ಜಾರ್ಖಂಡ್‌ನಲ್ಲಿ ಐವರು ನಕ್ಸಲೀಯರ ಬಂಧನ: ಅಮೆರಿಕ ನಿರ್ಮಿತ M1 ರೈಫಲ್ ಸೇರಿ 5 ಬಂದೂಕುಗಳ ವಶ

ಚತ್ರಾ(ಜಾರ್ಖಂಡ್): ಜಾರ್ಖಂಡ್‌ನ ಚತ್ರಾ ಜಿಲ್ಲೆಯಲ್ಲಿ ಇಬ್ಬರು ಸ್ವಯಂ-ಘೋಷಿತ ಉಪ ವಲಯ ಕಮಾಂಡರ್‌ಗಳು ಸೇರಿದಂತೆ ನಿಷೇಧಿತ ನಕ್ಸಲೀಯ ಸಂಘಟನೆ ಟಿಎಸ್‌ಪಿಸಿಯ ಐವರು ಉಗ್ರರನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.

ಬಂಧಿತರಿಂದ ಅಮೆರಿಕನ್ ನಿರ್ಮಿತ ರೈಫಲ್‌ಗಳು, ಕಾರ್ಟ್ರಿಡ್ಜ್‌ಗಳು ಮತ್ತು ಸಂಘಟನೆಯ ಕರಪತ್ರಗಳು ಸೇರಿದಂತೆ ಹಲವಾರು ಬಂದೂಕುಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಸಿದಾಳು-ಸತ್ಪಹಾರಿ ಬೆಟ್ಟದಲ್ಲಿ ನಿಷೇಧಿತ ಸಂಘಟನೆಯ 10 ಮಂದಿ ಇರುವ ಬಗ್ಗೆ ಮಾಹಿತಿ ಲಭಿಸಿತ್ತು ಎಂದು ಛತ್ರದ ಪೊಲೀಸ್ ವರಿಷ್ಠಾಧಿಕಾರಿ (ಎಸ್ಪಿ) ರಾಕೇಶ್ ರಂಜನ್ ಸುದ್ದಿಗಾರರಿಗೆ ತಿಳಿಸಿದ್ದಾರೆ. ಇದರ ಆಧಾರದ ಮೇಲೆ ಪೊಲೀಸರು ದಾಳಿ ನಡೆಸಿ ಐವರು ನಕ್ಸಲೀಯರನ್ನು ಬಂಧಿಸಿದ್ದಾರೆ ಎಂದು ಹೇಳಿದರು.

ಇದನ್ನೂ ಓದಿ: ಭಾರತೀಯರನ್ನು ಕರೆತರಲು ಯುದ್ಧ ಗ್ರಸ್ಥ ಇಸ್ರೇಲ್ ಗೆ ಏರ್ ಇಂಡಿಯಾ, ಸ್ಪೈಸ್‌ಜೆಟ್ ಹಾರಾಟ!

ಬಂಧಿತ ಮಾವೋವಾದಿಗಳಲ್ಲಿ ಟಿಎಸ್‌ಪಿಸಿ ಉಪ ವಲಯ ಕಮಾಂಡರ್ ಪ್ರಭಾತ್ ಅಲಿಯಾಸ್ ಪ್ರೇಮ್ ಕುಮಾರ್ ಗಂಜು ಮತ್ತು ವಿಷು ಗಂಜು ಅಲಿಯಾಸ್ ಅಶೋಕ್ ಗಂಜು ಸೇರಿದ್ದಾರೆ ಎಂದು ಅವರು ಹೇಳಿದರು. ಪ್ರಭಾತ್ 14 ಪ್ರಕರಣಗಳಲ್ಲಿ ಬೇಕಾಗಿದ್ದರೆ ವಿಷು 11 ವಿವಿಧ ಪ್ರಕರಣಗಳಲ್ಲಿ ಬೇಕಾಗಿದ್ದಾನೆ ಎಂದು ಅಧಿಕಾರಿ ಹೇಳಿದರು.

ಇದಲ್ಲದೇ ಸಂಘಟನೆಯ ಇತರ ಮೂವರನ್ನು ಅರುಣ್ ಪ್ರಜಾಪತಿ, ನರೇಶ್ ಕುಮಾರ್ ಭೋಕ್ತ ಮತ್ತು ಜಿತೇಂದ್ರ ಕುಮಾರ್ ರಜಾಕ್ ಎಂದು ಗುರುತಿಸಲಾಗಿದೆ ಎಂದು ಹೇಳಿದರು.

ಬಂಧಿತರಿಂದ ಒಂದು ಎಕೆ-56 ರೈಫಲ್, ಒಂದು ಅರೆ-ಸ್ವಯಂಚಾಲಿತ ಎಸ್‌ಎಲ್‌ಆರ್ ರೈಫಲ್, ಒಂದು ಅಮೆರಿಕನ್ ನಿರ್ಮಿತ ಎಂ1 ರೈಫಲ್, ಒಂದು .315 ಬೋಲ್ಟ್ ರೈಫಲ್, ಎರಡು ದೇಶ ನಿರ್ಮಿತ ಪಿಸ್ತೂಲ್‌ಗಳು, 275 ಕಾರ್ಟ್ರಿಡ್ಜ್‌ಗಳು ಮತ್ತು ಸಂಘಟನೆಯ 80 ಕರಪತ್ರಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಪೊಲೀಸರು ಹೊರಡಿಸಿದ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.