ಈಕೆ ಜಗತ್ತಿನ ಅತೀ ಕಿರಿಯ ಚಿತ್ರ ಕಲಾವಿದೆ!

ಈ ಪುಟ್ಟ ಪೋರಿಯ ವಯಸ್ಸು ಕೇವಲ 2 ವರ್ಷ. ಹೆಸರು ಕನಿಷ್ಕಾ ಬಿಜೇಶ್. ಮುದ್ದಿನಿಂದ ಈಕೆಯನ್ನು ಎಲ್ಲರೂ ಬೇಬೂ ಎಂದೇ ಕರೆಯುತ್ತಾರೆ. ಈಕೆ ಜಗತ್ತಿನ ಅತೀ ಕಿರಿಯ ಚಿತ್ರ ಕಲಾವಿದೆ ಎಂದರೆ ನೀವು ನಂಬಲೇ ಬೇಕು. ಅಬ್ರಾಸ್ಟ್ರಾಕ್ಟ್ ಪೇಟಿಂಗ್ ಮೂಲಕ ಎಲ್ಲರ ಗಮನ ಸೆಳೆದಿರುವ ಈ ಬಾಲೆ ದೇಶ ವಿದೇಶಗಳಲ್ಲಿ ಚಿತ್ರ ಪ್ರದರ್ಶನವನ್ನು ಏರ್ಪಡಿಸಿ ಜನ ಮೆಚ್ಚುಗೆ ಗಳಿಸಿದ್ದಾಳೆ.  

2014 ಅಕ್ಟೋಬರ್ 30-ನವೆಂಬರ್2 ರಂದು ದುಬೈನಲ್ಲಿ ನಡೆದ ಅಂತಾರಾಷ್ಟ್ರೀಯ ಆರ್ಟ್ ಫೇರ್‌ನಲ್ಲಿ  ಆನ್‌ಸ್ಟೇಜ್ ಪೇಟಿಂಗ್ ಮೂಲಕ ಗಮನ ಸೆಳೆದ ಈಕೆ ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್‌ನಲ್ಲಿ ಎರಡು ಬಾರಿ ಸ್ಥಾನ ಗಿಟ್ಟಿಸಿಕೊಂಡಿದ್ದಾಳೆ . ಈ ಆರ್ಟ್ ಫೇರ್‌ನಲ್ಲಿ ಈಕೆ ಪ್ರದರ್ಶನ ನೀಡಿದಾಗ ಈಕೆಯ ವಯಸ್ಸು 15 ತಿಂಗಳು. ದೇಶದ ಅತೀ ಕಿರಿಯ ಕಲಾವಿದೆಯಾದ ಕನಿಷ್ಕಾ ಹುಟ್ಟಿದ್ದು ಕೇರಳದ ತ್ರಿಶ್ಶೂರ್ ಜಿಲ್ಲೆಯಲ್ಲಿ. ಫೆ. 8 2013ರಂದು ಜನಿಸಿದ ಈಕೆ 8 ತಿಂಗಳಿನಲ್ಲೇ ಪ್ರೊಫೆಷನಲ್ ಪೇಟಿಂಗ್ ಬ್ರಷ್ ಹಿಡಿದು ಪೇಟಿಂಗ್ ಮಾಡಲು ತೊಡಗಿದ್ದಾಳಂತೆ. ಮಗಳಲ್ಲಿರುವ ಆಸಕ್ತಿಯನ್ನು ಬೇಗನೆ ಪತ್ತೆ ಹಚ್ಚಿದ ಅಪ್ಪ ಅಮ್ಮ ಮಗಳಿಗೆ ಚಿತ್ರಕಲೆ ಮುಂದುವರಿಸುವಂತೆ ಪ್ರೋತ್ಸಾಹ ನೀಡಿದ್ದಾರೆ.

2014 ಜುಲೈ 12ರಂದು ಆಯಿಲ್ ಕಲರ್ ಬಳಸಿ 5 ಮೀ 15 ಸೆಮಿ ಉದ್ದ X 30 ಸೆ.ಮೀ ಅಗಲದ ಕ್ಯಾನ್ವಾಸ್‌ನಲ್ಲಿ ಪೇಟಿಂಗ್ ಮಾಡಿ ಈಕೆ ದಾಖಲೆ ಸೃಷ್ಟಿಸಿದ್ದಳು. ಇತ್ತೀಚೆಗೆ ಕೇರಳ ಲಲಿತ ಕಲಾ ಅಕಾಡೆಮಿ ತ್ರಿಶ್ಶೂರ್‌ವಲ್ಲಿ ಸೋಲೋ ಚಿತ್ರಪ್ರದರ್ಶನ ಆಯೋಜಿಸಿದ ಈಕೆ ಕಿರಿಯ ಚಿತ್ರಕಲಾವಿದೆ ಮತ್ತು ಕಿರಿಯ ಸ್ಟೇಜ್ ಪರ್‌ಫಾರ್ಮರ್ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದ್ದಾಳೆ.