ಬೆಂಗಳೂರು: ಕುಖ್ಯಾತ ರೌಜಿ ಆಮೀರ್ ಖಾನ್ ನನ್ನು ಕಮರ್ಷಿಯಲ್ ಸ್ಟ್ರೀಟ್ ಪೊಲೀಸರು ಬಂಧಿಸಿದ್ದಾರೆ ಎಂದು ತಿಳಿದುಬಂದಿದೆ.
ಬೆಂಗಳೂರಿನ ಶಿವಾಜಿನಗರದಲ್ಲಿ ಕುಖ್ಯಾತಿ ಗಳಿಸಿದ್ದ ಲೇ.ಕೋಳಿ ಫಯಾಜ್ ನ ಮಗ ಆಮೀರ್ ಖಾನ್ ಮತ್ತು ಆತನ ಇಬ್ಬರು ಸಹಚರರನ್ನು ಬಂಧಿಸುವಲ್ಲಿ ಕಮರ್ಷಿಯಲ್ ಸ್ಟ್ರೀಟ್ ಪೊಲೀಸರು ಯಶಸ್ವಿಯಾಗಿದ್ದಾರೆ. ಸಿಸಿಬಿ ಪೊಲೀಸರ ಸಹಕಾರದೊಂದಿಗೆ ಪೊಲೀಸರು ಆಮೀರ್ ಖಾನ್ ಆತನ ಇಬ್ಬರು ಸಹಚರರಾದ ಆಸಿಫ್ ಮತ್ತು ರೋಷನ್ ಅವರನ್ನು ಬಂಧಿಸಿದ್ದಾರೆ.
ಬಂಧಿತರ ಮೇಲೆ ಬೆಂಗಳೂರಿನ ವಿವಿಧ ಪೊಲೀಸ್ ಠಾಣೆಗಳಲ್ಲಿ ಹಲವು ಪ್ರಕರಣಗಳು ದಾಖಲಾಗಿದ್ದು, ಕೊಲೆ ಯತ್ನ, ದರೋಡೆ, ಸುಲಿಗೆ, ಕಳ್ಳತನ, ಸರಗಳ್ಳತನದಂತಹ ಹಲವಾರು ನಿಷೇಧಿತ ಚಟುವಟಿಕೆಗಳಲ್ಲಿ ಇವರು ತೊಡಗಿದ್ದರು. ಬಂಧಿತರಿಂದ ಹಲವು ಮಾರಕಾಸ್ತ್ರಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ ಎಂದು ತಿಳಿದುಬಂದಿದೆ. ಇನ್ನು ರೌಡಿ ಆಮೀರ್ ಖಾನ್ ನ ವಿರೋಧಿ ಬ್ರಿಗೇಡ್ ಅಜಮ್ ನನ್ನು ಕೊಂದು ಹಾಕಲು ಈ ಮೂವರು ಸ್ಕೆಚ್ ರೂಪಿಸಿದ್ದರು ಎಂದು ಪೊಲೀಸ್ ತನಿಖೆಯ ಬಳಿಕ ತಿಳಿದುಬಂದಿದೆ.
ಒಟ್ಟಾರೆ ಬೆಂಗಳೂರಿನ ಹಲವು ನಾಗರೀಕರನ್ನು ಹೆದರಿಸಿ-ಬೆದರಿಸಿ ಬದುಕುತ್ತಿದ್ದ ಕುಖ್ಯಾತ ರೌಡಿ ಗುಂಪೊಂದು ಇದೀಗ ಜೈಲು ಕಂಬಿಯ ಹಿಂದಕ್ಕೆ ಸರಿದಿದೆ.