ಮುಂಬೈ: ಕಳೆದ ಬಾರಿಯ ವಿಶ್ವಕಪ್ ಹೀರೋ ಯುವರಾಜ್ ಅಂದಿನ ತಂಡದ ಪ್ರಮುಖ ಆಟಗಾರರಾದ ಗೌತಮ್ ಗಂಭೀರ್, ವೀರೇಂದ್ರ ಸೆಹ್ವಾಗ್, ಹರ್ಭಜನ್ ಸಿಂಗ್, ಜಹೀರ್ ಖಾನ್ ಅವರ ಕ್ರಿಕೆಟ್ ಭವಿಷ್ಯ ಇನ್ನು ಮುಗಿದಂತೆ.
2015ರ ವಿಶ್ವಕಪ್‌ಗಾಗಿ 30 ಸಂಭವನೀಯರ ಪಟ್ಟಿಯನ್ನು ಗುರುವಾರ ಬಿಡುಗಡೆ ಮಾಡಿದ್ದು ಈ ಯಾವ ಹಿರಿಯ ಆಟಗಾರರಿಗೂ ಅದರಲ್ಲಿ ಸ್ಥಾನ ಸಿಕ್ಕಿಲ್ಲ.
ಖುಷಿಯ ವಿಚಾರವೆಂದರೆ ರಾಜ್ಯದ ರಾಬಿನ್ ಉತ್ತಪ್ಪ, ಸ್ಟುವರ್ಟ್ ಬಿನ್ನಿ ಮತ್ತು ಮನೀಷ್ ಪಾಂಡೆ ಸಂಭಾವ್ಯರಲ್ಲಿ ಸ್ಥಾನ ಪಡೆದಿದ್ದಾರೆ.
ನಿಜವಾದ ಯುವಿ ಭವಿಷ್ಯ: ಇತ್ತೀಚೆಗಷ್ಟೇ ನನಗೆ ತಂಡದಲ್ಲಿ ಸ್ಥಾನ ಸಿಗದು ಎಂಬ ಯುವಿ ಭವಿಷ್ಯ ನಿಜವಾಗಿದೆ. ವಿಶ್ವಕಪ್‌ನಲ್ಲಿ ಆಡಲು ಮನಸ್ಸಿದೆ ಎಂದು ಹೇಳಿದ್ದ ವೀರೇಂದ್ರ ಸೆಹ್ವಾಗ್ ಆಶಯಕ್ಕೆ ಬಿಸಿಸಿಐ ತಣ್ಣೀರು ಹಾಕಿದೆ. ಹೀಗಾಗಿ ಕಳಪೆ ಫಾರ್ಮ್, ಗಾಯದ ಸಮಸ್ಯೆಯಿಂದಾಗಿ ವರ್ಷಗಟ್ಟಲೇ ತಂಡದಿಂದ ಹೊರಗುಳಿದಿದ್ದ ಇವರಿಗೆ ಇನ್ನು ಅಂತಾರಾಷ್ಟ್ರೀಯ ಕ್ರಿಕೆಟ್ ಜೀವನ ಸ್ಪಲ್ಪ ಕಷ್ಟವೇ. ನಾಯಕ ಧೋನಿ, ಕೊಹ್ಲಿ, ರೈನಾ ಮತ್ತು ಅಶ್ವಿನ್ ಇವರನ್ನು ಬಿಟ್ಟರೆ ಉಳಿದವರಿಗ್ಯಾರಿಗೂ ವಿಶ್ವಕಪ್‌ನಲ್ಲಿ ಆಡಿದ ಅನುಭವವೇ ಇಲ್ಲ. ಈ ಮೂಲಕ ಬಿಸಿಸಿಐ ಯುವ ತಂಡ ಕಟ್ಟಲು ಮುಂದಾಗಿದೆ.
