ಬೆಂಗಳೂರು: ಇತ್ತೀಚಿಗೆ ಕನ್ನಡದ ಬಹುತೇಕ ಚಿತ್ರಗಳಲ್ಲಿ ಚಿಕ್ಕಣ್ಣ ಹಾಸ್ಯ ನಟನಾಗಿ ಕಾಣಿಸಿಕೊಳ್ಳುವುದು ವಾಡಿಕೆಯಾಗಿದೆ. ಈಗ 'ಬಿಲ್ ಗೇಟ್ಸ್' ಸಿನೆಮಾದಲ್ಲಿ ಹಾಸ್ಯ ನಟ ಪೂರ್ಣ ಪ್ರಮಾಣದ ಸ್ವತಂತ್ರ ಹೀರೊ ಆಗಿ ಕಾಣಿಸಿಕೊಳ್ಳಲಿದ್ದಾರೆ ಎಂಬ ವರದಿಗಳಿಗೆ ಪ್ರತಿಕ್ರಿಯಿಸಿದ್ದಾರೆ.

ಈ ವರದಿಯನ್ನು ತಾವು ಓದಿರುವುದಾಗಿ ಹೇಳುವ ಚಿಕ್ಕಣ್ಣ "ಅದು ನಿಜವಲ್ಲ. ಶ್ರೀನಿವಾಸ್ ನಿರ್ದೇಶನದ 'ಬಿಲ್ ಗೇಟ್ಸ್' ಸಿನೆಮಾದಲ್ಲಿ ನನಗೆ ಪಾತ್ರವಿರುವದು ನಿಜ ಆದರೆ ನಾನು ಹೀರೊ ಅಲ್ಲ. ಧಾರಾವಾಹಿ ನಟ ಶಿಶಿರ್ ಶಾಸ್ತ್ರಿ ಈ ಸಿನೆಮಾದ ಹೀರೊ. ನಾನು ಅವನ ಗೆಳೆಯನ ಪಾತ್ರದಲ್ಲಿ ನಟಿಸಿದ್ದೇನೆ" ಎಂದು ಸ್ಪಷ್ಟೀಕರಿಸುತ್ತಾರೆ.

ಹಾಸ್ಯ ನಟರಾಗಿದ್ದು ನಾಯಕನಟರಾದ ಶರಣ್ ಮತ್ತು ಕೋಮಲ್ ಅವರನ್ನು ಅನುಕರಿಸಿ ಹೀರೊ ಆಗುವ ಇಚ್ಛೆಯಿದೆಯೇ ಎಂಬ ಪ್ರಶ್ನೆಗೆ "ನನಗಾಗಲೇ ಹೀರೊ ಆಗಿ ನಟಿಸುವ ಅವಕಾಶಗಳು ಬಂದಿವೆ. ಆದರೆ ಅವಕ್ಕಿನ್ನು ನಾನು ಸಿದ್ಧನಿಲ್ಲ. ಅದಕ್ಕೆ ಬೇಕಾದಷ್ಟು ಸಮಯವಿದೆ" ಎನ್ನುತ್ತಾರೆ. 

ಹಲವಾರು ಸಿನೆಮಾಗಳಲ್ಲಿ ನಿರತರಾಗಿರುವ ಚಿಕ್ಕಣ್ಣ ಸದ್ಯಕ್ಕೆ ಅವರ ಮುಂದಿನ ಚಿತ್ರ 'ಚೌಕ'ದ ಡಬ್ಬಿಂಗ್ ಕಾರ್ಯದಲ್ಲಿ ಬ್ಯುಸಿಯಾಗಿದ್ದಾರೆ.