ಕುಂದುಕೊರತೆ ನೋಂದಾಯಿಸಲು ಮೂರು ಅಧಿಕೃತ ಇ-ಮೇಲ್ ಐಡಿ ನೀಡಿದ ಆದಾಯ ತೆರಿಗೆ ಇಲಾಖೆ

ನವದೆಹಲಿ: ಇ-ಮೌಲ್ಯಮಾಪನ ಯೋಜನೆಯಡಿ ಕುಂದುಕೊರತೆಗಳನ್ನು ನೋಂದಾಯಿಸಲು ಆದಾಯ ತೆರಿಗೆ (ಐ-ಟಿ) ಇಲಾಖೆ ಶನಿವಾರ ಮೂರು ಅಧಿಕೃತ ಇಮೇಲ್ ಐಡಿಗಳನ್ನು ನೀಡಿದೆ.

ಈ ಕುರಿತಂತೆ ಐಟಿ ಇಲಾಖೆ ತನ್ನ ಅಧಿಕೃತ ಟ್ವಿಟರ್ ಖಾತೆಯಲ್ಲಿ ಮಾಹಿತಿ ನೀಡಿದ್ದು, ತೆರಿಗೆದಾರರ ಚಾರ್ಟರ್‌ಗೆ ಅನುಗುಣವಾಗಿ ತೆರಿಗೆದಾರರ ಸೇವೆಗಳನ್ನು ಮತ್ತಷ್ಟು ಸುಧಾರಿಸುವ ಉದ್ದೇಶದಿಂದ, ಆದಾಯ ತೆರಿಗೆ ಇಲಾಖೆಯು ಬಾಕಿ ಇರುವ ಪ್ರಕರಣಗಳಿಗೆ ಸಂಬಂಧಿಸಿದಂತೆ ದೂರುಗಳನ್ನು ದಾಖಲಿಸಲು ಮೀಸಲಾದ ಇ-ಮೇಲ್ ಐಡಿಗಳನ್ನು ರಚಿಸಲಾಗಿದೆ ಎಂದು ಮಾಹಿತಿ ನೀಡಿದೆ.

samadhan.faceless.assessment@incometax.gov.in; samadhan.faceless.penalty@incometax.gov.in; ಮತ್ತು samadhan.faceless.appeal@incometax.gov.in ಎಂಬ ಈ ಮೂರು ಪ್ರತ್ಯೇಕ ಇಮೇಲ್ ಐಡಿಗಳ  ಮೂಲಕ ಕುಂದುಕೊರತೆಗಳನ್ನು ಸಲ್ಲಿಕೆ ಮಾಡಬಹುದು. 

ಏನಿದು ಫೇಸ್ ಲೆಸ್ ವ್ಯವಸ್ಥೆ
ತೆರಿಗೆದಾರರು ಅಥವಾ ಮೌಲ್ಯಮಾಪಕರು ಆದಾಯ ತೆರಿಗೆ-ಸಂಬಂಧಿತ ವ್ಯವಹಾರಗಳಿಗಾಗಿ ಐ-ಟಿ ಇಲಾಖಾ ಕಚೇರಿಗೆ ಭೇಟಿ ನೀಡುವ ಅಥವಾ ಇಲಾಖೆಯ ಅಧಿಕಾರಿಯನ್ನು ಮುಖತಃ ಭೇಟಿ ಮಾಡುವ ಅಗತ್ಯವಿಲ್ಲ ಇದಕ್ಕೆ ಫೇಸ್ ಲೆಸ್ ವ್ಯವಸ್ಥೆ ಎನ್ನಲಾಗುತ್ತದೆ. 

ಕೇಂದ್ರ ಎಲೆಕ್ಟ್ರಾನಿಕ್-ಆಧಾರಿತ ವ್ಯವಸ್ಥೆಯು ಅಪಾಯದ ನಿಯತಾಂಕಗಳು ಮತ್ತು ಹೊಂದಾಣಿಕೆಯಿಲ್ಲದ ಆಧಾರದ ಮೇಲೆ ಪರಿಶೀಲನೆಗಾಗಿ ತೆರಿಗೆ ಪಾವತಿಯನ್ನು ತೆಗೆದುಕೊಳ್ಳುತ್ತದೆ ಮತ್ತು ನಂತರ ಅವುಗಳನ್ನು ಯಾವುದೇ ನಗರದಲ್ಲಿ ಐಟಿ ಅಧಿಕಾರಿಗಳ ತಂಡಕ್ಕೆ ಯಾದೃಚ್ಛಿಕವಾಗಿ ಹಂಚುತ್ತದೆ. ಈ ಅಧಿಕಾರಿಗಳ ಪರಿಶೀಲನೆಯನ್ನು ಮತ್ತೊಂದು ಯಾದೃಚ್ಛಿಕವಾಗಿ ಆಯ್ಕೆ ಮಾಡಿದ ಸ್ಥಳದಲ್ಲಿ ಅಧಿಕಾರಿಗಳು ಪರಿಶೀಲಿಸುತ್ತಾರೆ ಎಂದು ಹೇಳಲಾಗಿದೆ.

ಈ ಫೇಸ್ ಲೆಸ್ ವ್ಯವಸ್ಥೆಯನ್ನು ಕೇಂದ್ರ ಸರ್ಕಾರವು 2019 ರಲ್ಲಿ ಆರಂಭಿಸಿತು.