ಐಐಟಿ ಜೋಧಪುರದಲ್ಲಿ ಮತ್ತೆ 29 ಮಂದಿಗೆ ಪಾಸಿಟಿವ್, ಕ್ಯಾಂಪಸ್‌ನ ಸೋಂಕಿತರ ಸಂಖ್ಯೆ 225ಕ್ಕೆ ಏರಿಕೆ

ಜೋಧ್‌ಪುರ: ಐಐಟಿ ಜೋಧ್‌ಪುರದ 25 ವಿದ್ಯಾರ್ಥಿಗಳು ಸೇರಿದಂತೆ ಮತ್ತೆ 29 ಮಂದಿಗೆ ಕೊರೋನಾ ಪಾಸಿಟಿವ್ ದೃಢಪಟ್ಟಿದ್ದು, ಕ್ಯಾಂಪಸ್‌ನಲ್ಲಿ ಸೋಂಕಿತರ ಸಂಖ್ಯೆ 225 ಕ್ಕೆ ಏರಿಕೆಯಾಗಿದೆ ಎಂದು ಅಧಿಕಾರಿಗಳು ಮಂಗಳವಾರ ತಿಳಿಸಿದ್ದಾರೆ.

ಕ್ಯಾಂಪಸ್ ನ ಪ್ರತಿ ನಿವಾಸಿಯನ್ನು ಕೋವಿಡ್ ಪರೀಕ್ಷೆಗೆ ಒಳಪಡಿಸುವ ಬೃಹತ್ ಅಭಿಯಾನ ಆರಂಭಿಸಿದ ನಂತರ ಸಂಸ್ಥೆಯಲ್ಲಿ 29 ಹೊಸಪಾಸಿಟಿವ್ ಪ್ರಕರಣಗಳು ವರದಿಯಾಗಿವೆ ಎಂದು ಸಂಸ್ಥೆಯ ವಕ್ತಾರ ಮತ್ತು ಉಪ ನೋಂದಣಾಧಿಕಾರಿ ಅಮರದೀಪ್ ಶರ್ಮಾ ಹೇಳಿದ್ದಾರೆ.

"ಮೇ 7 ರಂದು ಈ 25 ವಿದ್ಯಾರ್ಥಿಗಳು ಮತ್ತು ನಾಲ್ವರು ಸಿಬ್ಬಂದಿಯ ಸ್ವ್ಯಾಬ್ ಮಾದರಿ ಸಂಗ್ರಹಿಸಲಾಗಿತ್ತು. ಅವರ ವರದಿ ಪಾಸಿಟಿವ್ ಬಂದಿದೆ" ಎಂದು ಅವರು ಹೇಳಿದರು.

ತ್ರೈಮಾಸಿಕದ ಕೊನೆಯ ಸೆಮಿಸ್ಟರ್ ಮೇ 7 ರಂದು ಕೊನೆಗೊಂಡಿದ್ದು, ಕೋರ್ಸ್‌ಗಳು ಪೂರ್ಣಗೊಂಡಿರುವುದರಿಂದ ಈಗ ಆನ್‌ಲೈನ್‌ನಲ್ಲಿ ಚಟುವಟಿಕೆಗಳು ನಡೆಯುತ್ತಿವೆ ಎಂದು ಅವರು ತಿಳಿಸಿದ್ದಾರೆ.