ನಟಿ ಹರಿಪ್ರಿಯಾರ 25ನೇ ಚಿತ್ರಕ್ಕೆ ಡಾಟರ್ ಆಫ್ ಪಾರ್ವತಮ್ಮ ಎಂದು ಹೆಸರಡಲಾಗಿದೆ. ಇಲ್ಲಿ ಅವರು ಹಿರಿಯ ನಟಿ ಸುಮಲತಾರೊಂದಿಗೆ ತೆರೆ ಹಂಚಿಕೊಳ್ಳಲಿದ್ದಾರೆ. ನಿನ್ನೆ ಚಿತ್ರದ ಶೀರ್ಷಿಕೆಯನ್ನು ಘೋಷಿಸಲಾಗಿತ್ತು. ಚಿತ್ರದ ಶೂಟಿಂಗ್ ಆರಂಭಗೊಂಡು ಈಗಾಗಲೇ 10 ದಿನಗಳು ಕಳೆದಿವೆ.

ಚಿತ್ರಕ್ಕೆ ಕಥೆ ಬರೆದಿರುವ ಜೆ.ಶಂಕರ್ ಗೆ ಇದು ಮೊದಲ ಚಿತ್ರ. ತನಿಖಾಧಿಕಾರಿ ವೈದೇಹಿ ಪಾತ್ರವನ್ನು ಹರಿಪ್ರಿಯಾ ನಿರ್ವಹಿಸುತ್ತಿದ್ದು 2017ರಲ್ಲಿ ನಡೆದ ಸತ್ಯ ಘಟನೆಯಾಧಾರಿತ ಚಿತ್ರ ಇದಾಗಿದೆ.

ಇಲ್ಲಿ ಪಾರ್ವತಮ್ಮ ಪಾತ್ರವನ್ನು ಸುಮಲತಾ ಮಾಡುತ್ತಿದ್ದಾರೆ. ಇಲ್ಲಿ ಬರುವ ಪಾರ್ವತಮ್ಮನಿಗೂ ಕನ್ನಡದ ಮೇರು ನಟ ಡಾ.ರಾಜ್ ಕುಮಾರ್ ಪತ್ನಿ ನಿರ್ಮಾಪಕಿ ದಿವಂಗತ ಪಾರ್ವತಮ್ಮನಿಗೂ ಯಾವುದೇ ಸಂಬಂಧವಿಲ್ಲ. ಊರ್ವಿ ಚಿತ್ರದಲ್ಲಿ ಅಭಿನಯಿಸಿದ್ದ ಪ್ರಭು ಕೂಡ ಈ ಚಿತ್ರದಲ್ಲಿ ಇರಲಿದ್ದಾರೆ. ಹಾಸ್ಯನಟ ವಿಶ್ವ ಜೊತೆ ಅವರದ್ದು ಕೂಡ ಪ್ರಮುಖ ಪಾತ್ರವಿದೆ.

ಡಾಟರ್ ಆಫ್ ಪಾರ್ವತಮ್ಮ ಚಿತ್ರಕ್ಕೆ ನಾಲ್ವರು ನಿರ್ಮಾಪಕರು ಹಣ ಹೂಡಿದ್ದಾರೆ. ಮಿಧುನ್ ಮುಕುಂದನ್ ಅವರ ಸಂಗೀತ ಮತ್ತು ಅರುಲ್ ಕೆ ಸೋಮಸುಂದರಂ ಅವರ ಛಾಯಾಗ್ರಹಣ ಚಿತ್ರಕ್ಕಿದೆ.