ಹೈದರಾಬಾದ್: 'ಹ್ಯಾರಿ ಪಾಟರ್' ಖ್ಯಾತಿಯ ನಟಿ ಅಫ್ಶಾನ್ ಆಜಾದ್ ಸೆಪ್ಟೆಂಬರ್ ನಲ್ಲಿ ನಡೆಯಲಿರುವ ಹೈದರಾಬಾದ್ ಕಾಮಿಕ್ ಕಾನ್-2016 ಕಾರ್ಯಕ್ರಮದಲ್ಲಿ ಭಾಗವಹಿಸಲು ಭಾರತಕ್ಕೆ ಬರಲಿದ್ದಾರೆ. ಇದು ಭಾರತಕ್ಕೆ ಮೊದಲ ಭೇಟಿಯಾಗಿರುವುದರಿಂದ ಇಂಗ್ಲಿಷ್ ನಟಿ ಉತ್ಸುಕರಾಗಿದ್ದಾರೆ. 

ಬಾಂಗ್ಲಾದೇಶಿ ಮೂಲದ ಅಫ್ಶಾನ್, ವಿಶೇಷ ಚರ್ಚೆಗಳಲ್ಲಿ ಭಾಗವಹಿಸಿ, ಪೋಸ್ಟರ್ ಗಳಿಗೆ ಸಹಿಮಾಡಿ, ಅಭಿಮಾನಿಗಳೊಂದಿಗೆ ಮಾತುಕತೆ ನಡೆಸಲಿದ್ದಾರೆ. ಈ ಎರಡು ದಿನದ ಕಾಮಿಕ್ ಕಾನ್ ಸಮಾವೇಶ ಹೈದರಾಬಾದ್ ನ ಹೈಟೆಕ್ಸ್ ಪ್ರದರ್ಶನ ಕೇಂದ್ರದಲ್ಲಿ ಸೆಪ್ಟೆಂಬರ್ 24-25 ರಂದು ನಡೆಯಲಿದೆ.

"ಹೈದರಾಬಾದ್ ಕಾಮಿಕ್ ಕಾನ್ ನಲ್ಲಿ ನನ್ನ ಅಭಿಮಾನಿಗಳನ್ನು ನೋಡಲು ಭಾರತಕ್ಕೆ ಭೇಟಿ ನೀಡಲು ಉತ್ಸುಕಳಾಗಿದ್ದೇನೆ. ಇದು ಅದ್ಭುತ ಕಾರ್ಯಕ್ರಮವಾಗಲಿದೆ ಮತ್ತು ನಿಮ್ಮನ್ನೆಲ್ಲ ಅಲ್ಲಿ ನೋಡಲಿದ್ದೇನೆ" ಎಂದು ಅಫ್ಶಾನ್ ಹೇಳಿದ್ದಾರೆ. 

'ಹ್ಯಾರಿ ಪಾಟರ್' ಸರಣಿ ಸಿನೆಮಾಗಳ ಐದು ಸಿನೆಮಾಗಳಲ್ಲಿ ಪದ್ಮಾ ಪಾಟೀಲ್ ಪಾತ್ರವನ್ನು ಅಫ್ಶಾನ್ ನಿರ್ವಹಿಸಿದ್ದರು. ಅವರು ಇಂಗ್ಲೆಂಡಿನ ಮ್ಯಾಂಚೆಸ್ಟರ್ ನಲ್ಲಿ ನೆಲೆಸಿದ್ದಾರೆ.