ನ್ಯೂಯಾರ್ಕ್: ಟೆನಿಸ್ ಲೋಕದ ಎಲ್ಲಾ ದಿಗ್ಗಜರೂ ರಸ್ತೆಯೊಂದರಲ್ಲಿ ಸಾರ್ವಜನಿಕರಿಗೆ ಒಟ್ಟಿಗೇ ಕಾಣಿಸಿಕೊಂಡರೆ ಹೇಗಿರುತ್ತೆ? ಮಲ್ಟಿಸ್ಟಾರ್ ಗಳ ಸಿನಿಮಾ ಇದ್ದಂತೆ ಇರುತ್ತೆ ಅಲ್ವಾ. ಆದರೆ, ಇದನ್ನು ಸಾಧ್ಯವಾಗಿಸಿದೆ ಖ್ಯಾತ ಕ್ರೀಡಾ ಸಾಮಗ್ರಿ ತಯಾರಿಕಾ ಸಂಸ್ಥೆ ನೈಕ್.
ಆಗಸ್ಟ್ 31ರಿಂದ ಆರಂಭಗೊಳ್ಳಲಿರುವ ಯುಎಸ್ ಓಪನ್ ಟೆನಿಸ್ ಟೂರ್ನಿಗಾಗಿ ನ್ಯೂಯಾರ್ಕ್ ಗೆ ಆಗಮಿಸಿರುವ ಎಲ್ಲಾ ಖ್ಯಾತ ದಿಗ್ಗಜರಿಂದ ಅಲ್ಲಿನ ಬೀದಿಯೊಂದರಲ್ಲಿ ಟೆನಿಸ್ ಆಡಿಸಿದೆ.
ಟೆನಿಸ್ ಕ್ರೀಡೆಯ ಜಾಗೃತಿಗಾಗಿ ತಾನು ಆರಂಭಿಸಿರುವ ಸ್ಟ್ರೀಟ್ ಟೆನಿಸ್ ಅಭಿಯಾನದ ಅಂಗವಾಗಿ ನಡೆದ ಈ ಪ್ರದರ್ಶನದಲ್ಲಿ ನಂಬರ್ ಒನ್ ಆಟಗಾರ್ತಿ ಸೆರೆನಾ ವಿಲಿಯಮ್ಸ್, ಮರಿಯಾ ಶರಪೋವಾ, ರೋಜರ್ ಫೆಡರರ್, ರಾಫೆಲ್ ನಡಾಲ್, ಯೂಜಿನಿ ಬುಚರ್ಡ್, ಮ್ಯಾಡಿಸನ್ ಕೀಸ್ ಹಾಗೂ ನಿಕ್ ಕಿಗ್ರಿಯೋಸ್ ಇದರಲ್ಲಿ ಭಾಗವಹಿಸಿದ್ದರು. ಇಷ್ಟು ಸಾಲದೆಂಬಂತೆ, ಈ ಆಟಗಾರರನ್ನು ಹುರಿದುಂಬಿಸಲು ಟೆನಿಸ್ ಲೋಕದ ದಂತಕತೆ ಎಂದೇ ಖ್ಯಾತರಾಗಿರುವ ಪೀಟ್ ಸಾಂಪ್ರಾಸ್, ಆ್ಯಂಡ್ರೆ ಅಗಾಸ್ಸಿ ಹಾಗೂ ಜಾನ್ ಮೆಕೆನ್ರೊ ಸಹ ಹಾಜರಿದ್ದರು. ಈ ಎಲ್ಲರೂ ಒಂದೇ ಫೋಟೋಕ್ಕೆ ಫೋಸು ನೀಡಿ ನೆರೆದಿದ್ದವರಲ್ಲಿ ರೋಮಾಂಚನ ತಂದರು.
1990ರಲ್ಲೂ ನೈಕ್ ಸಂಸ್ಥೆ, ಟೆನಿಸ್ ಆಟಗಾರರನ್ನಿಟ್ಟುಕೊಂಡು ಇಂಥದ್ದೊಂದು ಜಾಹೀರಾತು ತಯಾರಿಸಿತ್ತು.
Advertisement