ಟೆಹರಾನ್‌: ಇರಾನ್ ಅಧ್ಯಕ್ಷೀಯ ಚುನಾವಣೆಯಲ್ಲಿ ಹಾಲಿ ಅಧ್ಯಕ್ಷ ಹಸನ್‌ ರೌಹಾನಿ ಅವರು ಭರ್ಜರಿ ಗೆಲುವು ಸಾಧಿಸುವ ಮೂಲಕ ಎರಡನೇ ಅವಧಿಗೆ ಅಧಿಕಾರದ ಗದ್ದುಗೆ ಏರಿದ್ದಾರೆ ಎಂದು ಇರಾನ್ ಸರ್ಕಾರಿ ಟಿವಿ ಶನಿವಾರ ಘೋಷಿಸಿದೆ.
68 ವರ್ಷದ ಹಸನ್‌ ರೌಹಾನಿ ನಾಲ್ಕು ವರ್ಷಗಳ ಆಧಿಕಾರಾವಧಿಗೆ ಮರು ಆಯ್ಕೆಯಾಗಿದ್ದು, ದೇಶದ ಜನತೆಗೆ ಇನ್ನೂ ಹೆಚ್ಚಿನ ಸ್ವಾತಂತ್ರ್ಯ ಹಾಗೂ ದೇಶಕ್ಕೆ ಜಗದಗಲದ ಬಾಂಧವ್ಯವನ್ನು ಕಲ್ಪಿಸುವ ರೌಹಾನಿ ಅವರ ಕಾರ್ಯಸೂಚಿಯು ಈ ವಿಜಯದೊಂದಿಗೆ ಸಾಕಾರಗೊಳ್ಳಲಿದೆ ಎಂದು ಹೇಳಿದೆ.
ಇರಾನ್ ಸರ್ಕಾರಿ ಟಿವಿ, ಮತ ಎಣಿಕೆ ವಿವರಗಳ ಆಧಾರದ ಮೇಲೆ ಹಸನ್‌ ರೌಹಾನಿ ವಿಜಯಿಯೆಂದು ಘೋಷಿಸಿ, ಅವರನ್ನು ತನ್ನ ಸಂಕ್ಷಿಪ್ತ ಪ್ರಕಟಣೆಯಲ್ಲಿ ಅಭಿನಂದಿಸಿದೆ.
ಪ್ರಾಥಮಿಕ ಮತ ಎಣಿಕೆ ವಿವರಗಳ ಪ್ರಕಾರ ರೌಹಾನಿ ಅವರಿಗೆ 3.89 ಕೋಟಿ ಮತಗಳ ಪೈಕಿ ಈ ತನಕ 2.28 ಕೋಟಿ ಮತಗಳು ಪ್ರಾಪ್ತವಾಗಿವೆ. ನಾಲ್ಕು ಕೋಟಿ ಜನರು ಅಧ್ಯಕ್ಷೀಯ ಚುನಾವಣೆಯಲ್ಲಿ ಮತ ಚಲಾಯಿಸಿರುವುದಾಗಿ ಅಧಿಕೃತ ಅಂಕಿ ಅಂಶಗಳು ತಿಳಿಸಿವೆ.
