ಬೆಂಗಳೂರು: ಕೋಲ್ಕತಾ ನೈಟ್ ರೈಡರ್ಸ್ ತಂಡದ ವಿರುದ್ಧದ ಮಾಡು ಇಲ್ಲವೇ ಮಡಿ ಪಂದ್ಯಕ್ಕೆ ಆರ್ ಸಿಬಿ ತಂಡ ಸಿದ್ಧತೆ ನಡೆಸಿರುವಂತೆಯೇ ಇತ್ತ ಬೆಂಗಳೂರು ಬೀದಿಗಳಲ್ಲಿ ಕ್ರಿಕೆಟಿಗ ಎಬಿ ಡಿವಿಲಿರ್ಸ್ ತನ್ನ ಪತ್ನಿ ಮತ್ತು ಮಗನೊಂದಿಗೆ ಆಟೋದಲ್ಲಿ ಸುತ್ತಾಡಿದ ವಿಡಿಯೋ ಇದೀಗ ವೈರಲ್ ಆಗಿದೆ.

ಕೆಲ ಅಭಿಮಾನಿಗಳು ಬೈಕ್ ನಲ್ಲಿ ಆಟೋ ಹಿಂಬಾಲಿಸುತ್ತಿರುವಾಗಲೇ ಎಬಿ ಡಿವಿಲಿಯರ್ಸ್ ಮತ್ತು ಅವರ ಪತ್ನಿ, ಪುತ್ರ ಮಗನೊಂದಿಗೆ ನಗರದ ಹಲವಡೆ ಸುತ್ತಾಡಿ ಸಂಭ್ರಮಿಸಿದ್ದಾರೆ. 'ಈ ಸಲ ಕಪ್‌ ನಮ್ದೆ' ಎಂದು ಹೇಳುವ ಮೂಲಕ ಮಾರ್ಗಮಧ್ಯೆ ಅಭಿಮಾನಿಗಳನ್ನು ರಂಜಿಸಿದ್ದಾರೆ. ಮುಖ್ಯವಾಗಿ ಡಿವಿಲಿಯರ್ಸ್ ಪತ್ನಿ ಮತ್ತು ಜೂನಿಯರ್ ಡಿವಿಲಿಯರ್ಸ್ ಈ ಸಲ ಕಪ್ ನಮ್ದೇ ಎಂದು ಹೇಳಿರುವುದು  ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ.

‘ಈ ಸಲ ಕಪ್‌ ನಮ್ದೆ’ ಎಂಬುದು ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು (ಆರ್‌ಸಿಬಿ) ತಂಡದ ಘೋಷ ವಾಕ್ಯವಾಗಿದೆ. 

ಇದಕ್ಕೂ ಮೊದಲು ತನ್ನ ಪುಟ್ಟ ಬ್ಯಾಟ್‌ನಲ್ಲಿ ಅಪ್ಪ ಹಾಕಿದ ಎಸೆತಗಳನ್ನು ಆಡಿದ ಜೂನಿಯರ್ ಎಬಿಡಿ, ಹೆಚ್ಚು ಹೊತ್ತು ಫುಟ್‌ಬಾಲ್ ಆಟದಲ್ಲಿ ಸಮಯ ಕಳೆದರು. ತಂಡದ ಇನ್ನಿತರ ಆಟಗಾರರೊಂದಿಗೆ ಮಾತನಾಡುತ್ತ, ತುಂಟಾಟ ಆಡಿದ ಜೂನಿಯರ್ ಗಮನ ಸೆಳೆದರು.