ಬೆಂಗಳೂರು: ಸ್ನಾತಕೋತ್ತರ ಪದವೀಧರೆಯೊಬ್ಬರು ಫ್ಯಾನಿಗೆ ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಶರಣಾಗಿರುವ ಘಟನೆ ಸೋಮವಾರ ಬಾಗಲೂರು ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ನಡೆದಿದೆ.

ಮಾರೇನಹಳ್ಳಿ ನಿವಾಸಿ ಮಂಜುಳಾ (23) ಆತ್ಮಹತ್ಯೆಗೆ ಶರಣಾದವರು. ಪಾರ್ವತಮ್ಮ ಮತ್ತು ಲೇಟ್ ಗೋವಿಂದಪ್ಪ ದಂಪತಿ ಪುತ್ರಿ ಮಂಜುಳಾ ಎಂ.ಕಾಂ ಪದವಿ ಮುಗಿಸಿದ್ದರು. ಮನೆಯಲ್ಲಿ
ತಾಯಿ ಮತ್ತು ಇಬ್ಬರು ಸಹೋದರರಿದ್ದು, ಸೋಮವಾರ ಬೆಳಗ್ಗೆ ಕೆಲಸದ ನಿಮಿತ್ತ ಸಹೋದರರು ಪಕ್ಕದ ಗ್ರಾಮಕ್ಕೆ ತೆರಳಿದ್ದರು. ತಾಯಿ ಪಾರ್ವತಮ್ಮ ಮಧ್ಯಾಹ್ನ ಜಮೀನಿಗೆ ಹೋಗಿದ್ದರಿಂದ ಮನೆಯಲ್ಲಿ ಮಂಜುಳಾ ಮಾತ್ರ ಇದ್ದರು.

ಸಂಜೆ 5.30ರ ಸುಮಾರಿಗೆ ಪಾರ್ವತಮ್ಮ ಜಮೀನಿನಿಂದ ವಾಪಸಾದಾಗ ಮನೆಯ ಬಾಗಿಲು ಮುಚ್ಚಿದ್ದನ್ನು ಕಂಡು ಬಾಗಿಲು ಬಡಿದಿದ್ದಾರೆ. ಈ ವೇಳೆ ಮನೆ ಒಳಗಿನಿಂದ ಯಾವುದೇ ಪ್ರತಿಕ್ರಿಯೆ ಬರಲಿಲ್ಲ. ಇದರಿಂದ ಗಾಬರಿಗೊಂಡ ಪಾರ್ವತಮ್ಮ ಅವರು ಸ್ಥಳೀಯರ ಸಹಾಯದಿಂದ ಬಾಗಿಲು ಒಡೆದು ಮನೆ ಒಳಗೆ ಹೋಗಿದ್ದಾರೆ. ಬಳಿಕ ಕೊಠಡಿಗೆ ತೆರಳಿದಾಗ ಮಂಜುಳಾ ವೇಲ್ ನಿಂದ ಫ್ಯಾನಿಗೆ ನೇಣು ಬಿಗಿದುಕೊಂಡಿರುವುದು ಕಂಡುಬಂದಿದೆ. ತಕ್ಷಣ ಸ್ಥಳೀಯರ ನೆರವಿನಿಂದ ಖಾಸಗಿ ಆಸ್ಪತ್ರೆಗೆ ಸಾಗಿಸಿದ್ದಾರೆ. ಈ ವೇಳೆ ಪರೀಕ್ಷಿಸಿದ ವೈದ್ಯರು ಮಂಜುಳಾ ಮೃತಪಟ್ಟಿರುವುದಾಗಿ ದೃಢಪಡಿಸಿದ್ದಾರೆ ಎಂದು ಪೊಲೀಸರು ತಿಳಿಸಿದರು.

ಎಂ.ಕಾಂ ಮುಗಿಸಿದ ಬಳಿಕ ಮಂಜುಳಾ ಮನೆಯಲ್ಲೇ ಇದ್ದರು. ಈ ನಡುವೆ ಮನೆಯವರು ಮದುವೆ ಮಾಡುವ ವಿಚಾರದಲ್ಲಿದ್ದರು. ಆದರೆ, ಮಂಜುಳಾ ನೇಣು ಹಾಕಿಕೊಂಡು ಆತ್ಮಹತ್ಯೆಗೆ
ಶರಣಾಗಿದ್ದಾರೆ. ಈ ಸಂಬಂಧ ಬಾಗಲೂರು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.