ಸುಕಿ ಮ್ಯಾನ್ಮಾರ್​ ನೂತನ ವಿದೇಶಾಂಗ ಸಚಿವೆ

ನೇಪಿಡಾ: ಮ್ಯಾನ್ಮಾರ್​ನ ಆಡಳಿತಾರೂಢ ನ್ಯಾಷನಲ್ ಲೀಗ್ ಫಾರ್ ಡೆಮಾಕ್ರೆಸಿ (ಎನ್​ಎಲ್​ಡಿ) ಅಧ್ಯಕ್ಷೆ ಅಂಗ್ ಸಾನ್ ಸು ಕೀ ಅವರು ಬುಧವಾರ ದೇಶದ ನೂತನ ವಿದೇಶಾಂಗ ವ್ಯವಹಾರಗಳ ಸಚಿವೆಯಾಗಿ ಪ್ರಮಾಣ ವಚನ ಸ್ವೀಕರಿಸಿದರು. 

ಸುಕಿ ಅವರ ಆಪ್ತ ಯು ಟಿನ್ ಕ್ಯಾವ್ ಅವರು ಇಂದು ಮ್ಯಾನ್ಮಾರ್ ನೂತನ ಅಧ್ಯಕ್ಷರಾಗಿ ಪ್ರಮಾಣ ವಚನ ಸ್ವೀಕರಿಸಿದ್ದು, ಕ್ಯಾವ್ ನೇತೃತ್ವದ ನೂತನ ಸರ್ಕಾರದಲ್ಲಿ ಸುಕಿ ಅವರು ವಿದೇಶಾಂಗ ಖಾತೆಯೊಂದಿಗೆ ಇತರೆ ಮೂರು ಖಾತೆಗಳನ್ನೂ ಹೊಂದಿರುತ್ತಾರೆ ಎಂದು ವರದಿ ಮಾಡಲಾಗಿದೆ.

ಸುಕಿ ನೇಮಕಾತಿಯನ್ನು ಯೂನಿಯನ್ ಪಾರ್ಲಿಮೆಂಟ್​ನ ಸ್ಪೀಕರ್ ಯು ಮಾನ್ ವಿನ್ ಖೈಂಗ್ ತಾನ್ ಅವರು ಸರ್ಕಾರ ಸಂಪುಟದ ಪ್ರಮಾಣವಚನ ಸಮಾರಂಭದಲ್ಲಿ ಪ್ರಕಟಿಸಿದರು. ಅಧ್ಯಕ್ಷರ ಕಚೇರಿ ಸಚಿವಾಲಯ, ಶಿಕ್ಷಣ ಸಚಿವಾಲಯ ಮತ್ತು ವಿದ್ಯುತ್ ಮತ್ತು ಇಂಧನ ಸಚಿವಾಲಯ ಈ ಮೂರು ಸಚಿವಾಲಯಗಳ ನೇತೃತ್ವವನ್ನೂ ಅಂಗ್ ಸಾನ್ ಸು ಕಿ ಅವರಿಗೆ ವಹಿಸಲು ಯೂನಿಯನ್ ಪಾರ್ಲಿಮೆಂಟ್ ಅನುಮೋದನೆ ನೀಡಿದೆ.