ನವೆಂಬರ್ 8 ಕ್ಕೆ ನಿತೀಶ್ ರಾಜೀನಾಮೆ ನಿಶ್ಚಿತ: ಅಮಿತ್ ಶಾ

ಪಾಟ್ನ: ಬಿಹಾರದಲ್ಲಿ ಬಿಜೆಪಿ ನೇತೃತ್ವದ ಎನ್.ಡಿ.ಎ ಮೈತ್ರಿಕೂಟಕ್ಕೆ ಬಹುಮತ ಸಿಗಲಿದ್ದು, ಮುಖ್ಯಮಂತ್ರಿ ನಿತೀಶ್ ಕುಮಾರ್ ಮುಖ್ಯಮಂತ್ರಿ ಪದವಿಯಿಂದ ಕೆಳಗಿಳಿಯಲಿದ್ದಾರೆ ಎಂದು ಬಿಜೆಪಿ ರಾಷ್ಟ್ರಾಧ್ಯಕ್ಷ ಅಮಿತ್ ಶಾ ಹೇಳಿದ್ದಾರೆ. 
ನವೆಂಬರ್ 8 ರಂದು ಬಿಜೆಪಿಗೆ ಬಿಹಾರದ ವಿಧಾನಸಭೆಯಲ್ಲಿ ಬಹುಮತ ದೊರೆಯಲಿದ್ದು, ನಿತೀಶ್ ಕುಮಾರ್ ಸಿಎಂ ಸ್ಥಾನದಿಂದ ಕೆಳಗಿಳಿಯುವುದು ನಿಶ್ಚಿತ ಎಂದಿದ್ದಾರೆ. ಬಿಹಾರದ ಜನತೆ ಎಲ್ಲರಿಗೂ ಅವಕಾಶ ನೀಡಿದ್ದಾರೆ, ಈ ಬಾರಿ ಬಿಜೆಪಿಗೂ ಅವಕಾಶ ನೀಡಬೇಕಿದೆ ಎಂದು ಕರೆ ನೀಡಿದ್ದಾರೆ.  
ಬಿಹಾರದ ಸರಣ್ ಜಿಲ್ಲೆಯ ಮೈದಾನದಲ್ಲಿ ಚುನಾವಣಾ ಪ್ರಚಾರ ಕೈಗೊಂಡು ಮಾತನಾಡಿದ ಅಮಿತ್ ಶಾ, ಲಾಲೂ ಪ್ರಸಾದ್ ತಾಂತ್ರಿಕ್,  ಮಾಟ-ಮಂತ್ರದ ಮಾತ್ರ ಮಾತನಾಡುತ್ತಿದ್ದಾರೆ ಅಭಿವೃದ್ಧಿ ಬಗ್ಗೆ ಮಾತನಾಡುತ್ತಿಲ್ಲ. ಲಾಲೂ ಪ್ರಸಾದ್ ನಿತೀಶ್ ಕುಮಾರ್ ಬಿಹಾರವನ್ನು ಅಭಿವೃದ್ಧಿ ಮಾಡಲಿದ್ದಾರೆ ಎಂದು ಶಾ ಪ್ರಶ್ನಿಸಿದ್ದಾರೆ.
"ಬಿಜೆಪಿ ದಲಿತ, ಹಿಂದುಳಿದ ವರ್ಗಗಳಿಗೆ ನೀಡಲಾಗುತ್ತಿರುವ ಮೀಸಲಾತಿ ವಿರುದ್ಧ ಇಲ್ಲ. ಬಿಹಾರ ಅಭಿವೃದ್ಧಿ ಹೊಂದದೇ 25 ವರ್ಷಗಳ ಹಿಂದೆಯೇ ಉಳಿದುಕೊಂಡಿದೆ. ಬಿಜೆಪಿ ಅಧಿಕಾರಕ್ಕೆ ಬಂದರೆ ಬಿಹಾರದ ಅಭಿವೃದ್ಧಿಯಾಗಲಿದೆ. ಲಾಲೂ ಪ್ರಸಾದ್ ಹಾಗೂ ನಿತೀಶ್ ಕುಮಾರ್ ಚುನಾವಣಾ ಪ್ರಚಾರದಲ್ಲಿ ಅಭಿವೃದ್ಧಿ ಕಾರ್ಯಸೂಚಿಯನ್ನು ಬದಿಗಿರಿಸಿದ್ದಾರೆ ಎಂದು ಶಾ ಆರೋಪಿಸಿದ್ದಾರೆ.