ದುಬೈನಲ್ಲಿರುವ ವಿಶ್ವದ ಅತಿ ಎತ್ತರದ ವಸತಿ ಕಟ್ಟಡದಲ್ಲಿ ಅಗ್ನಿ ಅವಘಡ

ದುಬೈ: ವಿಶ್ವದ ಅತಿ ಎತ್ತರದ ವಸತಿ ಕಟ್ಚಡಗಳಲ್ಲಿ ಒಂದಾದ ದುಂಬೈನ ಗಗನಚುಂಬಿ ಕಟ್ಟಡದಲ್ಲಿ ಗುರುವಾರ ಮಧ್ಯರಾತ್ರಿಯ ಅಗ್ನಿ ಅವಘಡ ಸಂಭವಿಸಿದ್ದು, ಬೆಂಕಿಯ ಕೆನ್ನಾಲಗೆ ಕಟ್ಟಡವನ್ನು ಆವರಿಸಿಕೊಂಡು ಜನರಲ್ಲಿ ತೀವ್ರ ಆತಂಕ ಸೃಷ್ಟಿಸಿದೆ.

86 ಅಂತಸ್ತುಗಳ ಈ ಕಟ್ಟಡದ 40 ಮಹಡಿಗಳ ಒಂದು ಭಾಗಕ್ಕೆ ಬೆಂಕಿ ತಗುಲಿತ್ತು. ಕಟ್ಟಡದ ಹೊರ ಭಾಗದಲ್ಲಿ ಜನರು ಜಮಾಯಿಸಿ ಭಯದಿಂದ ಚೀರುತ್ತಿದ್ದರು ಎನ್ನಲಾಗಿದೆ.

ಮಧ್ಯರಾತ್ರಿ ಕಳೆದು ನಸುಕಿನ 1 ಗಂಟೆಯ ವೇಳೆಗೆ ಕಟ್ಟಡದ ಒಂದು ಭಾಗಕ್ಕೆ ಬೆಂಕಿ ತಗುಲಿತೆಂದು ಸ್ಥಳದಲ್ಲಿದ್ದ ಜನರು ಹೇಳಿರುವುದಾಗಿ ಅಸೋಸಿಯೇಟೆಡ್‌ ಪ್ರಸ್‌ ವರದಿ ಮಾಡಿದೆ. 

ಸ್ಥಳಕ್ಕೆ ಅಗ್ನಿ ಶಾಮಕ ಆಗಮಿಸಿದ್ದು, ಬೆಳಗಿನ 3.30ರ ವೇಳೆಗೆ ಬೆಂಕಿಯನ್ನು ನಿಯಂತ್ರಣಕ್ಕೆ ತರಲಾಗಿದೆ. ಅದೃಷ್ಟವಶಾತ್ ಈ ಬೆಂಕಿ ಅವಘಡದಲ್ಲಿ ಯಾವುದೇ ಜೀವ ಹಾನಿ ಸಂಭವಿಸಿಲ್ಲ ಮತ್ತು ಯಾರಿಗೂ ಗಾಯಗಳಾದ ವರದಿ ತಿಳಿಸಿದೆ.

ಬೆಂಕಿ ತಗುಲಿನ ಕಟ್ಟಡದ ಭಾಗವನ್ನು ತಣಿಸುವ ಕಾರ್ಯ ಇದೀಗ ಚುರುಕಿನಿಂದ ಸಾಗಿದೆ ಎಂದು ದುಬೈನ ಅಧಿಕೃತ ಮಾಧ್ಯಮ ಕಚೇರಿ ಟ್ವಿಟರ್ ಮಾಡಿದೆ.

ಕಳೆದ ಎರಡೂವರೆ ವರ್ಷಗಳಲ್ಲಿ ಈ ಕಟ್ಟಡ ಬೆಂಕಿ ಅನಾಹುತಕ್ಕೆ ಗುರಿಯಾಗಿರುವುದು ಇದು ಎರಡನೇ ಬಾರಿ. ದುಬೈನ ಮರೀನಾ ಜಿಲ್ಲೆಯ ಪ್ರಸಿದ್ಧ ವಾಟರ್‌ ಫ್ರಂಟ್‌ ಪ್ರದೇಶದಲ್ಲಿರುವ 1,100 ಅಡಿ ಎತ್ತರದ (ಸುಮಾರು 335 ಮೀಟರ್‌) ಈ ಕಟ್ಟಡಕ್ಕೆ 2015ರ ಫೆಬ್ರವರಿಯಲ್ಲಿ ಒಮ್ಮೆ ಬೆಂಕಿ ತಗುಲಿತ್ತು. ಆಗಲೂ ಯಾವುದೇ ಜೀವ ಹಾನಿ ಆಗಿರಲಿಲ್ಲ.