ಮುಂಬೈ: ತಂತ್ರಜ್ಞಾನವನ್ನು ದುರುಪಯೋಗಪಡಿಸಿಕೊಂಡು ಮಹಿಳೆಯರನ್ನು ವಸ್ತುವಿನಂತೆ ಬಿಂಬಿಸುವುದು ಹಾಗೂ ಅವರ ಅನುಮತಿಯಿಲ್ಲದೆ ನಕಲಿ ಅಥವಾ ಕೃತಕ ದೃಶ್ಯಗಳನ್ನು ಹರಡುವುದರ ವಿರುದ್ಧ ನಟಿ ಜಾನ್ವಿ ಕಪೂರ್ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಇತ್ತೀಚೆಗೆ ತಮ್ಮ ವಿರುದ್ಧ AI ಮೂಲಕ ಸೃಷ್ಟಿಸಲಾದ ವಿಡಿಯೋಗಳ ವಿಚಾರದಲ್ಲಿ ಪ್ರತಿಕ್ರಿಯಿಸಿರುವ ಜಾನ್ವಿ, ಮಹಿಳೆಯರ ಅನುಮತಿಯಿಲ್ಲದೆ ಅವರ ಚಿತ್ರಣವನ್ನು ತಿರುಚಿ ಪ್ರಸಾರ ಮಾಡುವುದು ಅತ್ಯಂತ ಗಂಭೀರ ವಿಚಾರ ಎಂದು ಹೇಳಿದ್ದಾರೆ.
ಈ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ಸುದೀರ್ಘ ಹೇಳಿಕೆ ಹಂಚಿಕೊಂಡಿರುವ ಅವರು, “ಮಹಿಳೆ ಐದು ದಿನ ‘ಯೆಸ್‌’ ಎಂದರೂ, ಆರನೇ ದಿನ ‘ನೋ’ ಎಂದರೆ ಆ ‘ನೋ’ ಅನ್ನು ಗೌರವಿಸಲೇಬೇಕು” ಎಂದು ಖಡಕ್‌ ಸಂದೇಶ ನೀಡಿದ್ದಾರೆ.
“ಮಹಿಳೆಯರನ್ನು ವಸ್ತುವಿನಂತೆ ಬಿಂಬಿಸಲು ಹಾಗೂ ಅನುಮತಿಯಿಲ್ಲದೆ ಕೃತಕ ವಿಷಯಗಳನ್ನು ಹರಡಲು ತಂತ್ರಜ್ಞಾನವನ್ನು ಅಪರಾಧ ರೀತಿಯಲ್ಲಿ ದುರುಪಯೋಗಪಡಿಸಿಕೊಳ್ಳುವುದು ಅತ್ಯಂತ ನೋವುಂಟುಮಾಡುವ ಕೃತ್ಯ. ಇದು ಲೈಂಗಿಕ ದೌರ್ಜನ್ಯದ ಗಡಿಯಲ್ಲಿದೆ” ಎಂದು ಜಾನ್ವಿ ಹೇಳಿದ್ದಾರೆ.
ತಮ್ಮ ಚಿತ್ರರಂಗದಲ್ಲಿರುವ ಬಹುತೇಕ ಮಹಿಳೆಯರು ಇಂತಹ ಅನುಭವದ ಯಾವುದಾದರೂ ಒಂದು ರೂಪವನ್ನು ಎದುರಿಸಿದ್ದಾರೆ ಎಂದು ಹೇಳಿರುವ ಅವರು, ಮಹಿಳೆಯರ ದೇಹದ ಬಗ್ಗೆ ಒಪ್ಪಿಗೆ, ಆಯ್ಕೆ ಮತ್ತು ಗೌರವ ಮಾನವೀಯತೆಯ ಅತ್ಯಂತ ಮೂಲಭೂತ ಮೌಲ್ಯಗಳಾಗಬೇಕು ಎಂದಿದ್ದಾರೆ.
‘5 ದಿನ ಯೆಸ್‌ ಎಂದರೂ 6ನೇ ದಿನದ ನೋಗೆ ಗೌರವ ಇರಬೇಕು’
“ಒಬ್ಬ ಮಹಿಳೆ ಸತತ ಐದು ದಿನ ‘ಯೆಸ್‌’ ಎಂದಿದ್ದರೂ ಆರನೇ ದಿನ ‘ನೋ’ ಎಂದರೆ ಆ ‘ನೋ’ ಅನ್ನು ಗೌರವಿಸಬೇಕು. ಆಕೆ ಮಿನಿಸ್ಕರ್ಟ್‌ ಧರಿಸಿದ್ದಾಳೆ ಎಂಬ ಕಾರಣಕ್ಕೆ ಆಕೆಯ ಸ್ಕರ್ಟ್‌ನೊಳಗೆ ಕ್ಯಾಮೆರಾ ಇಡುವ, ಆಕೆಯ ದೇಹದ ಅಸಭ್ಯ ದೃಶ್ಯಗಳನ್ನು ಸೆರೆಹಿಡಿಯುವ ಅಥವಾ ಆಕೆಯ ದೇಹವನ್ನು ದೃಶ್ಯಾತ್ಮಕವಾಗಿ ದುರುಪಯೋಗಪಡಿಸಿಕೊಳ್ಳುವ ಹಕ್ಕು ಯಾರಿಗೂ ಇಲ್ಲ,” ಎಂದು ಜಾನ್ವಿ ಸ್ಪಷ್ಟಪಡಿಸಿದ್ದಾರೆ.
“ಮಹಿಳೆಗೆ ಯಾವುದರಲ್ಲಿ ಆರಾಮವಿದೆ, ಆಕೆ ಎಲ್ಲಿ ತನ್ನ ಗಡಿ ಹಾಕಿಕೊಳ್ಳುತ್ತಾಳೆ ಮತ್ತು ತನ್ನ ದೇಹದ ಬಗ್ಗೆ ಏನು ಮಾಡಬೇಕು ಎಂದು ನಿರ್ಧರಿಸುತ್ತಾಳೆ ಎಂಬುದು ಸಂಪೂರ್ಣವಾಗಿ ಆಕೆಯ ವೈಯಕ್ತಿಕ ಹಕ್ಕು. ಇದು ಮೂಲಭೂತ ವಿಚಾರ,” ಎಂದು ಅವರು ಹೇಳಿದ್ದಾರೆ.
‘ಇದು ಕೇವಲ AI ವಿಡಿಯೋಗಳ ಸಮಸ್ಯೆಯಲ್ಲ’
ಕಳೆದ ಕೆಲವು ದಿನಗಳಲ್ಲಿ ತಾವು ಎದುರಿಸಿರುವ AI ವಿಡಿಯೋಗಳ ವಿಚಾರವನ್ನು ಮೀರಿ, ಇದು ಮಹಿಳೆಯರು ಪ್ರತಿದಿನ ಎದುರಿಸುತ್ತಿರುವ ದೊಡ್ಡ ಸಾಮಾಜಿಕ ಸಮಸ್ಯೆಯಾಗಿದೆ. ಮಹಿಳೆಯರ ಬಗ್ಗೆ ಸಮಾಜದ ದೃಷ್ಟಿಕೋನ, ತೀರ್ಪು ನೀಡುವ ಮನೋಭಾವ, ಸುರಕ್ಷತೆಗಾಗಿ ನಿರಂತರವಾಗಿ ಹೋರಾಡಬೇಕಾದ ಪರಿಸ್ಥಿತಿ ಹಾಗೂ ಮಹಿಳೆಯರ ಗಡಿಗಳನ್ನು ಇತರರು ತಮ್ಮದೇ ರೀತಿಯಲ್ಲಿ ವ್ಯಾಖ್ಯಾನಿಸುವ ಪ್ರವೃತ್ತಿ ಇನ್ನೂ ಮುಂದುವರಿದಿದೆ ಎಂದು ಅವರು ಹೇಳಿದ್ದಾರೆ.
“ಈ ಬೆದರಿಕೆ ಈಗ ಡಿಜಿಟಲ್ ಜಗತ್ತಿಗೂ ವಿಸ್ತರಿಸಿದೆ. ಆದರೆ ಮಹಿಳೆಯರ ಜೀವನವನ್ನು ಪ್ರತಿದಿನ ಕಾಡುತ್ತಿರುವ ನಿಜವಾದ ದೈಹಿಕ ಭಯವನ್ನೇ ನಾವು ಇನ್ನೂ ಸಮರ್ಪಕವಾಗಿ ಪರಿಹರಿಸಿಲ್ಲ,” ಎಂದು ಜಾನ್ವಿ ಹೇಳಿದ್ದಾರೆ.
‘ನಿಮ್ಮ ಮಗಳನ್ನು ರಕ್ಷಿಸಿ’ ಎನ್ನುವುದು ಮಾತ್ರ ಪರಿಹಾರವಲ್ಲ
ಮಹಿಳೆಯರನ್ನು ರಕ್ಷಿಸುವ ಜವಾಬ್ದಾರಿಯನ್ನು ಕೇವಲ ಕುಟುಂಬಗಳ ಮೇಲೆಯೇ ಹಾಕುವುದು ಸರಿಯಲ್ಲ ಎಂದು ಜಾನ್ವಿ ಅಭಿಪ್ರಾಯಪಟ್ಟಿದ್ದಾರೆ. ‘ನಿಮ್ಮ ಮಗಳನ್ನು ರಕ್ಷಿಸಿ’ ಎನ್ನುವುದು ಮಾತ್ರ ಉತ್ತರವಾಗಲು ಸಾಧ್ಯವಿಲ್ಲ. ಬೇರೊಬ್ಬರ ಗಡಿಯನ್ನು ಉಲ್ಲಂಘಿಸುವ ಹಕ್ಕು ತಮಗಿದೆ ಎಂದು ಕೆಲವರು ಭಾವಿಸುವಂತೆ ಮಾಡಿರುವ ಮನೋಭಾವವನ್ನೇ ಬದಲಿಸಬೇಕಿದೆ. ಈ ಬದಲಾವಣೆಗೆ ಸರಿಯಾದ ಮತ್ತು ತಪ್ಪಾದದ್ದನ್ನು ಸ್ಪಷ್ಟವಾಗಿ ಹೇಳುವ ನೈತಿಕ ಧೈರ್ಯವಿರುವ ಪುರುಷರ ಪಾತ್ರವೂ ಮುಖ್ಯ ಎಂದು ಜಾನ್ವಿ ಹೇಳಿದ್ದಾರೆ.
ಕೊನೆಯಲ್ಲಿ ಮಹಿಳೆಯೊಬ್ಬಳ ಮೂಲಭೂತ ಬೇಡಿಕೆಯನ್ನು ಪ್ರಶ್ನೆಯ ರೂಪದಲ್ಲಿ ಮುಂದಿಟ್ಟಿರುವ ಜಾನ್ವಿ, “ಮಹಿಳೆಯನ್ನು ಕೇವಲ ಒಬ್ಬ ಮನುಷ್ಯಳಂತೆ ಕಾಣಬೇಕು, ಗೌರವಿಸಬೇಕು ಎನ್ನುವುದು ನಿಜವಾಗಿಯೂ ಇಷ್ಟೊಂದು ದೊಡ್ಡ ಬೇಡಿಕೆಯೇ?” ಎಂದು ಪ್ರಶ್ನಿಸಿದ್ದಾರೆ.
“ಆಕೆಯ ದೇಹ. ಆಕೆಯ ಚಿತ್ರ. ಆಕೆಯ ಗಡಿ. ಆಕೆಯ ಆಯ್ಕೆ.” ಎಂದು ತಮ್ಮ ಸಂದೇಶವನ್ನು ಜಾನ್ವಿ ಮುಕ್ತಾಯಗೊಳಿಸಿದ್ದಾರೆ.
NTR, ಚಿರಂಜೀವಿ ಸೇರಿ ಹಲವರಿಗೆ ಧನ್ಯವಾದ
ಈ ವಿಚಾರದಲ್ಲಿ ಗಟ್ಟಿಯಾಗಿ ಧ್ವನಿ ಎತ್ತಿದ ನಟ ಜೂನಿಯರ್‌ NTR ಅವರಿಗೆ ಜಾನ್ವಿ ವಿಶೇಷವಾಗಿ ಧನ್ಯವಾದ ತಿಳಿಸಿದ್ದಾರೆ.
“ಲಕ್ಷಾಂತರ ಜನರು ಗೌರವಿಸುವ ವ್ಯಕ್ತಿಯೊಬ್ಬರು ತಮ್ಮೊಂದಿಗೆ ನೇರವಾಗಿ ಸಂಬಂಧಿಸದ ವಿಚಾರದ ಬಗ್ಗೆಯೂ ಧ್ವನಿ ಎತ್ತಿದಾಗ, ಇಂತಹ ಅನುಭವ ಎದುರಿಸಿರುವ ಪ್ರತಿಯೊಬ್ಬ ಮಹಿಳೆಗೂ ಅದು ಮಹತ್ವದ ವ್ಯತ್ಯಾಸವನ್ನು ಉಂಟುಮಾಡುತ್ತದೆ,” ಎಂದು ಅವರು ಹೇಳಿದ್ದಾರೆ.
ಇದೇ ವಿಚಾರವನ್ನು ಬೆಂಬಲಿಸಿ ಧ್ವನಿ ಎತ್ತಿದ ಚಿರಂಜೀವಿ, ವಿಜಯ್‌ ಮತ್ತು ಖುಷ್ಬೂ ಅವರಿಗೂ ಜಾನ್ವಿ ಧನ್ಯವಾದ ಅರ್ಪಿಸಿದ್ದಾರೆ. ಇಂತಹ ಮನಸ್ಥಿತಿ ಹಾಗೂ ಅನೈತಿಕ ಕೃತ್ಯಗಳ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಅವರು ಕರೆ ನೀಡಿರುವುದನ್ನು ಜಾನ್ವಿ ಸ್ವಾಗತಿಸಿದ್ದಾರೆ.