ್ಟು ಕುಸಿದಿದ್ದು, ಬಂಡವಾಳ ಹೂಡಿಕೆ ಪ್ರಮಾಣ ಶೇ.37ರಿಂದ 30ಕ್ಕೆ ಕುಸಿದಿದೆ. ನೋಟು ನಿಷೇಧ ಪರಿಣಾಮ ಖಾಸಗಿ ಹೂಡಿಕೆ ಪ್ರಮಾಣ ಇಂದಿಗೂ ಏರಿಕೆಯಾಗುತ್ತಿಲ್ಲ. ಜಿಡಿಪಿಯಲ್ಲಿ ಸಾರ್ವಜನಿಕ ವಲಯದ ಹೂಡಿಕೆ ಕೇವಲ ಶೇ.30ರಷ್ಟಿದೆ" ಎಂದು ಹೇಳಿದ್ದಾರೆ.
