ಬೆಂಗಳೂರು: ತಮ್ಮ ಸೋದರಳಿಯನನ್ನು ಚಿತ್ರರಂಗಕ್ಕೆ ಪರಿಚಯಿಸಲು ಕಾಯುತಿದ್ದ ನಿರ್ಮಾಪಕ ಸಿ ಆರ್ ಮನೋಹರ್ ಅವರಿಗೆ ನಿರ್ದೇಶಕ ಪುರಿ ಜಗನ್ನಾಥ್ ಹೆಸರನ್ನು ಸೂಚಿಸಿದ್ದು ನಟಿ ರಕ್ಷಿತಾ.
ಗುರುವಾರ ನಡೆದ 'ರೋಗ್' ಸಿನೆಮಾದ ಆಡಿಯೋ ಬಿಡುಗಡೆಯಲ್ಲಿ ಇದ್ಕಕಾಗಿ ರಕ್ಷಿತಾ ಅವರಿಗೆ ಧನ್ಯವಾದ ಹೇಳಿದ ನಿರ್ಮಾಪಕ "ಯೋಜನೆಯೊಂದಕ್ಕೆ ಪ್ರೇಮ್ ಜೊತೆಗೆ ಚರ್ಚಿಸುವಾಗ ಇದೆಲ್ಲವೂ ನಡೆದದ್ದು. ಸಿನಿಮಾರಂಗಕ್ಕೆ ಇಶಾನ್ ನನ್ನ ಪರಿಚಯಿಸುವ ನನ್ನ ಬಯಕೆ ಬಗ್ಗೆ ಹೇಳಿದೆ. 'ಅಪ್ಪು' ಸಿನೆಮಾ ದಿನಗಳಿಂದಲೂ ಪೂರಿ ಅವರ ಉತ್ತಮ ಗೆಳತಿಯಾಗಿರುವ ರಕ್ಷಿತಾ ಕೂಡಲೇ ಅವರಿಗೆ ಕರೆ ಮಾಡಿ ನಮ್ಮಿಬ್ಬರನ್ನು ಪರಿಚಯಿಸಿದರು. ಈಗ ಪೂರಿ ಅವರ ಸಿನೆಮಾದಲ್ಲಿ ಇಶಾನ್ ಅವರಿಗೆ ದೊಡ್ಡ ಬ್ರೇಕ್ ಸಿಕ್ಕಿರುವುದಕ್ಕೆ ಖುಷಿಯಾಗಿದೆ" ಎನ್ನುತ್ತಾರೆ ಮನೋಹರ್.
ಈ ಕಾರ್ಯಕ್ರಮದಲ್ಲಿ ಮಾತನಾಡಿದ ನಿರ್ದೇಶಕ ಪೂರಿ "ಕನ್ನಡ ಸಿನೆಮಾಗಳೊಂದಿಗೆ ನನ್ನ ಸಂಬಂಧ ಹಿಂದಿನದ್ದು. ಶಿವರಾಜ್ ಕುಮಾರ್ ಮತ್ತು ಪುನೀತ್ ರಾಜಕುಮಾರ್ ಅವರ ಸಿನೆಮಾಗಳನ್ನು ಮಾಡಿದ್ದೇನೆ. ಅವರೆಲ್ಲರೂ ನನ್ನ ಕುಟುಂಬವಿದ್ದಂತೆ. ಈಗ 'ರೋಗ್' ಗಾಗಿ ಸಿ ಆರ್ ಮನೋಹರ್ ಅವರ ಕುಟುಂಬದ ಜೊತೆಗೆ ಬಹಳ ನಿಕಟವಾಗಿದ್ದೇನೆ" ಎಂದಿದ್ದಾರೆ.
ಆಡಿಯೋ ಬಿಡುಗಡೆಯಲ್ಲಿ ಇಡೀ ಕುಟುಂಬ ಭಾಗವಹಿಸಿದ್ದಕ್ಕೆ ಇಶಾನ್ ಸಂತಸಗೊಂಡಿದ್ದಾರೆ. ಸುದೀಪ್, ತೆಲುಗು ನಟರಾದ ಶ್ರೀಕಾಂತ್, ಮನ್ನಾರ ಚೋಪ್ರಾ ಮುಂತಾದವರು ಆಡಿಯೋ ಬಿಡುಗಡೆಯಲ್ಲಿ ಭಾಗವಹಿಸಿದ್ದರು.