ಟೊರೊಂಟೊ: 338 ಸದಸ್ಯ ಬಲ ಹೊಂದಿರುವ ಕೆನಡಾದ ಸಂಸತ್ ಗೆ ಅ.19 ರಂದು (ಸೋಮವಾರ) ಚುನಾವಣೆ ನಡೆಯಲಿದ್ದು ಭಾರತೀಯ ಮೂಲದ 40 ಕೆನಡಾ ಪ್ರಜೆಗಳು ಕಣದಲ್ಲಿದ್ದಾರೆ.
308 ಜನರ ಹೌಸ್ ಆಫ್ ಕಾಮನ್ಸ್ ನಲ್ಲಿ ಈ ಹಿಂದೆ ಎಂಟು ಜನ ಭಾರತೀಯ ಮೂಲದ ಕೆನಡಾ ಸಂಸದರಿದ್ದರು. ಆದರೆ ಈ ಬಾರಿ ಕೆನಡಾದ ಪ್ರಮುಖ ಮೂರು ಪಕ್ಷಗಳು ಹಾಲಿ ಸಂಸದರನ್ನು ಸೇರಿ 40 ಭಾರತೀಯ ಮೂಲದವರನ್ನು ಕಣಕ್ಕಿಳಿಸಿರುವುದರಿಂದ ಈ ಬಾರಿ ಕೆನಡಾ ಸಂಸತ್ ನ್ನು ಪ್ರತಿನಿಧಿಸುವ ಭಾರತೀಯ ಮೂಲದ ಸಂಸದರ ಸಂಖ್ಯೆ ಮತ್ತಷ್ಟು ಹೆಚ್ಚಲಿದೆ ಎಂದು ನಿರೀಕ್ಷಿಸಲಾಗಿದೆ.
ವಿದೇಶಾಂಗ ಇಲಾಖೆಯ ಸಂಸದೀಯ ಕಾರ್ಯದರ್ಶಿಯಾಗಿ ಕಾರ್ಯನಿರ್ವಹಿಸುತ್ತಿರುವ ದೀಪಕ್ ಒಭರೈ ದೀರ್ಘಾವಧಿ ಸೇವೆ ಸಲ್ಲಿಸಿರುವ ಭಾರತೀಯ ಮೂಲದ ಕೆನಡಾ ಸಂಸದರಾಗಿದ್ದಾರೆ. ವಿಶೇಷವೆಂದರೆ 10 ಕ್ಷೇತ್ರಗಳಲ್ಲಿ ಇಂಡೋ-ಕೆನೇಡಿಯನ್ ಅಭ್ಯರ್ಥಿಗಳ ನಡುವೆಯೇ ನೇರ ಹಣಾಹಣಿ ನಡೆಯಲಿದೆ.
ಕೆನಡಾದ ಮೂರು ಪ್ರಮುಖ ಪಕ್ಷಗಳು ಭಾರತೀಯ ಮೂಲದವರನ್ನು ಕಣಕ್ಕಿಳಿಸಿರುವುದರೊಂದಿಗೆ ಕೆಲವು ಭಾರತೀಯರು ಸ್ವತಂತ್ರ ಅಭ್ಯರ್ಥಿಗಳಾಗಿಯೂ ಚುನಾವಣೆ ಎದುರಿಸುತ್ತಿದ್ದಾರೆ. ಈ ಬಾರಿ 30 ಕ್ಷೇತ್ರಗಳನ್ನು ಸೇರಿಸಲಾಗಿದ್ದು 308 ಇದ್ದ ಕ್ಷೇತ್ರಗಳು 338 ಕ್ಷೇತ್ರಗಳಿಗೆ ಏರಿಕೆಯಾಗಿದೆ. ಕೆನಡಾದ ಒಟ್ಟು ಜನಸಂಖ್ಯೆಯ ಶೇ.3 ಕ್ಕಿಂತ ಹೆಚ್ಚು ಭಾರತೀಯ ಮೂಲದವರು ವಾಸಿಸುತ್ತಿದ್ದು ಮಹತ್ವದ ರಾಜಕೀಯ ಶಕ್ತಿಯಾಗಿ ರೂಪುಗೊಂಡಿದ್ದಾರೆ.
