ನವದೆಹಲಿ: ಭಾರತದ ಮಾರುಕಟ್ಟೆಗೆ ಗೂಗಲ್ ತನ್ನ ಅಗ್ಗದ ಸ್ಮಾರ್ಟ್‌ಫೋನ್ ಸರಣಿಯ ಮೊದಲನೆಯ ಆಂಡ್ರಾಯ್ಡ್ ಒನ್ ಅನ್ನು ಸೋಮವಾರ ಬಿಡುಗಡೆ ಮಾಡಿದ್ದು, ಆಂಡ್ರಾಯ್ಡ್ ಒನ್ ಫೋನ್‌ 6,399 ರು.ಗಳಿಗೆ ದೊರೆಯಲಿದೆ.
ಸ್ವದೇಶಿ ಮೊಬೈಲ್ ತಯಾರಕರಾದ ಸ್ಪೈಸ್, ಮೈಕ್ರೋಮ್ಯಾಕ್ಸ್ ಮತ್ತು ಕಾರ್ಬನ್ ಕಂಪನಿಗಳ ಸಹಯೋಗದೊಂದಿಗೆ ಗೂಗಲ್ ಈ ಸಾಧನಗಳನ್ನು ಬಿಡುಗಡೆ ಮಾಡಿದ್ದು, ಸದ್ಯ ಆನ್‌ಲೈನ್‌ನಲ್ಲಿ ಈ ಸಾಧನಗಳು ಲಭ್ಯವಿದೆ.
ಆನ್‌ಲೈನ್ ಮಾರಾಟ ತಾಣಗಳಾದ ಫ್ಲಿಪ್‌ಕಾರ್ಟ್, ಅಮೆಜಾನ್ ಮತ್ತು ಸ್ನಾಪ್‌ಡೀಲ್ ಹಾಗೂ ರಿಲಯನ್ಸ್ ಡಿಜಿಟಲ್, ಕ್ರೋಮಾ ಮತ್ತು ದಿ ಮೊಬೈಲ್ ಸ್ಟೋರ್ ಮಳಿಗೆಗಳ ಮೂಲಕ ಆಂಡ್ರಾಯ್ಡ್ ಒನ್ ಸ್ಮಾರ್ಟ್‌ಫೋನ್‌ಗಳು ಮಾರಾಟವಾಗುತ್ತಿವೆ.
'ಆಂಡ್ರಾಯ್ಡ್ ಒನ್' ಯೋಜನೆ ಮೂಲಕ ಸ್ಥಳೀಯ ಮೊಬೈಲ್ ಉತ್ಪಾದಕ ಕಂಪನಿಗಳ ಜತೆಗೂಡಿ ಅಗ್ಗದ ಬೆಲೆಗೆ ಉತ್ತಮ ಗುಣಮಟ್ಟದ ಸ್ಮಾರ್ಟ್‌ಫೋನ್‌ಗಳನ್ನು ಗೂಗಲ್ ಮಾರುಕಟ್ಟೆಗೆ ತಂದಿದೆ. ಗೂಗಲ್ ತನ್ನ ಪಾಲುದಾರ ಕಂಪನಿಗಳಿಗೆ ಹಾರ್ಡ್‌ವೇರ್‌ ರೆಫರೆನ್ಸ್‌ ಬೋರ್ಡ್‌ಗಳು ಮತ್ತು ಸಾಫ್ಟ್‌ವೇರ್‌ ಬೆಂಬಲ ನೀಡುತ್ತದೆ.
