ಬೆಂಗಳೂರು: ಅತಿವೇಗವಾಗಿ ಬಂದ ಲಾರಿ, ತಿರುವು ಪಡೆಯುವಾಗ ಎದುರಿಗೆ ಬಂದ ಟಿವಿಎಸ್ ಬೈಕ್‍ಗೆ ಡಿಕ್ಕಿ ಹೊಡೆದ ಪರಿಣಾಮ ತಂದೆ, ಮಗ ಸಾವನ್ನಪ್ಪಿರುವ ಘಟನೆ ಶನಿವಾರ ತಡರಾತ್ರಿ ಚೊಕ್ಕಸಂದ್ರ ಜಂಕ್ಷನ್ ಬಳಿ ನಡೆದಿದೆ.
ಮಲ್ಲಸಂದ್ರ ನಿವಾಸಿಗಳಾದ ನಾಗರಾಜ್ (55), ಇವರ ಪುತ್ರ ಮಂಜುನಾಥ್ (30) ಮೃತಪಟ್ಟವರು. ಕಂಠೀರವ ಸ್ಟುಡಿಯೋ ಬಳಿ ಮೊಬೈಲ್ ಕ್ಯಾಂಟೀನ್ ನಡೆಸುತ್ತಿದ್ದ ಇವರು ರಾತ್ರಿ ವ್ಯಾಪಾರ ಮುಗಿಸಿ ಟಿವಿಎಸ್‍ನಲ್ಲಿ ಮನೆಗೆ ಹೋಗುತ್ತಿದ್ದರು. ಈ ವೇಳೆ ವೇಗವಾಗಿ ಬಂದ ಮಹಾರಾಷ್ಟ್ರ ನೋಂದಣಿಯ ಲಾರಿ ಇವರಿಗೆ ಡಿಕ್ಕಿ ಹೊಡೆದಿದೆ. ಈ ವೇಳೆ ಟಿವಿಎಸ್ ಚಾಲನೆ ಮಾಡುತ್ತಿದ್ದ ಮಗ ಮಂಜುನಾಥ್ ಸ್ಥಳದಲ್ಲೇ ಮೃತಪಟ್ಟರೆ, ತೀವ್ರವಾಗಿ ಗಾಯಗೊಂಡಿದ್ದ ತಂದೆ ನಾಗರಾಜ್ ಅವರನ್ನು ನಿಮಾ್ಹನ್ಸ್‍ಗೆ ದಾಖಲಿಸಲಾಗಿತ್ತು. ಆದರೆ, ಚಿಕಿತ್ಸೆ ಫಲಕಾರಿಯಾಗದೆ ಭಾನುವಾರ ಬೆಳಗಿನ ಜಾವ ಮೃತಪಟ್ಟಿದ್ದಾರೆ.
ಅಪಘಾತವೆಸಗಿ ಲಾರಿ ಚಾಲಕ ವಾಹನ ನಿಲ್ಲಿಸದೆ ಪರಾರಿಯಾಗಲು ಯತ್ನಿಸಿದಾಗ ಇದನ್ನು ಕಂಡ ಸ್ಥಳೀಯರು ಕೂಗಿಕೊಂಡಿ ದ್ದರಿಂದ ಲಾರಿ ಬಿಟ್ಟು ಪರಾರಿಯಾಗಿದ್ದಾನೆ. ಲಾರಿಗೆ ಇಬ್ಬರು ಚಾಲಕರಿದ್ದರು. ಅಪಘಾತದ ವೇಳೆ ಲಾರಿ ಚಾಲನೆ ಮಾಡುತ್ತಿದ್ದ ಚಾಲಕ ಪರಾರಿಯಾಗಿದ್ದು, ಮತ್ತೊಬ್ಬ ಚಾಲಕ ಸಿಕ್ಕಿದ್ದಾನೆ. ಆತನನ್ನು ವಿಚಾರಣೆ ಮಾಡಲಾಗಿದೆ. ಆ ಚಾಲಕನನ್ನು ಕರೆಸಲು ಎಲ್ಲ ಪ್ರಯತ್ನ ಮಾಡಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಈ ಸಂಬಂಧ ಪೀಣ್ಯ ಸಂಚಾರಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.