ಫೇಸ್ ಬುಕ್ ಚೀನಾದ ಕಂಪನಿಗಳೊಂದಿಗೆ ದತ್ತಾಂಶ ಹಂಚಿಕೊಂಡಿದೆ: ವರದಿ

ವಾಷಿಂಗ್ಟನ್​: ಲಂಡನ್​ ಮೂಲದ ಕೇಂಬ್ರಿಡ್ಜ್​ ಅನಾಲಿಟಿಕಾ ಸಂಸ್ಥೆ ಸುಮಾರು 8.7 ಕೋಟಿ ಫೇಸ್ ಬುಕ್ ಬಳಕೆದಾರರ ದತ್ತಾಂಶ ದುರ್ಬಳಕೆ ಮಾಡಿಕೊಂಡ ಹಗರಣದ ಬೆನ್ನಲ್ಲೇ, ಚೀನಾದ 4 ಕಂಪನಿ ಸೇರಿದಂತೆ ವಿಶ್ವಾದ್ಯಂತ 60 ಕಂಪನಿಗಳೊಂದಿಗೆ ದತ್ತಾಂಶ ಹಂಚಿಕೊಳ್ಳಲು ಒಪ್ಪಂದ ಮಾಡಿಕೊಂಡಿರುವುದಾಗಿ ಫೇಸ್​ಬುಕ್​ ತಿಳಿಸಿದೆ ಎಂದು ಸುದ್ದಿ ಸಂಸ್ಥೆಯೊಂದು ವರದಿ ಮಾಡಿದೆ.

ವರದಿಯಲ್ಲಿರುವಂತೆ ಫೇಸ್ ಬುಕ್ ಸಂಸ್ಥೆ ಚೀನಾದ 4 ಸಂಸ್ಥೆ ಸೇರಿದಂತೆ ವಿಶ್ವದ ಇತರೆ 60 ಸಂಸ್ಥೆಗಳೊಂದಿಗೆ ತನ್ನ ಗ್ರಾಹಕರ ದತ್ತಾಂಶಗಳನ್ನು ಹಂಚಿಕೊಂಡಿದೆ. ಫೇಸ್​ಬುಕ್​ ಕಂಪನಿ ವಿಶ್ವದ ಮೂರನೇ ಅತಿ ದೊಡ್ಡ ಸ್ಮಾರ್ಟ್ ಫೋನ್​ ತಯಾರಿಕಾ ಕಂಪನಿಯಾದ ಚೀನಾ ಹುವಾವೇ, ಕಂಪ್ಯೂಟರ್​ ತಯಾರಿಕಾ ಕಂಪನಿ ಲೆನೋವೋ ಗ್ರೂಪ್​, ಸ್ಮಾರ್ಟ್​ ಫೋನ್​ ತಯಾರಿಕಾ ಕಂಪನಿಗಳಾದ ಒಪ್ಪೋ ಮತ್ತು ಟಿಎಲ್​ಸಿ ಕಂಪನಿಗಳೊಂದಿಗೆ ತನ್ನ ಬಳಕೆದಾರರ ಮಾಹಿತಿ ಹಂಚಿಕೊಳ್ಳಲು ಫೇಸ್​ಬುಕ್​ ಒಪ್ಪಂದ ಮಾಡಿಕೊಂಡಿತ್ತು ಎಂದು ಫೇಸ್​ಬುಕ್​ ಕಂಪನಿ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ ಎನ್ನಲಾಗಿದೆ.

ಜತೆಗೆ ಈಗಾಗಲೇ ಸುಮಾರು 30 ಕ್ಕೂ ಹೆಚ್ಚು ಕಂಪನಿಗಳೊಂದಿಗೆ ದತ್ತಾಂತ ಹಂಚಿಕೊಳ್ಳುವ ಸಂಬಂಧ ಮಾಡಿಕೊಂಡಿದ್ದ ಒಪ್ಪಂದವನ್ನು ಕೊನೆಗೊಳಿಸಲಾಗಿದೆ. ಹುವಾವೇ ಕಂಪನಿಯೊಂದಿಗಿನ ಒಪ್ಪಂದ ಈ ವಾರದ ಕೊನೆಗೆ ಕೊನೆಗೊಳ್ಳಲಿದೆ. ಉಳಿದ ಚೀನಾ ಕಂಪನಿಗಳೊಂದಿಗಿನ ಒಪ್ಪಂದವನ್ನು ಶೀಘ್ರ ಮುರಿದುಕೊಳ್ಳಲಾಗುವುದು ಎಂದು ಫೇಸ್​ಬುಕ್​ ತಿಳಿಸಿದೆ. 

ಚೀನಾದಲ್ಲಿ ತಯಾರಾದ ಮೊಬೈಲ್​ಗಳ ಮೂಲಕ ಗೂಢಚಾರಿಕೆಗೆ ಅವಕಾಶ ಮಾಡಿಕೊಟ್ಟಂತಾಗುತ್ತದೆ. ಇದರಿಂದಾಗಿ ಅಮೆರಿಕದ ಹಿತಾಸಕ್ತಿಗೆ ಧಕ್ಕೆಯಾಗುತ್ತದೆ ಎಂದು ಅಮೆರಿಕದ ಗುಪ್ತಚರ ಅಧಿಕಾರಿಗಳು ಈ ಹಿಂದೆಯೇ ತಿಳಿಸಿದ್ದರು. ಆದರೆ ಅಮೆರಿಕದ ಆರೋಪವನ್ನು ಚೀನಾ ನಿರಾಕರಿಸಿತ್ತು. ಸದ್ಯ ಇಂತಹ ಅವಘಡಗಳಿಗೆ ಫೇಸ್​ಬುಕ್​ ಅನುವು ಮಾಡಿಕೊಡುವುದಿಲ್ಲ ಎಂದು ಸಂಸ್ಥೆ ಹೇಳಿಕೊಂಡಿದ್ದು, ಹುವಾವೇ ಸೇರಿದಂತೆ ಯಾವುದೇ ಕಂಪನಿಗಳು ದತ್ತಾಂಶಗಳನ್ನು ಹಂಚಿಕೊಳ್ಳುವ ಮುನ್ನ ಕೂಲಂಕುಷವಾಗಿ ಪರೀಕ್ಷಿಸುತ್ತೇವೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.