ಯೋಗರಾಜ್ ಭಟ್ ಹಾಗೂ ಗಣೇಶ್ ಜೋಡಿಯ ಮುಗುಳುನಗೆ ಚಿತ್ರ ಈ ವಾರದಲ್ಲಿ ಸೆನ್ಸಾರ್ ಆಗುತ್ತಿದ್ದು, ಇದಕ್ಕೂ ಮುನ್ನ ವಿನೂತನ ರೀತಿಯಲ್ಲಿ ಆಡಿಯೋ ಲಾಂಚ್ ಮಾಡಲು ಚಿತ್ರ ತಂಡ ನಿರ್ಧರಿಸಿದೆ. 

ಮುಗುಳುನಗೆ ಚಿತ್ರ ತಂಡ ರಾಜ್ಯದ ವಿವಿಧ ಭಾಗಗಳಲ್ಲಿ ಸಂಚರಿಸಲಿದೆ. ಚಿತ್ರದಲ್ಲಿ ಒಟ್ಟು 8 ಹಾಡುಗಳಿದ್ದು, ರಾಜ್ಯದ ಒಂದೊಂದು ಭಾಗದಲ್ಲಿಯೂ ಒಂದೊಂದು ಹಾಡನ್ನು ಬಿಡುಗಡೆ ಮಾಡಲು ಸಿದ್ಧತೆ ನಡೆಸಿದೆ. ಚಿತ್ರದ ಆಲ್ಬಮ್ ನಲ್ಲಿ ಹೊಡಿ ಒಂಭತ್ತು ಮೊದಲನೆಯ ಹಾಡಾಗಿದ್ದು, ಹುಬ್ಬಳ್ಳಿಯಲ್ಲಿ ಸಾರ್ವಜನಿಕ ಕಾರ್ಯಕ್ರಮದಲ್ಲಿ ರಿಲೀಸ್ ಮಾಡಲಾಗುತ್ತಿದೆ. 

ಜು.12 ರಂದು ಶಿಲ್ಪಾ ಗಣೇಶ್ ಜನ್ಮದಿನದ ಅಂಗವಾಗಿ ಬೆಂಗಳೂರಿನಲ್ಲಿ 2 ನೇ ಹಾಡನ್ನು ಗಣೇಶ್ ಅವರ ಮನೆಯಲ್ಲೇ ಬಿಡುಗಡೆ ಮಾಡಲಾಗುತ್ತದೆ ಎಂದು ತಿಳಿದುಬಂದಿದೆ. ಜು.14 ರಂದು ಮೈಸೂರು ನಂತರ ದಾವಣಗೆರೆಗೆ ಚಿತ್ರ ತಂಡ ತೆರಳಲಿದ್ದು, ಜುಲೈ 21, 22 ರ ವೇಳೆಗೆ ಆಡಿಯೋ ಬಿಡುಗಡೆ ಕಾರ್ಯಕ್ರಮ ಸಂಪೂರ್ಣವಾಗಲಿದೆ. ಇದೇ ವೇಳೆ ಮುಂಗಾರು ಮಳೆಯ 10 ವರ್ಷಾಚರಣೆಯ ಭಾಗವಾಗಿ ಗಣೇಶ್ ಹಾಗೂ ಯೋಗರಾಜ್ ಭಟ್ ಅವರು ಜೋಗ್ ಫಾಲ್ಸ್ ಗೆ ಭೇಟಿ ನೀಡಲಿದ್ದಾರೆ.