ಕುಶಾಲನಗರ: ಶಾಂತಿ ತತ್ವಗಳಿಗೆ ಹೆಸರಾದ ಭಾರತ ವಿಶ್ವದ ಇತರ ದೇಶಗಳಿಗೆ ಮಾದರಿ. ಈ ರಾಷ್ಟ್ರದಲ್ಲಿ ಯಾವುದೇ ಸಂದರ್ಭದಲ್ಲೂ ಅಸಹಿಷ್ಣುತೆ ಭಾವನೆ ತಲೆದೋರಿಲ್ಲ ಎಂದು ಟಿಬೆಟಿಯನ್ನರ ಧರ್ಮಗುರು ದಲೈಲಾಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಕುಶಾಲ ನಗರದ ಬೈಲಕುಪ್ಪೆಯ ಟಿಬೇಟಿಯನ್ ನಿರಾಶ್ರಿತರ ಶಿಬಿರದ ಸೆರಲಾಚಿ ಬೌದ್ಧ ಮಂದಿರದ ಲ್ಲಿ ಭಾನುವಾರ ಮಾತನಾಡಿದ ಅವರು, ಬುದ್ಧ ಜನಿಸಿದ ನಾಡು ಅಹಿಂಸಾಪ್ರಿಯ ದೇಶವಾಗಿದ್ದು ಶಾಂತಿ ಮತ್ತು ನೆಮ್ಮದಿ ಬಾಳ್ವೆಗೆ ಅವಕಾಶ ಕಲ್ಪಿಸಿದೆ. ಅಭಿವೃದ್ಧಿಯತ್ತ ಸಾಗುವಾಗ ವ್ಯತ್ಯಯಗಳು ಸಹಜ. ಇದಕ್ಕೆ ರಾಜಕಾರಣ ಬೆರೆಸುವ ಅಗತ್ಯವಿಲ್ಲ ಹಾಗೂ ಅಸಹಿಷ್ಣುತೆ ಬಗೆಗಿನ ಹೇಳಿಕೆಗಳನ್ನು ಮಾಧ್ಯಮ ಕೂಡ ವೈಭವೀಕರಿಸಬಾರದು ಎಂದು ಕಿವಿಮಾತು ಹೇಳಿದರು.
ಉಗ್ರವಾದದ ಬಗ್ಗೆ ಪ್ರತಿಕ್ರಿಯಿಸುತ್ತಾ,ಇದು ವಿಶ್ವ ವ್ಯಾಪಿಯಾಗಿದ್ದು 21ನೇ ಶತಮಾನದಲ್ಲಿ ಸಂಪೂರ್ಣ ಉಗ್ರವಾದಕ್ಕೆ ವಿರಾಮ ಹಾಕಬೇಕಿದೆ. ಜನರ ಹೃದಯದಲ್ಲಿ ಬದಲಾವಣೆ ಕಾಣಲು ಪ್ರತಿಯೊಬ್ಬರೂ ಪ್ರೀತಿಯ ಮೂಲಕ ಉತ್ತರ ನೀಡಬೇಕಾಗಿದೆ. ಮಾತುಕ-ತೆಯ ಮೂಲಕ ಮಾತ್ರ ಉಗ್ರವಾದಕ್ಕೆ ಪರಿಹಾರ ಹುಡುಕಲು ಸಾಧ್ಯ ಎಂದು ದಲೈಲಾಮ ಅಭಿಪ್ರಾಯಪಟ್ಟರು.
