ಪಾಟ್ನಾ: ಉತ್ತರ ಭಾರತದಲ್ಲಿ ಸಂಭವಿಸಿದ ಪ್ರಬಲ ಭೂಕಂಪನದಿಂದಾಗಿ ಬಿಹಾರದಲ್ಲಿ ಮೃತಪಟ್ಟವರ ಸಂಖ್ಯೆ 17ಕ್ಕೆ ಏರಿಕೆಯಾಗಿದೆ.
ಇಬ್ಬರು ಮಕ್ಕಳೂ ಸೇರಿದಂತೆ ಬಿಹಾರದಲ್ಲಿ ಕುಸಿದ ಹಲವು ಕಟ್ಟಡಗಳಲ್ಲಿ ಶನಿವಾರ 17 ಜನ ಮೃತಪಟ್ಟಿದ್ದು, 48 ಮಂದಿಗೆ ಗಂಭೀರ ಗಾಯಗಳಾಗಿವೆ.
ಭಾಗಲಾಪುರದಲ್ಲಿ ಕಟ್ಟಡವೊಂದರ ಕುಸಿತಕ್ಕೆ ಒಂದೇ ಕುಟುಂಬದ ಇಬ್ಬರು ಮಕ್ಕಳು ಮೃತಪಟ್ಟಿದ್ದಾರೆ. ಸೀತಾಮರ್ಹಿ, ದರ್ಭಾಂಗ ಮತ್ತು ವೈಶಾಲಿಯಲ್ಲಿ ತಲಾ ಒಬ್ಬರು ಸೇರಿದಂತೆ ಒಟ್ಟು 17 ಮಂದಿ ಮೃತಪಟ್ಟ ವರದಿಯಾಗಿದೆ.
ಸುಪೌಲ್ ಮತ್ತು ಪೂರ್ಣಿಯಾ ಜಿಲ್ಲೆಗಳಲ್ಲಿ ಕಟ್ಟಡಗಳು ಬಿರುಕು ಬಿಟ್ಟಿವೆ. ರಾಜ್ಯದಾದ್ಯಂತ ದೂರವಾಣಿ ಹಾಗೂ ವಿದ್ಯುಚ್ಚಕ್ತಿಯ ಪೂರೈಕೆಗೆ ವ್ಯತ್ಯಯ ಸಂಭವಿಸಿದೆ.
ನೇಪಾಳದ ಲ್ಯಾಂಜಂಗ್ ಭೂಕಂಪನದ ಕೇಂದ್ರ. "ರಾಜ್ಯದ ಪರಿಸ್ಥಿತಿಯ ಬಗ್ಗೆ ತಿಳಿದುಕೊಳ್ಳಲು ಪ್ರಧಾನಿ ಮೋದಿ ಕರೆ ಮಾಡಿದ್ದರು. ಅತಿ ದೊಡ್ಡ ಹಾನಿ ಉಂಟಾಗಿಲ್ಲ" ಎಂದು ಬಿಹಾರ ಮುಖ್ಯಮಂತ್ರಿ ನಿತೀಶ್ ಕುಮಾರ್ ತಿಳಿಸಿದ್ದಾರೆ.
ನೇಪಾಳದಲ್ಲಿ ಪ್ರಬಲ ಭೂಕಂಪ ಸಂಭವಿಸಿರುವ ಹಿನ್ನೆಲೆಯಲ್ಲಿ ಭಾರತೀಯ ರಾಯಭಾರಿ ಕಚೇರಿಯಿಂದ ಸಹಾಯವಾಣಿ ಆರಂಭಿಸಿದ್ದು, ಸಹಾಯಕ್ಕಾಗಿ 00977-9851135141, 00977-9851107021ಸಂಪರ್ಕಿಸಬಹುದಾಗಿದೆ.
