ಶುದ್ಧಿ ಚಿತ್ರದ ಮೂಲಕ ಜನ ಮನ್ನಣೆ ಪಡೆದ ನಿರ್ದೇಶಕ ಆದರ್ಶ್ ಈಶ್ವರಪ್ಪ ಇದೀಗ ಮತ್ತೊಂದು ಚಿತ್ರದ ನಿರ್ದೇಶನಕ್ಕೆ ಇಳಿದಿದ್ದಾರೆ.
ಅವರನ್ನು ಮುಂದಿನ ಚಿತ್ರಕ್ಕೆ ಭಿನ್ನ ಎಂದು ಹೆಸರಿಡಲಾಗಿದೆ. ಭಿನ್ನ ಚಿತ್ರ ಜುಲೈನಿಂದ ಪ್ರಾರಂಭವಾಗಲಿದೆ. ಶುದ್ಧಿ ತರಹ ಇದೂ ಒಂದು ಮಹಿಳಾ ಪ್ರಧಾನ ಚಿತ್ರವಾಗಲಿದೆಯಂತೆ. ಜತೆಗೆ ಇದೊಂದು ಸೈಕಾಲಜಿಕಲ್ ಥ್ರಿಲ್ಲರ್ ಚಿತ್ರ ಎಂದು ನಿರ್ದೇಶಕರು ಹೇಳಿದ್ದಾರೆ.
ಉದಯೋನ್ಮುಖ ನಟಿಯೊಬ್ಬಳಿಗೆ ಒಂದು ಚಿತ್ರದಲ್ಲಿ ಅವಕಾಶ ಸಿಗುತ್ತದೆ. ಆ ಚಿತ್ರದ ಕಥೆಗೂ ಅವಳ ನಿಜ ಜೀವನಕ್ಕೂ ಒಂದು ಸಂಬಂಧವಿರುತ್ತದೆ. ಆ ಸಂಬಂಧ ಏನು ಎಂಬುದನ್ನು ಚಿತ್ರ ಹೇಳಲಿದೆ ಎಂದು ಆದರ್ಶ್ ಹೇಳಿದ್ದಾರೆ.
ಶುದ್ಧಿ ಚಿತ್ರ ಬಿಡುಗಡೆ ನಂತರ ಅವರು ಈ ಚಿತ್ರದ ಕಥೆ ಬರೆಯಲು ಶುರು ಮಾಡಿದ್ದಾರೆ. ಬರವಣಿಗೆ ಕೆಲಸ ಜನವರಿಯಲ್ಲಿ ಮುಗಿದ್ದಿದ್ದು ಇದೀಗ ಪ್ರೀ ಪ್ರೊಡಕ್ಷನ್ ಕೆಲಸ ನಡೆಯುತ್ತಿದೆ. ಈ ನಂತರ ರಿಹರ್ಸಲ್ ಎಲ್ಲಾ ಮುಗಿಸಿ, ಜುಲೈನಲ್ಲಿ ಚಿತ್ರವನ್ನು ಪ್ರಾರಂಭಿಸುವ ಯೋಜನೆಯನ್ನು ನಿರ್ದೇಶಕರು ಹಾಕಿಕೊಂಡಿದ್ದಾರೆ.
ಈ ಚಿತ್ರಕ್ಕೆ ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದು ನಿರ್ದೇಶಿಸುವುದರ ಜತೆಗೆ ಸಂಕಲನವನ್ನೂ ಆದರ್ಶನ್ ಅವರೇ ಮಾಡಲಿದ್ದಾರೆ. ಪರ್ಪಲ್ ಆರೋ ಫಿಲ್ಮ್ಸ್ ನಿರ್ಮಿಸುತ್ತಿರುವ ಈ ಚಿತ್ರಕ್ಕೆ ಆಂಡ್ರೋ ಆಯಿಲೋ ಅವರ ಛಾಯಾಗ್ರಹಣ ಮತ್ತು ಜೆಸ್ಸಿ ಕ್ಲಿಂಟನ್ ಅವರ ಸಂಗೀತವಿದೆ.