ನವದೆಹಲಿ: ಇತ್ತೀಚಿಗಷ್ಟೆ ಒಲಿಂಪಿಕ್ಸ್ ಜಾವೆಲಿನ್ ಎಸೆತದಲ್ಲಿ ಚಿನ್ನದ ಪದಕ ಗೆದ್ದ ನೀರಜ್ ಚೋಪ್ರಾ ಅವರು ಹಳೆಯ ಸಂದರ್ಶನವೊಂದರಲ್ಲಿ ತಮ್ಮ ಉದ್ದಗೂದಲಿನ ಕುರಿತಾಗಿ ಮಾತನಾಡಿದ್ದ ವಿಡಿಯೊ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿ ಭಾರತೀಯರ ಮನಸೂರೆಗೊಂಡಿದೆ. ಆ ವಿಡಿಯೋದಲ್ಲಿ ನಿರೂಪಕ ನಿಮ್ಮ ಉದ್ದಗೂದಲಿನ ಹಿಂದಿನ ಪ್ರೇರಣೆ ನಟ ಶಾರುಖ್ ಖಾನ್ ಇಲ್ಲವೇ ಕ್ರಿಕೆಟಿಗ ಇಶಾಂತ್ ಶರ್ಮಾ, ಇಬ್ಬರಲ್ಲಿ ಒಬ್ಬರು ಅಲ್ಲವೇ ಎಂದು ಕೇಳುತ್ತಾನೆ. ಆಗ ನೀರಜ್ ಚೋಪ್ರಾ ಇಬ್ಬರೂ ಅಲ್ಲ ಎಂದು ಹೇಳಿ ನಿರೂಪಕನಲ್ಲಿ ಅಚ್ಚರಿ ಮೂಡಿಸುತ್ತಾರೆ.
ನಂತರ ಮುಂದುವರಿದು, ನಾನು ಇನ್ನೊಬ್ಬರನ್ನು ಅನುಸರಿಸಿ ಉದ್ದಗೂದಲನ್ನು ಬಿಟ್ಟಿಲ್ಲ, ಉದ್ದಗೂದಲು ಬಿಡಬೇಕು ಎಂದು ನನಗೇ ಅನ್ನಿಸಿತು. ಹೀಗಾಗಿ ಬಿಟ್ಟಿದ್ದೇನೆ ಅಷ್ಟೆ. ಯಾರನ್ನೂ ನಕಲು ಮಾಡಿಲ್ಲ ಎಂದು 23ರ ಹರೆಯದ ಚೋಪ್ರಾ ಹೇಳಿದ್ದಾರೆ.
ಇದೇ ಸಂದರ್ಶನದಲ್ಲಿ ಚೋಪ್ರಾ ಒಂದು ಕಾಲದಲ್ಲಿ ಜಾವೆಲಿನ್ ಎಂದರೆ ಏನೆಂದೇ ಗೊತ್ತಿರಲಿಲ್ಲ. ಆದರೆ ಇಂದು ಅದರಿಂದಾಗಿಯೇ ನಿಮ್ಮ ಮುಂದೆ ನಿಂತಿದ್ದೇನೆ ಎಂದು ಹೇಳಿ ಅಚ್ಚರಿ ಮೂಡಿಸಿದ್ದಾರೆ.
ಹಳ್ಳಿಯ ಮೈದಾನದಲ್ಲಿ ದೊಡ್ಡ ಹುಡುಗರು ಜಾವೆಲಿನ್ ಎಸೆತ ಮಾಡುತ್ತಿದ್ದುದನ್ನು ನೋಡಿ ಆದರಿಂದ ಮೊದಲು ಆಕರ್ಷಿತರಾಗಿದ್ದಾಗಿ ನೀರಜ್ ಇದೇ ಸಂದರ್ಭದಲ್ಲಿ ಹೇಳಿದ್ದಾರೆ.
Advertisement