ಟ್ರಂಪ್ ನಾಗರಿಕ ಅಭಿನಂದನ್ ಸಮಿತಿಯಲ್ಲಿ ಸರ್ಕಾರ ಮುಚ್ಚಿಡುತ್ತಿರುವುದು ಏನು..? ಪ್ರಿಯಾಂಕಾ ಗಾಂಧಿ ಪ್ರಶ್ನೆ

ನವದೆಹಲಿ: ಅಮೆರಿಕಾ ಅಧ್ಯಕ್ಷ ಡೋನಾಲ್ಡ್ ಟ್ರಂಪ್ ಭೇಟಿಗಾಗಿ ಕೇಂದ್ರ ಸರ್ಕಾರ ಭಾರಿ ಪ್ರಮಾಣದ ಹಣ ವೆಚ್ಚಮಾಡುತ್ತಿರುವುದನ್ನು ಪ್ರಶ್ನಿಸಿರುವ ಕಾಂಗ್ರೆಸ್ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕಾ ಗಾಂಧಿ ವಾದ್ರಾ ಸರ್ಕಾರ ಅದನ್ನು ಏಕೆ ಮುಚ್ಚಿಡುತ್ತಿದೆ ಎಂದು ಶನಿವಾರ ಪ್ರಶ್ನಿಸಿದ್ದಾರೆ.

ಅಮೆರಿಕಾದಲ್ಲಿರುವ ಭಾರತೀಯ ಸಮುದಾಯದ ಮತ ಸೆಳೆಯಲು ಡೊನಾಲ್ಡ್ ಟ್ರಂಪ್ ಅವರ ಭಾರತ ಭೇಟಿ ಚುನಾವಣಾ ವಿಸ್ತರಣಾ ಪ್ರಚಾರವಾಗಬಾರದು ಎಂದು ಕಾಂಗ್ರೆಸ್ ಎಚ್ಚರಿಕೆ ನೀಡಿದ ಒಂದು ದಿನದ ನಂತರ ಈ ಹೇಳಿಕೆ ನೀಡಿದ್ದಾರೆ. ಟ್ರಂಪ್ ಅವರನ್ನು ಸ್ವಾಗತ ಕಾರ್ಯಗಳನ್ನು ಡೊನಾಲ್ಡ್ ಟ್ರಂಪ್ ನಾಗರೀಕ ಅಭಿನಂದನ್ ಸಮಿತಿ ನಿರ್ವಹಿಸುತ್ತಿದೆ ಎಂಬ ಸರ್ಕಾರದ ಹೇಳಿಕೆಗೆ ಪ್ರತಿಕ್ರಿಯಿಸಿದ ಪ್ರಿಯಾಂಕಾ ಗಾಂಧಿ ಸರ್ಕಾರ ಮಾಹಿತಿ ಮುಚ್ಚಿಡಲು ಹೋಗುತ್ತಿರುವುದು ಏಕೆ ಎಂದು ಪ್ರಶ್ನಿಸಿದ್ದಾರೆ.

ಟ್ರಂಪ್ ಭೇಟಿಗಾಗಿ 100 ಕೋಟಿ ವೆಚ್ಚಮಾಡಲಾಗುತ್ತಿದೆ. ಈ ಹಣ ವೆಚ್ಚ ಮಾಡಲು ಸಮಿತಿಯೊಂದನ್ನು ರಚಿಸಲಾಗಿದೆ. ಆದರೆ ಈ ಸಮಿತಿಯಲ್ಲಿ ಯಾರಿದ್ದಾರೆ ಎಂಬುದು ಯಾರಿಗೂ ಗೊತ್ತಿಲ್ಲ. ಯಾವ ಸಚಿವಾಲಯ ಈ ಸಮಿತಿಗೆ ಎಷ್ಟು ಹಣ ನೀಡಿದೆ ಎಂಬುದನ್ನು ತಿಳಿದುಕೊಳ್ಳುವ ಹಕ್ಕು ದೇಶಕ್ಕೆ ಇಲ್ಲವೆ..? ಸಮಿತಿ ರಚಿಸಿ ಸರ್ಕಾರ ಏನನ್ನು ಮುಚ್ಚಿಡಲು ಹೋಗುತ್ತಿದೆ? ಎಂದು ಟ್ವೀಟ್ ಮಾಡಿದ್ದಾರೆ.

ಕಾಂಗ್ರೆಸ್ ವಕ್ತಾರ ಆನಂದ್ ಶರ್ಮ ಶನಿವಾರ ಈ ಸಮಿತಿ ಕುರಿತು ತೀವ್ರ ಟೀಕೆ ಮಾಡಿದ್ದರು. ಸಮಿತಿಯ ಆಹ್ವಾನದ ಮೇರೆಗೆ ಟ್ರಂಪ್ ಭಾರತಕ್ಕೆ ಬರುತ್ತಿದ್ದಾರೆಯೇ..? ಈ ಸಮಿತಿಯನ್ನು ಯಾವಾಗ ರಚಿಸಲಾಯಿತು?. ಅದರ ನೋಂದಣಿ ಆಗಿದ್ದು ಯಾವಾಗ?. ಎಲ್ಲಿಂದ ಈ ಹಣ ಬರುತ್ತಿದೆ? ಎಂದು ಪ್ರಶ್ನಿಸಿದ್ದರು. ಸತ್ಯಾಂಶ ಏನು ಎಂದರೆ ಎಲ್ಲ ಹಣ ಕೇಂದ್ರ ಸರ್ಕಾರ, ಗುಜರಾತ್ ಗೆ ಸೇರಿದ್ದು, ರಾಜ್ಯ ಸರ್ಕಾರ ಎಲ್ಲದಕ್ಕೂ ಅನುಮೋದನೆ ನೀಡಿದೆ.

ಮೋಟೆರಾ ಸ್ಟೇಡಿಯಂ ಬಾಡಿಗೆ ಪಡೆಯಲಾಗಿದೆ. ದೇಶದ ವಿವಿಧಡೆಗಳಿಂದ ಕಲಾವಿದರು ಆಗಮಿಸುತ್ತಿದ್ದಾರೆ. ಇದು ಸಮಿತಿ ನಿಯಂತ್ರಣದಲ್ಲಿಲ್ಲ. ಅಹಮದಾಬಾದ್ ಮುನಿಸಿಪಲ್ ಕಾರ್ಪೋರೇಷನ್ ಗೆ ವಿಶೇಷ ಅನುದಾನ ನೀಡಲಾಗಿದೆ. ನಾವು ಈ ಬಗ್ಗೆ ತಲೆಕೆಡಿಸಿಕೊಂಡಿಲ್ಲ ಆದರೆ ಸರ್ಕಾರ ಸುಳ್ಳು ಹೇಳಬಾರದು ಎಂದು ಅವರು ಹೇಳಿದ್ದರು.