ಮಣಿಪುರದಲ್ಲಿ 16 ಉಗ್ರರ ಬಂಧನ, ಶಸ್ತ್ರಾಸ್ತ್ರ ವಶ

ಇಂಫಾಲ್: ಮಣಿಪುರದಲ್ಲಿ ಕಳೆದ 48 ಗಂಟೆಗಳಲ್ಲಿ ಹಲವಾರು ನಿಷೇಧಿತ ಸಂಘಟನೆಗಳ ಒಟ್ಟು 16 ಉಗ್ರರನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ಭಾನುವಾರ ತಿಳಿಸಿದ್ದಾರೆ.

ನಿಷೇಧಿತ ಯುನೈಟೆಡ್ ನ್ಯಾಷನಲ್ ಲಿಬರೇಶನ್ ಫ್ರಂಟ್(ಪಂಬೈ)ನ ಇಬ್ಬರು ಕಾರ್ಯಕರ್ತರನ್ನು ಇಂಫಾಲ್ ಪೂರ್ವ ಜಿಲ್ಲೆಯ ನೊಂಗ್‌ಡ್ಯಾಮ್ ಗ್ರಾಮದ ಬಳಿಯ ನಾಪೆಟ್‌ಪಲ್ಲಿ ಆಂಡ್ರೊ ರಸ್ತೆಯಲ್ಲಿ ಶನಿವಾರ ಬಂಧಿಸಲಾಗಿದೆ.

ಬಂಧಿತ ಉಗ್ರರು ಸುಲಿಗೆಯಲ್ಲಿ ಭಾಗಿಯಾಗಿದ್ದಾರೆಂದು ಆರೋಪಿಸಲಾಗಿದೆ ಎಂದು ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಬಿಷ್ಣುಪುರ ಜಿಲ್ಲೆಯ ನಿಂಗ್‌ಥೌಖೋಂಗ್ ವಾರ್ಡ್ ಸಂಖ್ಯೆ 13 ರಿಂದ ನಿಷೇಧಿತ ಕಾಂಗ್ಲೀಪಾಕ್ ಕಮ್ಯುನಿಸ್ಟ್ ಪಕ್ಷದ (ತೈಬಂಗನ್ಬಾ) ಒಬ್ಬ ಸದಸ್ಯನನ್ನು ಭದ್ರತಾ ಪಡೆಗಳು ಶುಕ್ರವಾರ ಬಂಧಿಸಿವೆ ಎಂದು ಅವರು ಹೇಳಿದ್ದಾರೆ.

ಇಂಫಾಲ್ ಪಶ್ಚಿಮ ಜಿಲ್ಲೆಯ ಸಲಾಮ್ ಮಾಮಾಂಗ್ ಲೀಕೈ ಕೇತುಕಿ ಲ್ಯಾಂಪಕ್‌ನಿಂದ ನಿಷೇಧಿತ ಕೆಸಿಪಿ(ಎಂಎಫ್‌ಎಲ್)ನ ಇಬ್ಬರು ಸದಸ್ಯರನ್ನು ಅದೇ ದಿನ ಬಂಧಿಸಲಾಗಿದೆ. ಅವರು ಸಹ ಸುಲಿಗೆಯಲ್ಲಿ ಭಾಗಿಯಾಗಿದ್ದಾರೆ ಎಂದು ಆರೋಪಿಸಲಾಗಿದೆ.

ರಾಜ್ಯ ಪೊಲೀಸರು ಶುಕ್ರವಾರ ಇಂಫಾಲ್ ಪೂರ್ವ ಜಿಲ್ಲೆಯ ಕ್ಯಾಮ್‌ಗೆಯ್ ಹೈಬಾಂಗ್ ಮಖೋಂಗ್ ಪ್ರದೇಶದಿಂದ ನಿಷೇಧಿತ ಪ್ರೆಪಾಕ್(ಪಿಆರ್‌ಒ)ನ ಒಬ್ಬ ಕಾರ್ಯಕರ್ತನನ್ನು ಬಂಧಿಸಿದ್ದಾರೆ ಎಂದು ಅವರು ಹೇಳಿದ್ದಾರೆ.