ಕನ್ನಡ ಗಣಕ ಪರಿಷತ್ ಅಭಿವೃದ್ಧಿಪಡಿಸಿದ್ದ 'ನುಡಿ' ಲಿಪಿ ಈಗ ಹೊಸ ರೂಪ ತಳೆದಿದೆ. ಇತ್ತೀಚೆಗೆ ಕನ್ನಡ ಅಭಿವೃದ್ಧಿ ಪ್ರಾಧಿಕಾರ 'ನುಡಿ- 5.0' ಕೊಡುಗೆ ನೀಡುವ ಮೂಲಕ ಹೊಸ ಫಾಂಟ್‌ಗಳನ್ನು ಗಣಕದ ಕಿಟಕಿಯೊಳಗೆ ತೂರಿಸಿದೆ. ಇದರಿಂದ ಆನ್‌ಲೈನ್‌ನಲ್ಲಿ ಕನ್ನಡದ ಬಳಕೆ ಇನ್ನಷ್ಟು ಸುಲಭವಾಗಿದೆ. ಸುಲಭವಾಗಿ ಯುನಿಕೋಡ್‌ಗೆ ಮಾರ್ಪಡಿಸಬಲ್ಲಂಥ, ಮೊಬೈಲಿನಲ್ಲಿ ಸರಾಗವಾಗಿ ಓದಬಲ್ಲಂಥ 11 ಹೊಸಫಾಂಟ್‌ಗಳನ್ನು ನುಡಿ- 5.0 ಹೊಂದಿದೆ. ಅಲ್ಲದೆ, ಕೆಲವು ವೆಬ್‌ಸೈಟ್‌ಗಳು- ಬ್ಲಾಗ್‌ಗಳು ಹಳೇ ಫಾಂಟ್‌ಗಳನ್ನೇ ಬಳಸುತ್ತಿವೆಯಾದ್ದರಿಂದ ಅವುಗಳ ಸುಧಾರಣೆಯೂ ಈ ತಂತ್ರಾಂಶದಿಂದ ಸಾಧ್ಯವಾಗಬಹುದು. 'ನುಡಿ'ಯಲ್ಲಿ ಈ ಹಿಂದೆ ಇದ್ದ ಎಲ್ಲ ಸೌಲಭ್ಯಗಳು ಇಲ್ಲಿಯೂ ದೊರಕುತ್ತವೆ. ಪದಪರೀಕ್ಷೆಯೂ ಹೆಚ್ಚು ವ್ಯಾಪಕವಾಗಿದೆ. 1,50,000 ಪದಗಳನ್ನು ಇದು ಹೊಂದಿದೆ.
