ಸಿ ಇ ಆರ್ ಎನ್ ವಿಜ್ಞಾನ ಪ್ರಯೋಗಾಲಯದ ಸಹ ಸದಸ್ಯನಾಗಲಿರುವ ಭಾರತ

ಕೋಲ್ಕತ್ತಾ: 'ಪಾರ್ಟಿಕಲ್ ಫಿಸಿಕ್ಸ್' (ಕಣ ಭೌತಶಾಸ್ತ್ರ)ನ ಅತಿ ದೊಡ್ಡ ಪ್ರಯೋಗಾಲಯ ಸಿ ಇ ಆರ್ ಎನ್ ನ ಸಹ ಸದಸ್ಯನಾಗಿ ಭಾರತ ಮುಂದಿನ ಕೆಲವು ತಿಂಗಳುಗಳಲ್ಲಿ ಸೇರಿಕೊಳ್ಳಲಿದೆ ಎಂದು ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆ (ಡಿ ಎಸ್ ಟಿ) ಅಧಿಕಾರಿ ಮಂಗಳವಾರ ತಿಳಿಸಿದ್ದಾರೆ. 

"ಸಹ ಸದಸ್ಯತ್ವಕ್ಕಾಗಿ ಭಾರತ ಸಲ್ಲಿಸಿದ ಅರ್ಜಿಯನ್ನು ಸೆಪ್ಟೆಂಬರ್ ನಲ್ಲಿ ಸಿ ಇ ಆರ್ ಎನ್ ಮಂಡಳಿ ಅನುಮೋದಿಸಿದೆ ಮತ್ತು ಈಗ ಎಲ್ಲ ಒಪ್ಪಂದ ಮತ್ತು ಸಹಿ ಮಾಡುವ ಪ್ರಕ್ರಿಯೆ ಸಂಪೂರ್ಣಗೊಂಡ ಮೇಲೆ ಭಾರತ ಸಿ ಇ ಆರ್ ಎನ್ ನ ಸಹ ಸದ್ಯಸ್ಯನಾಗಲಿದೆ" ಎಂದು ಡಿ ಎಸ್ ಟಿ ಅಧಿಕಾರಿ ಹೇಳಿದ್ದಾರೆ. 

ಮುಂದಿನ ಕೆಲವು ತಿಂಗಳುಗಳಲ್ಲಿ ಈ ಪ್ರಕ್ರಿಯೆ ಸಂಪೂರ್ಣಗೊಳ್ಳಲಿದೆ ಎಂದು ಅವರು ಹೇಳಿದ್ದಾರೆ. 

ಈ ಬೆಳವಣಿಗೆಯ ಬಗ್ಗೆ ಕೇಂದ್ರ ವಿಜ್ಞಾನ ಮತ್ತು ತಂತ್ರಜ್ಞಾನ ಸಚಿವ ಹರ್ಷವರ್ಷನ್ ಕೂಡ ಟ್ವೀಟ್ ಮಾಡಿದ್ದರು. 

ಸ್ವಿಟ್ಸರ್ ಲ್ಯಾಂಡ್ ನಲ್ಲಿರುವ ಈ ಪ್ರಖ್ಯಾತ ಸಿ ಇ ಆರ್ ಎನ್ ಪ್ರಯೋಗಾಲಯದಲ್ಲಿ ಇತ್ತೀಚಿಗೆ ಹಿಗ್ಸ್ ಬೊಸೊನ್ ಕಣ (ದೇವಾ ಕಣ) ಸಂಶೋಧನೆ ಮಾಡಿದ್ದು ಭಾರಿ ಸುದ್ದಿಯಾಗಿತ್ತು. 

ಸಹ ಸದಸ್ಯನಾದ ನಂತರ ಈ ಪ್ರಯೋಗಾಲಯದ ಹಲವು ಸಭೆಗಳು ಮತ್ತು ಕಾರ್ಯಕ್ರಮಗಳಲ್ಲಿ ಭಾಗಿಯಾವಾಗುವ ಸವಲತ್ತು ಭಾರತಕ್ಕೆ ಸಿಗುತ್ತದೆ.