ಬೆಂಗಳೂರು: ಅತ್ತೆ ಸೊಸೆಯರ ಜಗಳ ಕೇಳಿದ್ದೇವೆ. ಆದರೆ, ಅತ್ತೆ ಮನೆಗೆ ಬಂದಳೆಂಬ ಕಾರಣಕ್ಕೆ ಸೊಸೆಯೇ ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆಯೊಂದು ನಗರದಲ್ಲಿ ನಡೆದಿದೆ.

ಗಂಡ ತನ್ನ ಅತ್ತೆಯನ್ನು ಮನೆಗೆ ಕರೆತಂದಿದ್ದರಿಂದ ಬೇಸರಗೊಂಡ ಸೊಸೆ ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಶರಣಾಗಿರುವ ಘಟನೆ ಪೀಣ್ಯ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಶನಿವಾರ ನಡೆದಿದೆ. ಚನ್ನಂಗಯ್ಯಪಾಳ್ಯದ ನಿವಾಸಿ ಗೀತಾ (26) ಆತ್ಮಹತ್ಯೆ ಮಾಡಿಕೊಂಡ ಸೊಸೆ. ಗೀತಾ ಎಂಟು ವರ್ಷಗಳ ಹಿಂದೆ ಆಟೋ ಚಾಲಕ ರವಿ ಅವರನ್ನು ವಿವಾಹವಾಗಿದ್ದರು. ವಿವಾಹದ ಬಳಿಕ ದಂಪತಿ ಪ್ರತ್ಯೇಕವಾಗಿ ವಾಸವಾಗಿದ್ದರು. ರವಿ ತಾಯಿ ಕೂಡ ಪ್ರತ್ಯೇಕವಾಗಿದ್ದರು. ಕೆಲ ದಿನಗಳ ಹಿಂದೆ ಪತ್ನಿ ವಿರೋಧದ ನಡುವೆಯೂ ರವಿ ತನ್ನ ತಾಯಿಯನ್ನು ಮನೆಗೆ ಕರೆ ತಂದಿದ್ದರು. ಮನೆಗೆ ಅತ್ತೆ ಪ್ರವೇಶವಾಗಿದ್ದರಿಂದ ಗೀತಾ ತೀವ್ರ ಬೇಸರಗೊಂಡಿದ್ದರು.

ಶನಿವಾರ ಅತ್ತೆ ಮನೆಯಲ್ಲಿ ಇರಲಿಲ್ಲ. ಪತಿ ರವಿ ಕೂಡ ದೇವಸ್ಥಾನಕ್ಕೆ ತೆರಳಿದ್ದರು. ಈ ವೇಳೆ ಗೀತಾ ಮನೆಯ ಕೊಠಡಿಗೆ ತೆರಳಿ ಫ್ಯಾನಿಗೆ ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಶರಣಾಗಿದ್ದಾರೆ. ರಾತ್ರಿ 8.30ರ ಸುಮಾರಿಗೆ ರವಿ ದೇವಸ್ಥಾನದಿಂದ ಮನೆಗೆ ಹಿಂದಿರುಗಿದಾಗ ಘಟನೆ ಬೆಳಕಿಗೆ ಬಂದಿದೆ. ಪ್ರಕರಣ ದಾಖಲಿಸಿಕೊಂಡಿರುವ ಪೀಣ್ಯ ಠಾಣೆ ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.