ರಾಷ್ಟ್ರಗೀತೆ ವಿಡಿಯೋದಲ್ಲಿ ಸಚಿನ್, ಸಾನಿಯಾ, ಭುಟಿಯಾ

ನವದೆಹಲಿ: ಇದೇ ತಿಂಗಳು 26 ರಂದು 67 ನೇ ಗಣರಾಜ್ಯೋತ್ಸವ ಆಚರಿಸುತ್ತಿರುವ ಸಂದರ್ಭದಲ್ಲಿ ವಿಶೇಷ ರಾಷ್ಟ್ರಗೀತೆಯ ವಿಡಿಯೋ ನಿರ್ಮಿಸಲಾಗಿದ್ದು, ಈ ವಿಡಿಯೋದಲ್ಲಿ ಕ್ರೀಡಾ ತಾರೆಯರಾದ ಸಚಿನ್ ತೆಂಡೂಲ್ಕರ್, ಸಾನಿಯಾ ಮಿರ್ಜಾ ಹಾಗೂ ಬೈಚುಂಗ್ ಭುಟಿಯಾ  ಅವರು ಸಹ ಕಾಣಿಸಿಕೊಳ್ಳಲಿದ್ದಾರೆ.
ಭಾರತ ಹಾಗೂ ಮುಂಬೈನ ಮಾಜಿ ಸ್ಪಿನ್ನರ್ ನಿಲೇಸ್ ಕುಲಕರ್ಣಿ ಈ ವಿಡಿಯೋ ನಿರ್ಮಾಪಕರಾಗಿದ್ದು, ಇದು ಭಾರಿ ಖ್ಯಾತಿ ಗಳಿಸುವ ನಿರೀಕ್ಷೆ ಇದೆ ಎಂದು ಖಾಸಗಿ ಮಾಧ್ಯಮವೊಂದು ವರದಿ ಮಾಡಿದೆ. ಇದೇ ಮೊದಲ ಬಾರಿಗೆ ರಾಷ್ಟ್ರಗೀತೆಯಲ್ಲಿ ಕ್ರೀಡಾ ತಾರೆಗಳನ್ನು ಸೇರಿಸಿಕೊಳ್ಳಲಾಗುತ್ತಿದೆ. ರಾಷ್ಟ್ರಗೀತೆ ಹಾಡುವಾಗ ದೇಶವೇ ಒಗ್ಗೂಡುತ್ತದೆ. ದೇಶದ ಕೋಟ್ಯಾಂತರ ಜನರನ್ನು ಒಟ್ಟಿಗೆ ಸೇರಿಸಲು ಇದಕ್ಕಿಂತ ಉತ್ತಮ ಮಾರ್ಗ ಮತ್ತೊಂದಿಲ್ಲ. ಈ ಕಾರ್ಯ ಮಾಡುತ್ತಿರುವುದಕ್ಕೆ ಹೆಮ್ಮೆ ಇದೆ ಎಂದು ಕುಲಕರ್ಣಿ ತಿಳಿಸಿದ್ದಾರೆ.
ಈ ವಿಡಿಯೋವನ್ನು ಮುಂಬೈ ನಲ್ಲಿ ಚಿತ್ರೀಕರಿಸಲಾಗುತ್ತಿದ್ದು, ಅಭಿಜಿತ್ ಪಾಂಸೆ ನಿರ್ದೇಶಿಸಲಿದ್ದಾರೆ ಹಾಗೂ ಬಾಲಿವುಡ್ ಸಂಗೀತ ನಿರ್ದೇಶಕ ರಾಮ್ ಸಂಪತ್ ಸಂಗೀತ ಸಂಯೋಜಿಸಿದ್ದಾರೆ.