ವಾಷಿಂಗ್ಟನ್: ಅಮೆರಿಕಾದ ಕೆಂಟುಕಿಯಲ್ಲಿರುವ ಹಿಂದೂ ದೇವಾಲಯವನ್ನು ದುಷ್ಕರ್ಮಿಗಳು ಭಗ್ನಗೊಳಿಸಿದ್ದು ಮೂರ್ತಿಗೆ ಕಪ್ಪು ಬಣ್ಣ ಬಳಿದದ್ದಲ್ಲದೆ ಗೋಡೆ ಮೇಲೆ ಅಶ್ಲೀಲ ಸಂದೇಶ ಬರೆದಿರುವ ಘಟನೆ ವರದಿಯಾಗಿದೆ.
ಜನಾಂಗೀಯ ದ್ವೇಷದ ಹಿನ್ನೆಲೆಯಲ್ಲಿ ಈ ಘಟನೆ ನಡೆದಿದೆ ಎಂದು ಹೇಳಲಾಗಿದ್ದು ಕೆಂಟುಕಿಯಲ್ಲಿರುವ ಸ್ವಾಮಿನಾರಾಯಣ ದೇವಾಲಯದಲ್ಲಿ ಈ ಕೃತ್ಯ ಎಸಗಲಾಗಿದೆ. ದೇವಾಲಯದ ಮೂರ್ತಿಗೆ ಕಪ್ಪು ಬಣ್ನ ಬಳಿದಿದ್ದ ದುಷ್ಕರ್ಮಿಗಳು ಆವರಣದಲ್ಲಿನ ಕುರ್ಚಿಗಳನ್ನು ಚಾಕುವಿನಿಂದ ಹಾನಿಗೊಳಿಸಿದ್ದಾರೆ.
ಅಲ್ಲದೆ ಕಿಟಕಿಗಳನ್ನು ಒಡೆದು ಹಾಕಿರುವ ಕಿಡಿಗೇಡಿಗಳು ಗೋಡೆಯ ಮೇಲೆ ಅವಹೇಳನಕಾರಿ ಬರಹ ಬರೆದಿದ್ದಾರೆ.
ಕೆಂಟುಕಿಯ ಲೂಯಿಸ್ ವಿಲ್ಲೆಯಲ್ಲಿರುವ ಭಾರತೀಯರು ಈ ಘಟನೆಯಿಂದ ಆಘಾತಗೊಂಡಿದ್ದಾರೆ. ಲೂಯಿಸ್‍ವಿಲ್ಲೆ ಮೇಯರ್ ಗ್ರೆಗ್ ಫಿಷರ್, ದುಷ್ಕರ್ಮಿಗಳ ಕೃತ್ಯವನ್ನು ಖಂಡಿಸಿದ್ದಾರೆ. ಸದ್ಯ ಅಮೆರಿಕಾ ತನಿಖಾ ದಳ ಘಟನೆ ಸಂಬಂಧ ತನಿಖೆ ಕೈಗೊಂಡಿದ್ದಾಗಿ ತಿಳಿದುಬಂದಿದೆ.
