ಸೆಂಚೂರಿಯನ್: ಗಾಯದ ಸಮಸ್ಯೆಯಿಂದಾಗಿ ದಕ್ಷಿಣ ಆಫ್ರಿಕಾ ತಂಡದ ಸ್ಫೋಟಕ ಬ್ಯಾಟ್ಸ್ ಮನ್ ಎಬಿ ಡಿವಿಲಿಯರ್ಸ್ ತಂಡದಿಂದ ಹೊರಗುಳಿದಿದ್ದು ಇದೀಗ ತಂಡದ ನಾಯಕ ಡುಪ್ಲೇಸಿಸ್ ಸಹ ಗಾಯಗೊಂಡು ಟೂರ್ನಿಯಿಂದ ಹೊರ ಹೋಗಿದ್ದಾರೆ. 

ಪ್ರವಾಸಿ ಭಾರತ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ಶತಕ ಸಿಡಿಸಿದ್ದ ಡುಪ್ಲೇಸಿಸ್ ಅವರ ಬೆರಳಿಗೆ ಗಾಯವಾಗಿತ್ತು. ಈ ಹಿನ್ನೆಲೆಯಲ್ಲಿ ಏಕದಿನ ಸರಣಿ ಮತ್ತು ಮುಂಬರುವ ಟಿ20 ಸರಣಿಯಿಂದಲೇ ಹೊರಬಿದಿದ್ದಾರೆ. 

ಕೈ ಬೆರಳಿನ ಗಾಯದ ಸಮಸ್ಯೆಯಿಂದ ಬಳಲುತ್ತಿರುವ ಡುಪ್ಲೇಸಿಸ್ ಅವರಿಗೆ 3 ರಿಂದ 6 ವಾರಗಳ ವಿಶ್ರಾಂತಿ ನೀಡಲಾಗಿದೆ ಹೀಗಾಗಿ ಸೀಮಿತ ಓವರ್ ತಂಡದ ಹಂಗಾಮಿ ನಾಯಕನ ಹೆಸರನ್ನು ಶನಿವಾರ ಪ್ರಕಟಿಸಲಾಗುವುದು ಎಂದು ದಕ್ಷಿಣ ಆಫ್ರಿಕಾ ಕ್ರಿಕೆಟ್ ಮಂಡಳಿ ತಿಳಿಸಿದೆ. 

ಇನ್ನು ತಂಡದ ವಿಕೆಟ್ ಕೀಪರ್ ಕ್ವಿಂಟನ್ ಡಿಕಾಕ್ ಕೂಡ ಗಾಯದ ಸಮಸ್ಯೆ ಎದುರಿಸುತ್ತಿದ್ದಾರೆ. ಇನ್ನು ಎಬಿಡಿ ಸಹ ಗಾಯಗೊಂಡಿರುವುದರಿಂದ ಹೆನ್ರಿಕ್ ಕ್ಲಾಸೆನ್ ರನ್ನು ಮೀಸಲು ವಿಕೆಟ್ ಕೀಪರ್ ಆಗಿ ಸೇರಿಸಿಕೊಳ್ಳಲಾಗಿದೆ.