ಇಫೋ(ಮಲೇಷಿಯಾ) : ಮಲೇಷಿಯಾದಲ್ಲಿ ನಡೆಯುತ್ತಿರುವ ಸುಲ್ತಾನ್ ಅಜ್ಲಾನ್‌ ಶಾ ಕಪ್ ಹಾಕಿ ಸರಣಿಯಲ್ಲಿ ಭಾರತ ಇಂದು ತನ್ನ ಎರಡನೇ ಪಂದ್ಯವನ್ನಾಡಿತ್ತು. ಇಂಗ್ಲೆಂಡ್ ವಿರುದ್ಧ ನಡೆದ ಈ ಪಂದ್ಯದಲ್ಲಿ ಬಾರತ 1-1ರ ಗೋಲುಗಳ ಅಂತರದ ಡ್ರಾ ಸಾಧಿಸಿದೆ.
ಭಾರತದ ಪರ ಶೀಲಾನಂದ್ ಲಾಕ್ರಾ ಪಂದ್ಯದ 14ನೇ ನಿಮಿಷದಲ್ಲಿ ಗೋಲು ದಾಖಲಿಸಿದ್ದು ತಂಡಕ್ಕೆ ಮುನ್ನಡೆ ಒದಗಿಸಿಕೊಟ್ಟರು. ಆದರೆ ಆ ಬಳಿಕ ಒಟ್ಟು ಒಂಭತ್ತು ಪೆನಾಲ್ಟಿ ಕಾರ್ನರ್ ಅವಕಾಶ ಸಿಕ್ಕರೂ ನಮ್ಮವರು ಗೋಲು ಗಳಿಸುವಲ್ಲಿ ವಿಫಲರಾದರು.
ಆದರೆ ಪಂದ್ಯದ ಅಂತಿಮ ಕ್ವಾರ್ಟರ್ ನಲ್ಲಿ ಇಂಗ್ಲೆಂಡಿನ ಮಾರ್ಕ್ ಗ್ಲೆಗ್‌ಹಾರ್ನ್ಗೋಲು ಗಳಿಸಿಕೊಳ್ಳುವುದರೊಡನೆ ಎದುರಾಳಿ ತಂಡ ಸಮಬಲ ಸಾಧಿಸಲು ನೆರವಾದರು.
ಈ ಮೂಲಕ ಪಂದ್ಯವು ಡ್ರಾ ಆಗಿದ್ದು ಕ್ರೀಡಾಕೂಟದಲ್ಲಿ ಭಾರತ ಒಂದು ಅಂಕದೊಡನೆ ಅಂಕಪಟ್ಟಿಯಲ್ಲಿ ಖಾತೆ ತೆರೆದಿದೆ. ಇದಕ್ಕೂ ಹಿಂದಿನ ಪಂದ್ಯದಲ್ಲಿ ಭಾರತವು ವಿಶ್ವದ 2ನೇ ರಾರ‍ಯಂಕಿನ ಅರ್ಜೆಂಟೀನಾ ವಿರುದ್ಧ 2-3 ಗೋಲ್‌ ಗಳಿಂದ ಪರಾಭವ ಅನುಭವಿಸಿತ್ತು.
ಇನ್ನು ಭಾರತವು ತನ್ನ ಮೂರನೇ ಪಂದ್ಯದಲ್ಲಿ ವಿಶ್ವದ ಪ್ರಬಲ ತಂಡವಾದ ಆಸ್ಟ್ರೇಲಿಯಾವನ್ನು ಎದುರಿಸಲಿದೆ.
