ಇಂಗ್ಲೆಂಡ್ ವಿರುದ್ಧ ಮೂರು ಪಂದ್ಯಗಳ ಸರಣಿಯ ಮೊದಲ ಏಕದಿನ ಪಂದ್ಯದಲ್ಲಿ ಮಂಗಳವಾರ ಶುಭಮನ್ ಗಿಲ್ ನೇತೃತ್ವದ ತಂಡ ಆರು ವಿಕೆಟ್ ಅಂತರದ ಗೆಲುವು ಕಂಡಿದೆ. ಈ ಮೂಲಕ ಯುನೈಟೆಡ್ ಕಿಂಗ್ಡಮ್ನಲ್ಲಿ ಭಾರತದ ಟಿ20ಐ ಸರಣಿ ಸೋಲಿನ ಕಹಿಯನ್ನು ಕೊನೆಗೊಳಿಸಿದೆ. ಏಕದಿನ ಪಂದ್ಯಕ್ಕೂ ಮುನ್ನ, ಶ್ರೇಯಸ್ ಅಯ್ಯರ್ ನಾಯಕತ್ವದಲ್ಲಿ ಟೀಂ ಇಂಡಿಯಾ ಐರ್ಲೆಂಡ್ ವಿರುದ್ಧ ಎರಡು ಟಿ20 ಮತ್ತು ಇಂಗ್ಲೆಂಡ್ ವಿರುದ್ಧ ನಾಲ್ಕು ಟಿ20ಐ ಪಂದ್ಯಗಳಲ್ಲಿ ಸೋತಿತ್ತು. ಆದಾಗ್ಯೂ, ಮಂಗಳವಾರ ಪ್ರವಾಸಿ ತಂಡವು 45.2 ಓವರ್ಗಳಲ್ಲಿ 259 ರನ್ಗಳ ಗುರಿಯನ್ನು ಬೆನ್ನಟ್ಟಿ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿತು. ಅಕ್ಷರ್ ಪಟೇಲ್ ಅವರ ಆಲ್ರೌಂಡ್ ಪ್ರದರ್ಶನ ತಂಡದ ಗೆಲುವಿಗೆ ನೆರವಾಯಿತು. ಬೌಲಿಂಗ್ನಲ್ಲಿ ನಾಲ್ಕು ವಿಕೆಟ್ಗಳನ್ನು ಕಬಳಿಸಿ ನಂತರ ನಿರ್ಣಾಯಕ ಅಜೇಯ 57 ರನ್ಗಳನ್ನು ಗಳಿಸಿದರು.
ಪಂದ್ಯದ ನಂತರ ಮಾತನಾಡಿದ ಗಿಲ್, ತುಲನಾತ್ಮಕವಾಗಿ ಯುವ ಬೌಲಿಂಗ್ ಪಡೆಯನ್ನು ಹೊಂದಿದ್ದರೂ, ಮೊದಲು ಬೌಲಿಂಗ್ ಮಾಡುವ ನಿರ್ಧಾರ ಕೈಗೊಳ್ಳಲು ಭಾರತದ ಅನುಭವಿ ಬ್ಯಾಟಿಂಗ್ ವಿಭಾಗವು ತಂಡಕ್ಕೆ ಆತ್ಮವಿಶ್ವಾಸ ನೀಡಿತು ಎಂದು ಹೇಳಿದರು.
'ಮಧ್ಯಮ ಕ್ರಮಾಂಕ ಮತ್ತು ಕೆಳ-ಮಧ್ಯಮ ಕ್ರಮಾಂಕದ ಬ್ಯಾಟರ್ಗಳು ಆ ರೀತಿಯಲ್ಲಿ ರನ್ ಗಳಿಸಿ ತಂಡಕ್ಕಾಗಿ ಪಂದ್ಯವನ್ನು ಗೆಲ್ಲಿಸಿಕೊಡುವುದನ್ನು ನೋಡಿದಾಗ, ನಾಯಕನಾಗಿ ಹಾಗೂ ಅಗ್ರ ಕ್ರಮಾಂಕದ ಬ್ಯಾಟರ್ ಆಗಿ ನನಗೆ ಹೆಚ್ಚಿನ ಆತ್ಮವಿಶ್ವಾಸ ಸಿಗುತ್ತದೆ' ಎಂದು ಗಿಲ್ ಹೇಳಿದರು.
ಟಾಸ್ ವೇಳೆ ತೆಗೆದುಕೊಂಡ ನಿರ್ಧಾರದ ಕುರಿತು ವಿವರಿಸಿದ ಗಿಲ್, ಆ ನಿರ್ಧಾರವು ಪಿಚ್ಗಿಂತ ಹೆಚ್ಚಾಗಿ ತಂಡದ ಸಂಯೋಜನೆಯನ್ನು ಆಧರಿಸಿತ್ತು ಎಂದು ತಿಳಿಸಿದರು.
'ಇದು ನಮ್ಮ ತಂಡದ ಸಂಯೋಜನೆಗೆ ಸಂಬಂಧಿಸಿದ ವಿಷಯವಾಗಿತ್ತು. ನಮ್ಮ ಬೌಲಿಂಗ್ ವಿಭಾಗವು ತುಸು ಯುವ ಆಟಗಾರರನ್ನು ಒಳಗೊಂಡಿದೆ. ಹೀಗಾಗಿ, ಬೌಲಿಂಗ್ಗೆ ಹೋಲಿಸಿದರೆ ನಮ್ಮ ಬ್ಯಾಟಿಂಗ್ ವಿಭಾಗವು ಹೆಚ್ಚು ಅನುಭವಿ ಎನಿಸಿಕೊಳ್ಳುತ್ತದೆ. ನಾವು ಮೊದಲು ಬೌಲಿಂಗ್ ಮಾಡಲು ಬಯಸಿದ್ದೆವು. ಒಂದು ವೇಳೆ 320 ರನ್ಗಳ ಗುರಿ ಎದುರಾದರೂ, ನಮ್ಮಲ್ಲಿರುವ ಬ್ಯಾಟಿಂಗ್ ಕ್ರಮಾಂಕದ ಸಾಮರ್ಥ್ಯದ ಮೇಲೆ ನಮಗೆ ಭರವಸೆಯಿತ್ತು' ಎಂದು ಅವರು ಹೇಳಿದರು.
ಗೆದ್ದ ತಂಡದ ಭಾಗವಾಗಿದ್ದರೂ, ಹಿರಿಯ ಆಟಗಾರರಾದ ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿಗೆ ಇದು ನಿರಾಶಾದಾಯಕ ದಿನವಾಗಿತ್ತು; ಏಕೆಂದರೆ ಅವರು ಕ್ರಮವಾಗಿ 11 ಮತ್ತು 5 ರನ್ಗಳಿಗೆ ಔಟ್ ಆದರು.
ಟೈಮ್ಸ್ ಆಫ್ ಇಂಡಿಯಾ ವರದಿ ಪ್ರಕಾರ, 2027ರ ಏಕದಿನ ವಿಶ್ವಕಪ್ಗೆ ಮುಂಚಿತವಾಗಿ ತಂಡದ ಎಲ್ಲ ಆಟಗಾರರನ್ನು ಪರೀಕ್ಷಿಸಲು ಬಿಸಿಸಿಐ ಸಹ ಉತ್ಸುಕವಾಗಿದೆ.
'ಬೌಲಿಂಗ್ ಮತ್ತು ಬ್ಯಾಟಿಂಗ್ನಲ್ಲಿ ಎರಡೂ ವಿಭಾಗಗಳಲ್ಲಿ ಯಾವ ರೀತಿಯ ಸಂಯೋಜನೆಯು ನಮಗೆ ಉತ್ತಮ ಆಳವನ್ನು ನೀಡುತ್ತದೆ ಎಂಬುದನ್ನು ನೋಡಲು ನಾವು ನಿಜವಾಗಿಯೂ ವಿಭಿನ್ನ ಸಂಯೋಜನೆಗಳನ್ನು ಪ್ರಯತ್ನಿಸುತ್ತಿದ್ದೇವೆ' ಎಂದು ಗಿಲ್ ಹೇಳಿದರು.
ದಕ್ಷಿಣ ಆಫ್ರಿಕಾದಲ್ಲಿ ನಡೆಯಲಿರುವ 2027ರ ವಿಶ್ವಕಪ್ಗೆ ಸಿದ್ಧತೆ ನಡೆಸಲು ಇಂಗ್ಲೆಂಡ್ನ ಪರಿಸ್ಥಿತಿಗಳು ಉಪಯುಕ್ತ ಅವಕಾಶವನ್ನು ಒದಗಿಸಿವೆ ಎಂದು ಅವರು ಹೇಳಿದರು.
'ಪಿಚ್ ಮತ್ತು ಇಲ್ಲಿನ ಪರಿಸ್ಥಿತಿಗಳು ದಕ್ಷಿಣ ಆಫ್ರಿಕಾವನ್ನು ಹೋಲುವಂತಿದ್ದವು ಎಂದು ನನಗೆ ಅನ್ನಿಸುತ್ತದೆ. ಹೊಸ ಚೆಂಡು ಸ್ವಲ್ಪ ಚಲಿಸುತ್ತಿದ್ದರಿಂದ ಬ್ಯಾಟ್ಸ್ಮನ್ಗಳಿಗೆ ಆರಂಭದಲ್ಲಿ ಆಡುವುದು ಸುಲಭವಾಗಿರಲಿಲ್ಲ. ಆದರೆ, ನಂತರ ಪಿಚ್ ಉತ್ತಮವಾಗಿ ಹೊಂದಿಕೊಂಡಿತು. ಇಂತಹ ಪಿಚ್ಗಳಲ್ಲಿ ವಿವಿಧ ಸಂಯೋಜನೆಗಳನ್ನು ಪರೀಕ್ಷಿಸಲು ನಮಗೆ ಸಾಧ್ಯವಾದರೆ, ಅದು ನಮಗೆ ಬಹಳ ಒಳ್ಳೆಯದಾಗುತ್ತದೆ' ಎಂದು ಅವರು ತಿಳಿಸಿದರು.