ಕಾಲ್ ಡ್ರಾಪ್ ಪರಿಹಾರ ನಿಬಂಧನೆ ಪುನರ್ ಪರಿಶೀಲಿಸಲು ಟ್ರಾಯ್ ಗೆ ಸುಪ್ರೀಂ ಸೂಚನೆ

ನವದೆಹಲಿ: ಕಾಲ್ ಡ್ರಾಪ್ ಸಮಸ್ಯೆಗೆ ಟ್ರಾಯ್(ಭಾರತೀಯ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರ) ಸೂಚಿಸಿದ್ದ ಪರಿಹಾರ ನಿಯಮಗಳನ್ನು ಪುನಃ ಪರಿಶೀಲಿಸಿಸಬೇಕೆಂದು ಸುಪ್ರೀಂ ಕೋರ್ಟ್ ಹೇಳಿದೆ.

ಟ್ರಾಯ್ ಪರಿಹಾರ ನಿಯಮಗಳನ್ನು ಪ್ರಶ್ನಿಸಿ ಟೆಲಿಕಾಂ ಆಪರೇಟರ್ ಗಳು ಸಲ್ಲಿಸಿದ್ದ ಅರ್ಜಿಯ ವಿಚಾರಣೆ ನಡೆಸಿದ ಸುಪ್ರೀಂ ಕೋರ್ಟ್, ಪರಿಹಾರ ನಿಯಮಗಳಲ್ಲಿ ತಿದ್ದುಪಡಿಯನ್ನು ಪರಿಗಣಿಸಿ ಈ ಬಗ್ಗೆ ಯಾವ ಕ್ರಮ ಕೈಗೊಳ್ಳಲಾಗಿದೆ ಎಂಬುದನ್ನು ತಿಳಿಸಬೇಕು ಎಂದು ಟ್ರಾಯ್ ಗೆ ಸೂಚನೆ ನೀಡಿದೆ.

ಕಾಲ್ ಡ್ರಾಪ್ ಗೆ ಪರಿಹಾರ ಮೊತ್ತ ಹಾಗೂ ನಿಯಮಗಳನ್ನು ನಿಗದಿಪಡಿಸುವ ವಿಚಾರದಲ್ಲಿ ಟ್ರಾಯ್ ತಾಂತ್ರಿಕ ವಿವರಗಳು ಮತ್ತು ತೊಂದರೆಗಳನ್ನು ಪರಿಗಣಿಸಿಲ್ಲ ಎಂದು ಟೆಲಿಕಾಂ ಆಪರೇಟರ್ ಗಳು ಸುಪ್ರೀಂ ಕೋರ್ಟ್ ನಲ್ಲಿ ವಾದಿಸಿದ್ದವು. ಒಂದೆಡೆ ನಗರಸಭೆ ಅಧಿಕಾರಿಗಳು ಸೆಲ್ ಫೋನ್ ಗಳ ಟವರ್ ಗಳನ್ನು ಮುಚ್ಚುತ್ತಿದ್ದಾರೆ, ಇದರಿಂದಾಗಿ ಕರೆಗಳ ಗುಣಮಟ್ಟ ಕುಸಿಯುತ್ತಿವೆ. ಮತ್ತೊಂದೆಡೆ ಟ್ರಾಯ್ ಕಾಲ್ ಡ್ರಾಪ್ ಗೆ ದಂಡ ವಿಧಿಸುತ್ತಿದೆ. ಪ್ರತಿಯೊಂದು ಸೇವೆಯಲ್ಲಿಯೂ ದೋಷಗಳು ಎದುರಾಗುವುದು ಸಹಜ ಅದ್ದರಿಂದ ಪರಿಹಾರ ನಿಯಮಗಳನ್ನು ಪುನಃ ಪರಿಶೀಲಿಸಬೇಕೆಂಬುದು ಟೆಲಿಕಾಂ ಆಪರೇಟರ್ ಗಳ ವಾದ.