ಅಧರಂ ಮಧುರಂ

ಮುಖದ ಅಂದ ಹೆಚ್ಚಿಸುವಲ್ಲಿ ತುಟಿಯ ಪಾತ್ರ ಮುಖ್ಯ. ತುಟಿಯ ಸಂರಕ್ಷಣೆ ತುಂಬಾ ಅಗತ್ಯ. ಅದರಲ್ಲೂ ಚಳಿಗಾಲದಲ್ಲಿ ಚರ್ಮ ಬಿರುಕು ಬಿಡುವುದು ಸಹಜ. ಈ ಕಾಲದಲ್ಲಿ ತುಟಿಯು ಒಣಗುವುದಲ್ಲದೇ, ಒಡೆದು ರಕ್ತ ಬರುತ್ತದೆ. ಎಷ್ಟೇ ಲಿಪ್ಸ್ಟಿಕ್, ಲಿಪ್ ಬಾಮ್ ಹಚ್ಚಿದರೂ ಶಮನವಾಗುವುದಿಲ್ಲ. ಕೆಮಿಕಲ್ ಬಳಸಿ ತಯಾರಿಸಿದ ವಸ್ತುಗಳನ್ನು ಲೇಪಿಸುವುದರಿಂದ ತುಟಿಯ ಬಣ್ಣ ಮಾಸುತ್ತದೆ. ಇದಕ್ಕೆ ನೈಸರ್ಗಿಕ ಚಿಕಿತ್ಸೆ ಇದೆ.

• ಹೆಚ್ಚಾಗಿ ಹಣ್ಣಿನ ರಸ ಅಥವಾ ನೀರನ್ನು ಸೇವಿಸಬೇಕು. ದೇಹದಲ್ಲಿ ನೀರಿನ ಅಂಶ ಕಡಿಮೆ ಇದ್ದರೆ ತುಟಿ ಒಡೆಯುವ ಸಾಧ್ಯತೆ ಹೆಚ್ಚು.
• ಪದೇ ಪದೆ ನಾಲಿಗೆಯಿಂದ ತುಟಿಯನ್ನು ಸ್ಪರ್ಶಿಸಬಾರದು. ತಕ್ಷಣಕ್ಕೆ ಇದು ಪರಿಹಾರ ಎನಿಸಬಹುದೇ ಹೊರತು, ತುಟಿ ಒಡೆಯುವುದಕ್ಕೆ ಹೆಚ್ಚು ಸಹಾಯ ಮಾಡುತ್ತದೆ.
• ಪ್ರತಿ ರಾತ್ರಿ ತುಟಿಗಳಿಗೆ ಗ್ಲಿಸರಿನ್ ಮತ್ತು ಜೇನುತುಪ್ಪ ಮಿಶ್ರಣವನ್ನು ಲೇಪಿಸಿ 15 ನಿಮಿಷ ಬಿಟ್ಟು ನೀರಿನಿಂದ ತೊಳೆದರೆ ತುಟಿಯ ಚರ್ಮ ಮೃದುವಾಗುತ್ತದೆ.
• ನಿಂಬೆರಸ ಮತ್ತು ಅರಿಶಿನದ ಪೇಸ್ಟ್ ತಯಾರಿಸಿ ತುಟಿಗಳಿಗೆ ಲೇಪಿಸಬೇಕು. 20 ನಿಮಿಷದ ನಂತರ ತಣ್ಣೀರಿನಿಂದ ತೊಳೆಯಬೇಕು. ಇದು ಸತ್ತ ಜೀವಕೋಶಗಳನ್ನು ಹೊರಹಾಕಿ ತುಟಿಯ ಹೊಳಪನ್ನು ಹೆಚ್ಚಿಸುತ್ತದೆ.
• ಹಾಲಿನ ಕ್ರೀಂ, ಗುಲಾಬಿ ದಳ ಮತ್ತು ಜೇನುತುಪ್ಪ ಮಿಶ್ರಣ ಮಾಡಿ ತುಟಿಗಳಿಗೆ ಲೇಪಿಸಿದರೆ ತುಟಿಯ ಹೊಳಪು ಹೆಚ್ಚುತ್ತದೆ.
• ಎರಡು ಗಂಟೆಗಳಿಗೊಮ್ಮೆ ಬೆಣ್ಣೆ ಮತ್ತು ತುಪ್ಪವನ್ನು ತುಟಿಗಳಿಗೆ ಸವರುತ್ತಾ ಬಂದರೆ ಚರ್ಮ ಮೃದುವಾಗುವುದಲ್ಲದೇ ಕಾಂತಿಯುಕ್ತವಾಗುತ್ತದೆ.
• ಪೆಟ್ರೋಲಿಯಂ ಜೆಲ್ಲಿ ರಹಿತ ಲಿಪ್ಬಾಮ್ಗಳನ್ನು ಹಾಗೂ ಹರ್ಬಲ್ ಲಿಪ್ಬಾಮ್ಗಳನ್ನು ಬಳಸಬಹುದು.
• ಬಾದಾಮಿ ಎಣ್ಣೆ ಮತ್ತು ಜೇನುತುಪ್ಪದ ಮಿಶ್ರಣವನ್ನು ಪ್ರತಿದಿನ ರಾತ್ರಿ ಹಚ್ಚಿದರೆ ತುಟಿ ಒಡೆಯುವುದಿಲ್ಲ ಹಾಗೂ ಮೃದುವಾಗುತ್ತದೆ.
• ಪಾರ್ಟಿಗಳಿಗೆ ಹೋದಾಗ ಡ್ರೆಸ್ಗೆ ಹೋಲುವಂಥ ಬಣ್ಣ ಬಣ್ಣದ ಲಿಪ್ಸ್ಟಿಕ್ ಬಳಸುವುದು ಸಹಜ. ಆದರೆ ಇದನ್ನು ಮಲಗುವ ಮುನ್ನ ಆಲಿವ್ ಎಣ್ಣೆ ಅಥವಾ ಕೊಬ್ಬರಿ ಎಣ್ಣೆಯನ್ನು ಬಳಸಿ ತೆಗೆಯಬೇಕು. ನಂತರ ಬಾದಾಮಿ ಎಣ್ಣೆ ಸವರಬೇಕು. ಈ ಎಣ್ಣೆ ಲಿಪ್ಸ್ಟಿಕ್ನಲ್ಲಿರುವ ರಾಸಾಯನಿಕಗಳನ್ನು ತೆಗೆದು ತುಟಿಗಳನ್ನು ಸ್ವಚ್ಛ ಮಾಡುತ್ತದೆ.
• ಹಾಲಿನ ಕೆನೆಯನ್ನು ತುಟಿಗಳಿಗೆ ಸವರಿ ಐದು ನಿಮಿಷದ ನಂತರ ತೊಳೆದರೆ ತುಟಿಯ ಕಪ್ಪು ನಿವಾರಣೆಯಾಗುತ್ತದೆ.
• ಸ್ಟ್ರಾಬೆರಿ, ಕಿತ್ತಲೆ ಹಣ್ಣು ಅಥವಾ ದಾಳಿಂಬೆ ಹೂವಿನ ದಳದಿಂದ ಪ್ರತಿದಿನ ತುಟಿಗಳ ಮೇಲೆ ಮಸಾಜ್ ಮಾಡುತ್ತಿದ್ದರೆ ತುಟಿಗಳ ಕಪ್ಪು ಮಾಸುತ್ತದೆ.
• ಐಸ್ಕ್ಯೂಬ್ಗಳಿಂದ ಮಸಾಜ್ ಮಾಡುವ ಮೂಲಕವೂ ತುಟಿಯ ತೇವಾಂಶ ಕಾಪಾಡಬಹುದು.